នេះជារឿងដ៏ស្លុតចិត្ត និងគួរឲ្យអាម៉ាសបំផុតមួយ ខណៈដែលថ្មីៗនេះ មានលេចចេញជនខិលខូចមួយចំនួន ព្រោះតែចង់បានផលប្រយោជន៍ពីបណ្តាញសង្គមទំនាក់ទំនងសង្គម បានបង្កើតផេក និងគ្រុប (Group) អាកាសអាភាស ក្រោមលក្ខខណ្ឌ Comment, Like និង Share ពីអ្នកប្រើប្រាស់បណ្តាញសង្គម ដែលចូលចិត្តតាមដានងប់ងល់ក្នុងរឿងនេះ ដែលមើលទៅពិតជាធ្វើឲ្យប៉ះពាល់ដល់សេចក្តីថ្លៃថ្នូរសង្គម និងជាពិសេសកិត្តិយសស្ត្រីខ្មែរយ៉ាងខ្លាំង។
តាមរយៈទង្វើរដ៏គួរឲ្យស្អប់ខ្ពើមនេះ ក្នុងនោះអ្នកប្រើប្រាស់បណ្តាញសង្គមម្នាក់លោក Vannak MC បានសម្រេចចេញវីដេអូ ស្នើសុំដល់ក្រសួងពាក់ព័ន្ធ ជាពិសេសក្រសួងមហាផ្ទៃ ដែលមានជំនាញលើបទល្មើសបច្ចេកវិទ្យានេះ មេត្តាចាត់វិធានការទៅលើម្ចាស់ផេក/គ្រុបទាំងនេះ ដើម្បីយកមកផ្តន្ទាទោសតាមផ្លូវច្បាប់។
ជាមួយគ្នានេះផងដែរ គេសង្ឃឹមថា ក្រសួងពាក់ព័ន្ធនឹងមានវិធានការក្នុងរឿងនេះជាបន្ទាន់ ដើម្បីបកស្បែកមុខជនរកស៊ីខិលខូចទាំងនេះ ដែលកំពុងកេងចំណេញផលប្រយោជន៍ពីបណ្តាញទំនាក់ទំនងសង្គមដ៏ធំមួយនេះ ដោយមិនខ្វល់ពីទង្វើរនៃការប្រព្រឹត្តខុសរបស់ពួកគេឡើយ៕
ដោយ៖ លឹម ហុង