បារាំងបាននិយាយថា ខ្លួនបានសម្លាប់មេដឹកនាំក្រុមអាល់កៃដា (al-Qaeda) ឈ្មោះ Abdelmalek Droukdel នៅក្នុងប្រតិបត្តិការភាគខាងជើងនៃប្រទេសម៉ាលី។
រដ្ឋមន្ត្រីការជាតិបារាំងអ្នកស្រី Florence Parly បាននិយាយថា Abdelmalek Droukdel ជាមួយនឹងសមាជិកមួយចំនួនទៀត នៃបក្ខពួករបស់ខ្លួន ត្រូវបានសម្លាប់នៅភាគខាងជើងប្រទេសម៉ាលី កាលពីថ្ងៃពុធ។
កងកម្លាំងរបស់បារាំង ក៏បានធ្វើការចាប់ខ្លួនមេបញ្ជាការក្រុមអ៊ីស្លាម នៅក្នុងប្រទេសម៉ាលីផងដែរ ក្នុងប្រតិបត្តិការកាលពីខែឧសភា។
រដ្ឋមន្ត្រីការពារជាតិបារាំងបន្តទៀតថា ប្រតិបត្តិការនោះ បានវាយប្រហារយ៉ាងធ្ងន់ធ្ងរ ទៅដល់ក្រុមភេរវករ។
“កងកម្លាំងពួកយើង ដោយមានកិច្ចសហប្រតិបត្តិការជាមួយនឹងដៃគូនៅតំបន់ Sahel នឹងបន្តតាមប្រម៉ាញ់ពួកគេឥតឈប់ឈរ”។
ក្នុងនាមជាមេដឹកនាំក្រុមអាល់កៃដា Abdelmalek Droukdel ជាអ្នកទទួលខុសត្រូវលើក្រុមទាំងអស់នៅអាហ្វ្រិចខាងត្បូង និងជាអ្នកបញ្ជាទៅលើក្រុមនៅតំបន់ Sahel ដែលក្រុមនោះជាអង្គការជីហាត់មានឈ្មោះថា Jamaat Nusrat al-Islam wal-Muslimin ((JNIM)។
ចំណែកមេបញ្ជាការរបស់ក្រុមរដ្ឋអ៊ីស្លាម ដែលត្រូវបានចាប់ខ្លួនមានឈ្មោះថា Mohamed Mrabat។ គេគឺជាទាហ៊ានជីហាតជើងចាស់ និងមានតួនាទីខ្ពស់នៅក្នុងក្រុមរដ្ឋអ៊ីស្លាម នៅក្នុងក្រុម Greater Sahara។ មេបញ្ជាការរូបនេះ ត្រូវបានចាប់ខ្លួនកាលពីថ្ងៃទី ១៩ ខែឧសភា។
តើនរណាជា Abdelmalek Droukdel?
ស្ថិតក្នុងវ័យជាង ៤០ឆ្នាំ រូបគេបានដឹកនាំវាយប្រហារ ប្រឆាំងកងទ័ពរបស់រុស្ស៊ី នៅក្នុងប្រទេសអាហ្វហ្គានីស្ថាន ហើយត្រូវបានគេចាត់ទុកថាជាអ្នកដែលគោរពអតីតមេដឹកនាំក្រុមអាល់កៃដា នៅក្នុងប្រទេសអ៊ីរ៉ាក់ឈ្មោះ Abu Musab al-Zarqawi។
ក្រោមការដឹកនាំរបស់ខ្លួន ក្រុមអាល់កៃដា បានធ្វើការវាយប្រហារជាច្រើនលើកច្រើនសារ រួមមានការវាយប្រហារក្នុងឆ្នាំ ២០១៦ ទៅលើសណ្ឋាគារមួយ ស្ថិតក្នុងរដ្ឋធានី Ouagadougou នៃប្រទេស Burkina Faso បណ្តាលឲ្យមនុស្ស ៣០នាក់ស្លាប់ និង ១៥០នាក់រងរបួស។
នៅក្នុងឆ្នាំ ២០១២ មេដឹកនាំរូបនោះត្រូវបានកាត់ទោសប្រហារជីវិត កំបាំងមុខ ដោយតុលាការក្នុងប្រទេសអាល់សេរី ពីបទឃាតកម្ម និងជាសមាជិកនៃអង្គការភេរវករ និងការវាយប្រហារដោយប្រើប្រាស់គ្រឿងផ្ទុះ។
ការចោទប្រកាន់នោះទាក់ទងនឹងការវាយប្រហារ ដោយគ្រាប់បែកចំនួន ៣គ្រាប់នៅក្នុងរដ្ឋធានី Algiers កាលពីឆ្នាំ ២០០៧ បណ្តាលឲ្យមនុស្ស ២២នាក់ស្លាប់ និងជាង ២០០នាក់រងរបួស៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC