បាត់ដំបង៖ កម្លាំងប៉ូលិសការិយាល័យប្រឆាំងគ្រឿងញៀនខេត្តបាត់ដំបង បានចាប់បុរស៥នាក់ជួញដូររក្សាទុក និងថ្នាំម៉ាទឹកកក១៤ថង់ ថ្នាំយ៉ាម៉ា៥គ្រាប់ ម៉ូតូ២គ្រឿង សម្ភារពាក់ព័ន្ធមួយចំនួន កសាងសំណុំរឿងបញ្ជូនទៅតុលាការ ដើម្បីចាត់ការទៅតាមផ្លូវច្បាប់ នៅថ្ងៃទី៦ ខែមិថុនា ឆ្នាំ២០២០។
ហេតុការណ៍ចាប់ឃាត់ខ្លួនជនសង្ស័យ៥នាក់នេះ បានធ្វើឡើងកាលពី ថ្ងៃទី៥ ខែមិថុនា ឆ្នាំ២០២០ នៅចំណុចផ្សេងគ្នា ក្នុងស្រុកថ្មគោល ស្រុកបវេល និងស្រុកកំរៀង ខេត្តបាត់ដំបង។
លោកសុខ និមល នាយការិយាល័យប្រឆាំងបទល្មើសគ្រឿងញៀនខេត្តបាត់ដំបង បានឲ្យដឹងថា ជនសង្ស័យ៥នាក់ ដែលចាប់ឃាត់ខ្លួន ករណីទី១ ឈ្មោះពេជ្រ សុខលី ហៅង៉ោល ភេទប្រុស អាយុ៣១ឆ្នាំ រស់នៅក្រុមទី៧ ភូមិវាលទ្រា ឃុំអូរតាគី ស្រុកថ្មគោល ខេត្តបាត់ដំបង និងឈ្មោះអៀង វី ភេទប្រុស អាយុ៣០ឆ្នាំ រស់នៅក្រុមទី៧ ភូមិវាលទ្រា ឃុំអូរតាគី ស្រុកថ្មគោល ខេត្តបាត់ដំបង និងឈ្មោះផល ភួយ ភេទប្រុស អាយុ២៧ឆ្នាំ រស់នៅក្រុមទី២០ ភូមិទំពួងត្បូង ឃុំតាពួង ស្រុកថ្មគោល ខេត្តបាត់ដំបង។ ក្នុងប្រតិបត្តិការនេះ កម្លាំងដកហូតបានថ្នាំម៉ាទឹកកក៤ថង់ ទូរស័ព្ទដៃ៣គ្រឿង ម៉ូតូមួយគ្រឿង សម្ភារមួយចំនួនទៀត។ ហើយចាប់ឃាត់ខ្លួនកាលពីម៉ោង១២និង៣០នាទី ថ្ងៃទី៥ ខែមិថុនា ឆ្នាំ២០២០ នៅចំណុចក្រុមទី២ ភូមិវាលទ្រា ឃុំអូរតាគី ស្រុកថ្មគោល ខេត្តបាត់ដំបង។ ករណីទី២ ឈ្មោះចែម សុភក្ដិ ហៅតួក ភេទប្រុស អាយុ៤០ឆ្នាំ មានទីលំនៅមិនពិតប្រាកដ។ ក្នុងប្រតិបត្តិការនេះ កម្លាំងដកហូតបានថ្នាំម៉ាទឹកកកមួយថង់ ទូរស័ព្ទដៃមួយគ្រឿង ម៉ូតូមួយគ្រឿង សម្ភារពាក់ព័ន្ធប្រើប្រាស់ថ្នាំញៀនមួយចំនួនទៀត ហើយចាប់ឃាត់ខ្លួនកាលពីម៉ោង១៥និង០០នាទីថ្ងៃទី៥ ខែមិថុនា ឆ្នាំ២០២០ នៅចំណុចក្រុមទី៥ ភូមិស្វាយធំ ឃុំបឹងរាំង ស្រុកកំរៀង ខេត្តបាត់ដំបង។ ករណីទី៣ ឈ្មោះស៊ាទ ចិត ភេទប្រុស អាយុ៣៣ឆ្នាំ រស់នៅភូមិរូងជ្រៃ ឃុំរូងជ្រៃ ស្រុកថ្មគោល ខេត្តបាត់ដំបង។ ក្នុងប្រតិបត្តិការនេះ កម្លាំងដកហូតបានថ្នាំម៉ាទឹកកក៩ថង់ សម្ភារពាក់ព័ន្ធប្រើប្រាស់ថ្នាំញៀនមួយចំនួនទៀត ហើយចាប់ឃាត់ខ្លួនកាលពីម៉ោង១៥និង២៦នាទី ថ្ងៃទី៥ ខែមិថុនា ឆ្នាំ២០២០ នៅចំណុច ភូមិដាច់ព្រាត់ ឃុំបវេល ស្រុកបវេល ខេត្តបាត់ដំបង។
លោកសុខ និមល បានបញ្ជាក់ថា កម្លាំងបានសហការជាមួយកម្លាំងប៉ូលិសស្រុកទាំង៣ ចុះបង្ក្រាបបានករណីរនេះ ហើយចាប់ឃាត់ខ្លួនជនសង្ស័យ៥នាក់ និងវត្ថុតាងបានភ្លាមៗជាក់ស្ដែងតែម្ដង។ បច្ចុប្បន្ននេះ កម្លាំងបានកសាងសំណុំរឿងបញ្ជូនជនសង្ស័យ និងវត្ថុតាង ទៅតុលាការ ដើម្បីចាត់ការទៅតាមផ្លូវច្បាប់ នៅថ្ងៃទី៦ ខែមិថុនា ឆ្នាំ២០២០ហើយ៕
ដោយ៖អ៊ុងសារុំ
