អភិបាលក្រុង D.C អ្នកស្រី Muriel Bowser បានប្តូរឈ្មោះផ្លូវនៅមុខសេតវិមាន ដោយដាក់ថា “ Black Lives Matter Plaza” និងមានពាក្យស្លោកលាបលើផ្លូវកៅស៊ូ ជាអក្សរលឿងដ៏ធំ ដែលចង្អុលបង្ហាញជាជម្លោះរវាងអ្នកស្រី និងប្រធានាធិបតី Trump លើការគ្រប់គ្រងផ្លូវ D.C។
មន្ត្រីក្រុងបាននិយាយថា សកម្មភាពកាលពីថ្ងៃសុក្រ គឺដើម្បីគោរពដល់ក្រុមបាតុករដែលកំពុងជំរុញឱ្យមានការផ្លាស់ប្តូរការអនុវត្តច្បាប់ បន្ទាប់ពីការសម្លាប់លោក George Floyd ជាបុរសស្បែកខ្មៅដែលគ្មានអាវុធ បានស្លាប់យ៉ាងអាណោចអាធ័មជាទីបំផុត នៅក្នុងការចាប់ខ្លួនរបស់ប៉ូលិស Minneapolis ៤នាក់ ។
លោក John Falcicchio ប្រធានបុគ្គលិកអភិបាលក្រុងបានមានប្រសាសន៍ថា “នៅសប្តាហ៍នេះមានជម្លោះអំពីផ្លូវនេះ ហើយអភិបាលក្រុង Bowser ចង់បង្ហាញអោយច្បាស់ថាតើផ្លូវនោះជាផ្លូវអ្វី ហើយដើម្បីគោរពដល់បាតុករដែលបានធ្វើបាតុកម្មដោយសន្តិវិធី ដែលបានជួបជុំគ្នាកាលពីយប់ថ្ងៃចន្ទ” ។
អស់រយៈពេលជាច្រើនថ្ងៃ លោកស្រី Bowser បានជំទាស់យ៉ាងខ្លាំង ចំពោះការបង្កើនការអនុវត្តច្បាប់សហព័ន្ធ និងការឆ្លើយតបរបស់យោធា ចំពោះការតវ៉ា និងភាពចលាចលនៅក្នុងរដ្ឋធានីរបស់ប្រទេសនេះ។
លោក Trump បានជំរុញឱ្យមានការបង្ក្រាបទៅលើក្រុមបាតុករដែលបានខឹងសម្បា ដោយឈានដល់ករណីលួចប្លន់ជាបណ្តើរៗ ក្នុងអំឡុងពេលតវ៉ានៅទីក្រុងវ៉ាស៊ីនតោន និងទីក្រុងមួយចំនួនទៀត។ លោក និងអគ្គព្រះរាជអាជ្ញា William P. Barr បានបំពេញបន្ថែមពីការបញ្ជូនប៉ូលិសសហព័ន្ធ និងអង្គភាពឆ្មាំជាតិដ៏ច្រើន ទៅកាន់រដ្ឋធានី ដើម្បីប្រឆាំងនឹងបំណងប្រាថ្នារបស់ Bowser ។
ការិយាល័យរបស់ចៅហ្វាយក្រុងបានប្រាប់ CNN ថា ក្រុមអ្នកចាក់អក្សរត្រូវបានទាក់ទងដោយអភិបាលក្រុង Muriel Bowser ហើយបានចាប់ផ្តើមធ្វើការនៅព្រឹកថ្ងៃសុក្រ។ Bowser បានចាត់ទុកជាផ្លូវការនូវផ្នែកនៃផ្លូវលេខ១៦ ដែលមានផ្ទាំងអក្សរ “ Black Lives Matter Plaza” ដែលមានផ្លាកសញ្ញាផ្លូវថ្មី។
Bowser បានប្រាប់អ្នកយកព័ត៌មាននៅខាងក្រៅវិហារ St John នៅក្បែរ Lafayette Park ថា អ្នកស្រី និងសមាជិកក្រុមប្រឹក្សា DC គឺនៅទីនោះក្នុងនាមជាប្រជាជន Washington – យើងគ្រាន់តែចង់នៅទីនេះជាមួយគ្នាដោយសន្តិភាព ដើម្បីបង្ហាញថានៅអាមេរិក អ្នកអាចប្រមូលផ្តុំគ្នាដោយសន្តិវិធី អ្នកអាចនាំការតវ៉ាចំពោះរដ្ឋាភិបាលរបស់អ្នក ហើយអ្នកអាចទាមទារការផ្លាស់ប្តូរ” ។
លោកស្រី Bowser បានបន្តលើកឡើងទៀតថា “យើងនៅទីនេះដោយសន្តិវិធី ក្នុងនាមជាជនជាតិអាមេរិក រស់នៅតាមផ្លូវអាមេរិក នៅតាមផ្លូវ DC”។
សូមបញ្ជាក់ថា រឿងនេះកើតឡើង គឺបន្ទាប់ពីលោក Trump បានបញ្ជាឱ្យប៉ូលីសឧទ្យានសហរដ្ឋអាមេរិក និងកងទ័ពឆ្មាំជាតិ ឲ្យដកកម្លាំងបាតុករដែលធ្វើការតវ៉ាដោយសន្តិវិធីនៅខាងក្រៅសេតវិមាន កាលពីល្ងាចថ្ងៃចន្ទ។ ហ្វូងមនុស្សត្រូវបានបែកខ្ញែកគ្នាដូច្នេះលោក Trump អាចដើរចេញពីសេតវិមាន ទៅកាន់វិហារគ្រឹស្តសាសនា St. John’s Episcopal សម្រាប់ការថតរូបដែលគាត់បានកាន់ព្រះគម្ពីរ។
ក្នុងនោះផងដែរ ប្រធានាធិបតី Trump ក៏បានរិះគន់លោកស្រីចៅហ្វាយ Muriel Bowser កាលពីថ្ងៃសុក្រ ដោយចោទប្រកាន់ថា លោកស្រីអសមត្ថភាព ខណៈភាពតានតឹងរវាងភាគីទាំងសងខាងបានកើនឡើង៕
ប្រែសម្រួល៖ លឹម ហុង (ប្រភព៖ washingtonpost, msn)
<iframe width=”1252″ height=”704″ src=”https://www.youtube.com/embed/I6T8C12jHTg” frameborder=”0″ allow=”accelerometer; autoplay; encrypted-media; gyroscope; picture-in-picture” allowfullscreen></iframe>
