ស្ទឹងត្រែង៖ គ្រោះថ្នាក់ចរាចរណ៍ដ៏រន្ធត់បានបង្កឲ្យមានម្នាក់ស្លាប់ និងម្នាក់ទៀតរងរបួសធ្ងន់ ពេលមានរ៉ឺម៉កមួយគ្រឿង និងត្រាក់ទ័រមួយ គ្រឿង បើកស្របគ្នាយ៉ាងលឿនវ៉ាជែងគ្នា ហើយពេលនោះមានម៉ូតូមួយគ្រឿងទៀត ជិះឌុបគ្នា២នាក់ ដោយបើកបរក្នុងទិសដៅបញ្ច្រាសទិសគ្នា បានបុកជាមួយនឹងរ៉ឺម៉កម៉ូតូចំពីមុខពេញទំហឹង បណ្តាលឲ្យអ្នកជិះម៉ូតូឌុបគ្នា២នាក់ ម្នាក់បានស្លាប់ និងម្នាក់ទៀតរងរបួសធ្ងន់ធ្ងរ ។
ហេតុការណ៍គ្រោះថ្នាក់ចរាចរណ៍នេះ បានកើតឡើងនៅលើកំណាត់ផ្លូវជាតិលេខ៧ ភូមិរាជានុកូល សង្កាត់ស្ទឹងត្រែង ក្រុង ខេត្តស្ទឹងត្រែង កាលពីល្ងាចថ្ងៃទី៤ ខែមិថុនា ឆ្នាំ២០២០។
នៅថ្ងៃទី៦មិថុនានេះ សមត្ថកិច្ចនគរបាលរកពុំទាន់ឃើញត្រាក់ទ័រ ដែលបើកគេចមិនទទួលខុសត្រូវ ក្នុងករណីគ្រោះថ្នាក់បណ្តាលឲមានមនុស្សស្លាប់ និងរបួសនៅឡើយទេ។
លោកខែក សារី នគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តស្ទឹងត្រែង បានប្រាប់ឲ្យដឹងកាលពីថ្ងៃទី៥ ខែមិថុនា ឆ្នាំ ២០២០នេះថា ករណីគ្រោះថ្នាក់ចរាចរណ៍ម៉ូតូសណ្តោងរ៉ឺម៉ក បុកជាមួយម៉ូតូជិះឌុបគ្នា២នាក់ បណ្តាលឲ្យមនុស្សអ្នកបើកបរម៉ូតូ រងរបួសធ្ងន់ម្នាក់ និងអ្នកជិះនៅពីខាងក្រាយបានស្លាប់ សាច់ញាតិបានមកទទួលហើយ។ ដោយជនរងគ្រោះឈ្មោះ ហីង ហាន ភេទប្រុស អាយុ២៧ឆ្នាំ មានមុខរបរកសិករ មានទីលំនៅភូមិចាស្វាយប៉ាក ឃុំចៀក ស្រុកតំបែរ ខេត្តត្បូងឃ្មុំ ស្លាប់នៅកន្លែងកើតហេតុ។ អ្នកជិះរួមដំណើរម្នាក់ទៀតឈ្មោះ ចន ចិន ភេទប្រុស អាយុ២៩ឆ្នាំ រស់នៅក្នុងភូមិឃុំខាងលើជាមួយគ្នា រងរបួសធ្ងន់។
លោកបានបញ្ជាក់ថា ម្ចាស់ម៉ូតូរ៉ឺម៉កមាន ឈ្មោះរស់ រីណា ភេទប្រុស អាយុ២៤ឆ្នាំ មុខរបរកសិករ មានទីលំនៅភូមិឃ្លូក ឃុំសួង ក្រុងសួង ខេត្តត្បូងឃ្មុំ ។
ក្រោយកើតហេតុ ម៉ូតូរងគ្រោះនិងម៉ូតូរ៉ឺម៉កបានពាក់ព័ន្ធ ត្រូវបានយកមករក្សាទុកនៅក្នុង ស្នងការដ្ឋាននគរបាលខេត្តស្ទឹងត្រែង៕
ដោយ៖សុខុម