តាកែវ៖ ស្នងការនគរបាលខេត្តតាកែវ ជំរុញឲ្យនគរបាលជាតិ នៅមូលដ្ឋានពិនិត្យឡើងវិញ ទៅលើការក្តាប់ឲ្យបានការងារសន្តិសុខ ដើម្បីធានាសុវត្ថិភាពជូនបងប្អូនប្រជាពលរដ្ឋ និងបោសសម្អាតឲ្យអស់ជាមួយនិងករណីប្រើប្រាស់ ឬជួញដូរគ្រឿងញៀនដែលកំពុងសាយភាយខ្លាំងនៅតាមទីជនបទ ។
ថ្លែងក្នុងពិធីប្រកាសតែងតាំង លោកវរសេនីយ៍ទោ យ៉ុង ប៊ុនយ៉ុន ជាអធិការស្រុកអង្គរបូរីថ្មី នាថ្ងៃទី ៦ ខែមិថុនា ឆ្នាំ២០២០នេះ លោកឧត្តមសេនីយ៍ទោ សុខ សំណាង បន្តថា នគរបាលនៅជាប់ជាមួយនិងប្រជាពលរដ្ឋដែលជាមន្ត្រីប៉ុស្តិ៍រដ្ឋបាល ត្រូវតាមដានចំពោះមុខសញ្ញាដែលធ្លាប់ជាប់ពន្ធធនាគារ ហើយរួចចេញមកវិញ តើពួកគាត់មានការកែប្រែឬអត់ ព្រោះមុខសញ្ញាទាំងនោះ គឺជាមុខសញ្ញាបង្កចាស់ ដែលនគរបាលគ្រប់រូបមិនគួរមើលរំលងឡើយ ព្រោះពួកគាត់បើសិនជានូវមិនទាន់កែខ្លួនទេ ក៏ជាមុខសញ្ញាដែលធ្វើឲ្យយើងឈឺក្បាលឡើយ ។
ក្នុងនោះដែរ លោកឧត្តមសេនីយ៍ទោ សុខ សំណាង បានសង្កត់ធ្ងន់លើករណី ចោរលួចទូកបងប្អូនប្រជាពលរដ្ឋ ដែលតែងតែកើតមាននៅមូលដ្ឋានស្រុកចំនួន ៣ មានស្រុកកោះអណ្តែក ស្រុកបូរីជលសារ និងស្រុកអង្គរបូរី ក្នុងនោះដែរថ្មីៗនេះដែរ យើងបានស្រាវជ្រាវរកឃើញទូកចំនួន ៨គ្រឿង និងម៉ាស៊ីនចំនួន ២ និងឃាត់ខ្លួនជនសង្ស័យម្នាក់ បញ្ជូនទៅតុលាការរួចហើយ ចំពោះមុខសញ្ញាដែលជាចោលួចទូកយ៉ាងសកម្ម ហើយជនសង្ស័យផ្សេងទៀត កម្លាំងជំនាញរបស់យើងបានកំណត់មុខសញ្ញាបានអស់ហើយ ។
ក្នុងកម្មវិធីប្រកាសអធិការថ្មីនេះដែរ លោក ឌឹម គឹមសាន្ត អភិបាលស្រុកអង្គរបូរី បានស្នើសុំឲ្យលោកអធិការថ្មីរក្សាឲ្យបានចំពោះសន្តិសុខនៅក្នុងមូលដ្ឋាន និងចូលរួមបង្ក្រាបនៅបទល្មើសខុសច្បាប់ ដែលកើតមានឡើង នៅក្នុងស្រុករបស់យើង ដែលជាស្រុកមួយមានទឹកលិច ហើយក៏មានបទល្មើសនេសាទកើតឡើងដែរ មួយវិញទៀត សូមឲ្យលោកអធិការថ្មី ចូលរួមធ្វើការសម្របសម្រួលលើការចុះធ្វើបទបង្ហាញនានា ស្តីពីច្បាប់ចរាចរណ៍ផ្លូវគោក ទៅដល់ពលរដ្ឋក៏ដូចជាសិស្សានុសិស្ស ដើម្បីរួមគ្នាកាត់បន្ថយនៅអាត្រាគ្រោះថ្នាក់ចរាចរណ៍ ក្រោយយើងពិនិត្យឃើញថា ប៉ុន្មានឆ្នាំថ្មីៗកន្លងមកនេះ គឺមានការកើនឡើងគួរឲ្យកត់សម្គាល់នៅករណីគ្រោះថ្នាក់ចរាចរណ៍ នៅក្នុងស្រុកអង្គរបូរី ខណៈដែរក្នុងស្រុករបស់យើងកាន់តែមានផ្លូវល្អស្អាត ហើយការបើកបររបស់ពលរដ្ឋកាន់តែមានល្បឿនលឿន និងខ្វះការប្រុងប្រយ័ត្ន ៕
ដោយ៖តាកែវ
