អាជ្ញាធរអាមេរិចបានធ្វើការដកវិញ នូវការគំរាមបិទជើងហោះហើរទាំងអស់របស់ចិន ចូលមកកាន់អាមេរិច។ ការប្រកាសនេះ កើតឡើងក្រោយពេលរដ្ឋាភិបាលចិន បានធ្វើការផ្លាស់ប្តូរគោលនយោបាយផ្ទាល់ខ្លួនវិញ ដោយអនុញ្ញាតឲ្យមានជើងហោះហើរមួយចំនួន ពីអាមេរិចចូលទៅកាន់ចិនវិញ។
ការសងសឹកដាក់គ្នារវាងមហាអំណាចសេដ្ឋកិច្ចទាំងពីរ កើនឡើងនៅពេលការហោះហើរពីអាមេរិច ទៅកាន់ចិន មានការធ្លាក់ចុះយ៉ាងខ្លាំង ដោយសារតែការផ្ទុះវីរុសកូរ៉ូណា។ ក្រុមហ៊ុនអាកាសចរណ៍អាមេរិច Delta Air Lines និង United Airlines បានសម្រេចចិត្តផ្អាកសេវាកម្ម របស់ពួកគេរវាងប្រទេសទាំងពីរ ហើយទីបំផុត រដ្ឋាភិបាលអាមេរិច បានធ្វើការដាក់កំហិតមួយចំនួនលើការធ្វើដំណើរ។
ប៉ុន្តែនៅពេលក្រុមហ៊ុនអាកាសចរណ៍ Delta Air Lines និង United Airlines ស្វែងរកការបន្តផ្តល់សេវាហោះហើរវិញទៅកាន់ចិន ពួកគេបានដឹងថា រដ្ឋាភិបាលចិនមិនបានអនុញ្ញាត។ នេះបើតាមក្រសួងដឹកជញ្ជូនរបស់អាមេរិច។
ដូច្នេះ កាលពីថ្ងៃពុធ ក្រសួងដឹកជញ្ជូនបានធ្វើការកំណត់ថា រដ្ឋាភិបាលចិនកំពុងរំលោភកិច្ចព្រមព្រៀង ធ្វើដំណើរអន្តរជាតិរវាងប្រទេសទាំងពីរ និងបានប្រកាសថា ខ្លួននឹងធ្វើការរឹតត្បិតការហោះហើររបស់ចិន ចូលក្នុងអាមេរិចក្នុងពេលឆាប់ៗនេះ។
ជាការឆ្លើយតបចំពោះការគំរាមរបស់អាមេរិច មន្ត្រីរបស់ចិន នៅថ្ងៃព្រហស្បតិ៍ម្សិលមិញនេះ បានធ្វើការបន្ធូរបន្ថយការរឹតត្បិត ដែលអនុញ្ញាតឲ្យក្រុមហ៊ុនអាកាសចរណ៍ Delta Air Lines និង United Airlines អាចធ្វើប្រតិបត្តិការការហោះហើរ ទៅមកពេញមួយសប្តាហ៍។
ក្រសួងដឹកជញ្ជូនអាមេរិច បាននិយាយថា ខ្លួនសង្ឃឹមថា វិធាននោះនឹងធ្វើឲ្យបរិយាកាសប្រសើរឡើង ដល់ក្រុមហ៊ុនអាកាសចរណ៍នៃប្រទេសទាំងពីរ៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN
