ភ្នំពេញ៖ វិស័យទេសចរណ៍រួមចំណែកយ៉ាងសំខាន់ដល់ការលើកកម្ពស់សេដ្ឋកិច្ចជាតិ និងជីវភាពប្រជាជន។ ប៉ុន្តែដោយសារវិបិត្តជំងឺឆ្លងកូវីដ១៩ ធ្វើឲ្យវិស័យទេសចរណ៍ធ្លាក់ចុះយ៉ាងខ្លាំង មិនថា ប្រទេសកម្ពុជា និងពិភពលោកនោះទេ។
ក្នុងកាលៈទេសៈនៃការធូរស្បើយពីជំងឺកូវីដ១៩មួយរយៈមកនេះ ក្រសួងទេសចរណ៍ក៏ដូចជាវិស័យឯកជន ដែលរកទទួលទានក្នុងវិស័យនេះបានរិៈរកនូវគំនិតថ្មីៗ និងគោលដៅទេសចរណ៍ជាច្រើន ដោយបង្កើតកម្មវិធីទេសចរណ៍ ជម្រុញដំណើរកម្សាន្តក្នុងស្រុក តាមរយៈកញ្ចប់ទស្សនៈកិច្ចទេសចរណ៍ដើម្បីលើកកម្ពស់ទេសចរណ៍ក្នុងស្រុក។
ក្នុងសន្និសីទសារព័ត៌មានស្តីពីការជម្រុញដំណើរកម្សាន្តក្នុងស្រុកតាមរយៈកញ្ចប់ទស្សនៈកិច្ចទេសចរណ៍ ដែលមានការគាំទ្រពីក្រុមហ៊ុនទេសចរណ៍ Charming Cambodia Tours គម្រោង Forest Harmony និងក្រុមហ៊ុន Z 1 News លោក ឱម ផារិន តំណាងសមាគមទីភ្នាក់ងារទេសចរណ៍កម្ពុជា CATA និងជាអគ្គនាយក្រុមហ៊ុន Charming Cambodia Tours បានឲ្យដឹងថា កញ្ចប់ទស្សនៈកិច្ចទេសចរណ៍ជា ទេសចរណ៍ផ្ទៃក្នុង និងជាមធ្យោបាយដ៏ល្អប្រសើរមួយ ដើម្បីលើកកម្ពស់វិស័យទេសចរណ៍ ជាពិសេសទេសចរណ៍ ក្នុងស្រុក ខណៈដែលដំណើរកម្សាន្តទៅក្រៅប្រទេសបានបិទ។ លោកថា នេះជាឱកាសក្នុងការបង្កើតកញ្ចប់ធួរ និងជួយដល់បងប្អូនប្រជាពលរដ្ឋកម្ពុជា ដែលមានបំណងចង់ធ្វើដំណើរកម្សាន្ត អាចជ្រើសរើសកញ្ចប់ទស្សនៈកិច្ចទេសចរណ៍ក្នុងតម្លៃពិសេសដែលធូថ្លៃជាងដំណើរកំសាន្តលក្ខណៈគ្រួសារ។ លោកបញ្ជាក់ថា គោលបំណងសំខាន់នៃការជម្រុញដំណើរកម្សាន្តក្នុងស្រុក តាមរយៈកញ្ចប់ទស្សនៈកិច្ចទេសចរណ៍នេះ គឺដើម្បីផ្សព្វផ្សាយទេសចរណ៍ផ្ទៃក្នុងទៅកាន់ប្រជាជនខ្មែរ ក៏ដូចជាជនបរទេសដែលកំពុងរស់នៅកម្ពុជា ឲ្យធ្វើដំណើរកម្សាន្តក្នុងស្រុកនៃកាលៈទេសៈ កូវីដ ១៩ ពេលដែលមិនអាចចេញក្រៅប្រទេសបាន។
លោកឱម ផារិន បានបន្តទៀតថា កញ្ចប់ទស្សនៈកិច្ចទេសចរណ៍ពិសេសនេះ គឺអតិថិជន មិនបារម្មណ៍រឿងស្នាក់នៅ ការហូបចុក ឬការធ្វើដំណើរជាដើមពិសេសបានជួយកាត់បន្ថយការប្រើប្រាស់យានយន្តផ្ទាល់ខ្លួន មកប្រើរថយន្តតែមួយ ហើយបានទទួលអត្ថប្រយោជន៍ជាច្រើនស្គាល់ពីវប្បធម៍ប្រវត្តិសាស្ត្រ ការអភិវឌ្ឍគម្រោងអចលនទ្រព្យ និងហេដ្ឋារចនាសម្ព័ន្ធនានានៅតាមខេត្តមួយចំនួន ស្កាល់ទេសចរណ៍ធម្មជាតិក្នុងស្រុកពីតំបន់សក្តានុពលទេសចរណ៍សំខាន់ៗដូចជា ចំការទុរ៉េ ចំការម្រេចកំពត ស្រែអំបិល និងតំបន់មួយចំនួនទៀត។លោកឱម ផារិន បានបញ្ជាក់ថា កញ្ចប់ទស្សនៈកិច្ចទេសចរណ៍ខុសពីដំណើរកម្សាន្តលក្ខណៈគ្រួសារ ព្រោះកន្លែងមួយចំនួនដំណើរកម្សាន្តគ្រួសារគេមិនអនុញ្ញត្តិឲ្យចូលងាយៗនោះទេ។
ទាក់ទិននិងការជម្រុញដំណើរកម្សាន្តក្នុងស្រុក តាមរយៈកញ្ចប់ទស្សនៈកិច្ចទេសចរណ៍នេះ ឯកឧត្តម ឈុន មករា អគ្គលេខាធិការរង និងជាប្រធាននាយកគ្រប់គ្រងទីភ្នាក់ងារដឹកជញ្ជូន និងមគ្គុទេសក៍ទេសចរណ៍ និងជាតំណាងរបស់ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានមានប្រសាសន៍ កម្មវិធីនេះគឺស្របទៅនិងគោលនយោបាយរបស់ក្រសួងទេសចរណ៍ ដែលលើកទឹកចិត្តឲ្យមានដំណើរកម្សាន្តឲ្យបានច្រើន ព្រោះការកម្សាន្តនេះ ជម្រុញឲ្យមានការចាយវាយប្រាក់កាន់តែច្រើនជាងមុន និងការស្នាក់នៅយូថ្ងៃ គឺជួយដល់លំហូរចរន្តសេដ្ឋកិច្ចជាតិ និងជីវភាពប្រជាជនកម្ពុជា។
ជាមួយគ្នានេះ ឯកឧត្តម ឈុន មករា ក៏បានបញ្ជាក់ថា វិស័យដែលរកទទួលទានបំរើសេវាកម្មទេសចរណ៍នេះក៏ត្រូវយកចិត្តទុក និងគោរពតាមវិធាន និងគោលការណ៍បង្ការ និងទប់ស្គាត់ការឆ្លងជំងឺកូវីដ១៩ផងដែរ បើមិនបានអនុវត្តគោលការណ៍ទេ នោះក្រសួងនិងមានវិធានការបិទ ឬ ព្យួរអាជីវកម្មទាំងនោះ ៕
ដោយ ៖ សម្ផស្ស
