ភ្នំពេញ៖ យុវជនម្នាក់ បានប្រព្រឹត្តកំហុស ដោយបានចែករំលែកនូវព័ត៌មានមិនពិត និងបានសរសេរពាក្យពេចន៍ ខ្លឹមសារប្រមាថ ផ្សព្វផ្សាយនៅលើគណនីហ្វេសប៊ុករបស់ខ្លួន បានចូលខ្លួនមកនាយកដ្ឋានព័ត៌មានវិទ្យានៃក្រសួងមហាផ្ទៃដើម្បីសារភាពកំហុស បើទោះជាយ៉ាងណាយុវជនរូបនោះបានទទួលការអប់រំណែនាំហើយក៏អនុញ្ញាតឲ្យវិលត្រឡប់ទៅផ្ទះវិញ។
នាព្រឹកថ្ងៃសុក្រ ទី៥ ខែមិថុនា ឆ្នាំ២០២០ នេះយុវជនឈ្មោះ ខវឃ ភេទប្រុស ជនជាតិ ខ្មែរ សញ្ញាតិ ខ្មែរ រស់នៅក្នុងភូមិដាំស្ពៃ ឃុំស្លាកែត ស្រុកបាត់ដំបង ខេត្តបាត់ដំបង បានចូលខ្លួនមកសារភាព និងទទួលស្គាល់កំហុសរបស់ខ្លួន ពាក់ព័ន្ធនឹងការសរសេរ ផ្សព្វផ្សាយ ខ្លឹមសារប្រមាថ មកលើថ្នាក់ដឹកនាំនាយកដ្ឋានព័ត៌មានវិទ្យា។
យុវជនខាងលើ បានសារភាពទទួលស្គាល់ថា ខ្លួនពិតជាបានប្រព្រឹត្តកំហុស ដោយបានចែករំលែកនូវព័ត៌មានមិនពិត និងបានសរសេរពាក្យពេចន៍ ខ្លឹមសារប្រមាថ ផ្សព្វផ្សាយនៅលើគណនីហ្វេសប៊ុករបស់ខ្លួន កាលពីថ្ងៃទី២២ ខែឧសភា ឆ្នាំ២០២០ កន្លងទៅ ដែលបានធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូរយ៉ាងធ្ងន់ធ្ងររបស់ថ្នាក់ដឹកនាំនាយកដ្ឋានព័ត៌មានវិទ្យា ជាពិសេសបានធ្វើឲ្យប៉ះពាល់ដល់កិត្តិយស សេចក្តីថ្លៃថ្នូររបស់មន្ត្រីរាជការសាធារណៈទូទៅផងដែរ។
បន្ទាប់ពីបានធ្វើការ អប់រំ ណែនាំ យុវជនខាងលើបានធ្វើកិច្ចសន្យាឈប់ប្រព្រឹត្តនូវកំហុងឆ្គងខាងលើតទៅទៀត និងសន្យាធ្វើជាយុវជនល្អក្នុងសង្គម។
ឆ្លៀតក្នុងឱកាសនេះផងដែរ នាយកដ្ឋានព័ត៌មានវិទ្យា សូមសំណូមពរឲ្យ បងប្អូនប្រជាពលរដ្ឋទាំងអស់ មេត្តាជៀសវាងឲ្យបាននូវការចែកចាយព័ត៌មានមិនពិត គ្មានប្រភពច្បាស់លាស់ ដើម្បីធានាបាននូវសន្តិសុខ សណ្តាប់ធ្នាប់សាធារណៈ និងសេចក្តីថ្លៃថ្នូរក្នុងសង្គមរបស់យើងទាំងអស់គ្នា៕
ដោយ៖កូឡាប
