ភ្នំពេញ÷ សម្តេចអគ្គមហាសេនាបតីតេជោ ហ៊ុន សែន បានចុះហត្ថលេខាលើសេចក្តីសម្រេច ស្តីពីការបង្កើតគណៈកម្មការត្រួតពិនិត្យការអភិវឌ្ឍន៍នៅកោះកុងក្រៅ ខេត្តកោះកុង ដែលមានសមាសភាពមកពីក្រសួង នៃរាជរដ្ឋាភិបាលកម្ពុជា និងថ្នាក់ខេត្ត ដែលជាអាជ្ញាធរដែនដី នេះ បើយោងតាមសេចក្តីសម្រេចលេខ៦៣ សសរ ចុះថ្ងៃទី៤ ខែមិថុនា ឆ្នាំ២០២០។
សូមបញ្ជាក់ថា កោះកុងក្រៅ ស្ថិតក្នុងដែនសមត្ថកិច្ច នៃរដ្ឋបាលខេត្តកោះកុង ។
គណៈកម្មការត្រួតពិនិត្យការអភិវឌ្ឍន៍នៅកោះកងក្រៅ ខេត្តកោះកុង ដែលមានលោក សាយ សំអាល់ រដ្ឋមន្ត្រីក្រសួងបរិស្ថាន ជាប្រធាន និងលោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា ជាអនុប្រធាន ព្រមទាំងសមាជិកចំនួន៨រូបផ្សេងទៀត។
គណៈកម្មការនេះមានភារកិច្ចត្រួតពិនិត្យលើគម្រោងអភិវឌ្ឍន៍កោះកុងក្រៅទាំងមូលរបស់ក្រុមហ៊ុនកោះកុង អេស អ៉ី ហ្សិត ខូអិលធីឌី ដែលរាជរដ្ឋាភិបាលប្រគល់ជូនឲ្យអភិវឌ្ឍន៍តាម សជណ ចុះថ្ងៃទី១៤ ខែមិថុនា ឆ្នាំ២០១៩ របស់ទីស្តីការគណៈរដ្ឋមន្ត្រី។
ពាក់ព័ន្ធនឹងការអភិវឌ្ឍន៍តំបន់កោះកុងក្រៅ យុវជនមួយក្រុមដែលជាសកម្មជន អង្គការ មាតាធម្មជាតិ បានជិះហែរជាក្បួនមកភ្នំពេញ មិនមានលិខិតអនុញ្ញាតពីអាជ្ញាធរ ធ្វើសកម្មភាពទាមទារឱ្យមានការសង្គ្រោះតំបន់កោះកុងក្រៅ នៃខេត្តកោះកុង ឱ្យដាក់ជាតំបន់ការពារ។ ដែលករណីនេះ ក្រសួងបរិស្ថានបានហៅក្រុមសកម្មជន អង្គការ មាតាធម្មជាតិ គ្រាន់តែជាលេស ដើម្បីបិទបាំងនូវឧបាយកលនយោបាយទុច្ចរិត។
ពាក់ព័ន្ធនឹងករណីខាងលើនេះ នៅថ្ងៃទី៣ខែមិថុនាឆ្នាំ២០២០នេះ ក្រសួងបរិស្ថាន បានសេចក្តីប្រកាសព័ត៌មាន សូមសម្តែងការសោកស្តាយ ចំពោះក្រុមជនមួយចំនួនតូច ដែលចេញមកសម្តែង ធ្វើជាអ្នកការពារបរិស្ថាន ដោយបានធ្វើសកម្មភាពទាមទារ ឱ្យមានការសង្គ្រោះតំបន់កោះកុងក្រៅ នៃខេត្តកោះកុង ឱ្យដាក់ជាតំបន់ការពារ។ នេះគ្រាន់តែជាលេស ដើម្បីបិទបាំងនូវឧបាយកលនយោបាយទុច្ចរិត ដែលស្ថិតក្រោមការរៀបចំមួយ ដ៏ច្បាស់លាស់ប៉ុណ្ណោះ។
ក្រសួងបរិស្ថាន សូមគូសបញ្ជាក់ថា ទោះបីជាគ្មានយុទ្ធនាការ ឬការទាមទារណាមួយក៏ដោយ ក៏រាជរដ្ឋាភិបាលកម្ពុជា តាមរយៈក្រសួងបរិស្ថាន បានយកចិត្តទុកដាក់ខ្ពស់ លើការងារការពារ និងអភិរក្សតំបន់កោះកុងក្រៅនេះ ដោយបានបញ្ជូនក្រុមមន្ត្រីជំនាញ បានធ្វើការសិក្សាស្រាវជ្រាវ រៀបចំឯកសារ និងទិន្នន័យផ្សេងៗ ទាក់ទងនឹងតំបន់កោះកុងក្រៅនេះ តាំងពីឆ្នាំ ២០១៦ មកម្ល៉េះ ដើម្បីដាក់តំបន់នេះ ជា «ឧទ្យានជាតិសមុទ្រ» ព្រោះតំបន់នេះសម្បូណ៍ដោយសក្តានុពល ផ្នែកធនធានធម្មជាតិ និងជីវចម្រុះ និងមានឆ្នេរខ្សាច់ល្អស្រស់ស្អាត ដែលត្រូវការពារនិងអភិរក្ស។ នៅក្នុងគម្រោងផែនការ ក្រសួង បរិស្ថាន រំពឹងថា នឹងអាចប្រកាសតំបន់កោះកុងក្រៅនេះជា «ឧទ្យានជាតិសមុទ្រ» អំឡុងឆ្នាំ ២០២១ ខាងមុខនេះ ក្រោយការបញ្ចប់ការសិក្សារួចរាល់។
ក្រសួងបរិស្ថាន សង្ឃឹមថា ក្រុមជនមួយចំនួនតូចនេះ នឹងយល់ដឹងកាន់តែច្បាស់ ហើយខិតខំរៀនធ្វើការរួមគ្នា ប្រកបដោយភាពស្មោះត្រង់ ជាមួយអាជ្ញាធរពាក់ព័ន្ធ ដើម្បីបុព្វហេតុបរិស្ថាន និងធនធានធម្មជាតិ ហើយជៀសវាងការបង្កើតឆាកល្ខោនសម្តែង និងធ្វើអាជីវកម្ម ដើម្បីកេងចំណេញនយោបាយ៕
ដោយ៖កូឡាប
