តាមកាសែត Chosun Ilbo អ្នកស្រី Kim Yo-jong ហាក់ដូចជាត្រូវបានតែងតាំងឲ្យកាន់តួនាទី ជាមេសន្តិសុខជាតិកូរ៉េខាងជើង។ មុខតំណែងនេះ មុននោះធ្លាប់ត្រូវបានដឹកនាំដោយឪពុកមារ របស់លោក គីម ជុងអ៊ុន គឺលោក Jang Song-taek ដែលត្រូវប្រហារជីវិតកាលពីឆ្នាំ ២០១៣។ ក្នុងមុខតំណែងថ្មីនេះ អ្នកស្រី Kim Yo-jong នឹងទទួលបន្ទុកដឹកនាំស្នងការសន្តិសុខជាតិ ទទួលបន្ទុកកងកម្លាំងប៉ូលិស និងអយ្យការនៅកូរ៉េខាងជើង។
Kim Yo-jong អមដំណើរមេដឹកនាំគីម ជុងអ៊ុន ចូលរួមពិធីប្រគុំតន្ត្រីមួយនៅព្យុងយ៉ាងថ្ងៃទី 29 ធ្នូ។
ក្រោយការប្រហារជីវិតលោក Jang Song-taek ស្ថាប័ននេះត្រូវបានដាក់ឲ្យចំណុះគណបក្សពលករកូរ៉េ។
ប្រភពព័ត៌មានពីរដ្ឋាភិបាលកូរ៉េខាងត្បូងវាយតម្លៃថា ៖ “នៅថ្ងៃទី ២២ ធ្នូ ២០១៧ គេបានឃើញអ្នកស្រី Kim Yo-jong អង្គុយលើកៅអីក្នុងជួរជាមួយបងប្រុស នាសន្និសីទរបស់គណបក្ស។ តាមរយៈនោះបញ្ជាក់បានថា អ្នកស្រីត្រូវបានតម្លើងឲ្យកាន់មុខតំណែងមួយសំខាន់របស់កូរ៉េខាងជើង។
Kim Yo-jong (ក្នុងរង្វង់ក្រហម) អង្គុយក្នុងជួរជាមួយលោកគីម ជុងអ៊ុន
Kim Yo-jong ជាកូនស្រីរបស់សពមេដឹកនាំ គីម ជុងអ៊ីល ជាមួយភរិយាទី៣ គឺជាសិល្បៈការិនីផ្នែករបាំ Ko Yong-hui។ ប្រភពខ្លះឲ្យដឹងថា Kim Yo-jong មានវ័យ ៣០ឆ្នាំ តែខ្លះទៀតថា នាងមានអាយុទើប ២៨ឆ្នាំប៉ុណ្ណោះ។
គួររំលឹកឡើងវិញថា អ្នកស្រី Kim Yo-jong បានក្លាយជាសមាជិក ក្រុមប្រឹក្សាប្រជាជនកំពូល (រដ្ឋសភា) នៅខែមីនា ឆ្នាំ ២០១៤។ នៅខែឧសភា ២០១៦ បានក្លាយជាសមាជិកបក្សពលករកូរ៉េខាងជើង ហើយនៅខែ តុលា ២០១៧ អ្នកស្រីបានក្លាយជាសមាជិកបំរុងការិយាល័យនយោនាយមជ្ឈិមបក្សពលករកូរ៉េ៕ ចន្ទ្រា