ភ្នំពេញ៖ សមត្ថកិច្ចមន្ទីរប្រឆាំងគ្រឿងញៀន បើកកិច្ចប្រតិបត្តិការបង្ក្រាបករណីកែច្នៃ ជួញដូរ គ្រឿងញៀនដោយខុសច្បាប់ ក្នុងភូមិសាស្ត្ររាជធានីភ្នំពេញ ដោយចាប់ខ្លួនជនសង្ស័យជនជាតិចិន៤នាក់ ដកហូតថ្នាំគ្រឿងញៀនប្រភេទ កេតាមីន ៥កញ្ចប់ធំ ទម្ងន់ប្រមាណ៧គីឡូក្រាម ។
មន្ទីរប្រឆាំងគ្រឿងញៀន នៅព្រឹកថ្ងៃទី៧ខែមិថុនាឆ្នាំ២០២០នេះ ចេញរបាយការណ៍លម្អិតថា នៅវេលាម៉ោង២០និង៤០នាទី ថ្ងៃទី៥ ខែមិថុនា ឆ្នាំ២០២០ កម្លាំងជំនាញ (ក១០)របស់មន្ទីរប្រឆាំងបទល្មើសគ្រឿងញៀន ដឹកនាំដោយលោកឧត្តមសេនីយ៍ទោ សារី បុត្រសត្យា លោកវរសេនីយ៍ឯក យឹម សែនឧត្តម នាយករងមន្ទីរ សហការជាមួយកម្លាំងជំនាញ នៃស្នងការដ្ឋាននគរបាលរាជធានីភ្នំពេញ និង មានការសម្របសម្រួលពីលោកព្រះរាជអាជ្ញារង គុជ គឹមឡុង បានដំណើរការ ស៊ើបអង្កេត ស្រាវជ្រាវ និងបង្ក្រាប នៅចំណុចក្បែស្ថានទូតអូស្ត្រាលី ខុនដូ «សោភា» ផ្លូវចូលទៅកោះពេជ្រ ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ជាលទ្ធផលឃាត់ខ្លួនជនសង្ស័យ៤នាក់ ១- ឈ្មោះ LEE SHAOFENG ភេទប្រុស អាយុ៤៨ឆ្នាំ ជនជាតិ ចិន(តៃវ៉ាន់)។ ២- ឈ្មោះ HE YI RI ភេទប្រុស អាយុ៥៦ឆ្នាំ ជនជាតិ ចិន(តៃវ៉ាន់)។ ៣- ឈ្មោះ ZHANG JUN ភេទប្រុស អាយុ៤៦ឆ្នាំ ជនជាតិ ចិន។ ៤- ឈ្មោះ CAI TAO ភេទប្រុស អាយុ៤៥ឆ្នាំ ជនជាតិ ចិន និង ចាប់យកវត្ថុតាង ថ្នាំកេតាមីន ៥កញ្ចប់ធំ ទម្ងន់ប្រមាណ៥គីឡូក្រាម ។
បន្ទាប់មកបានបន្តទៅឆែកឆេរខុនដូ ស្ថិតនៅសង្កាត់បឹងកេងកងទី១ ខណ្ឌបឹងកេងកង លទ្ធផល ចាប់យកវត្ថុតាង សារធាតុប្រភេទ កេតាមីន ២កញ្ចប់ធំ ទម្ងន់ប្រមាណ២គីឡូក្រាម ឧបករណ៍កៃច្នៃ និងសារធាតុគីមីផ្សំជាច្រើន ។ សរុបនៃប្រតិបត្តិការនេះ សមត្ថកិច្ចមន្ទីរគ្រឿងញៀន ឃាត់ជនសង្ស័យ ៤ នាក់(ប្រុស)ជនជាតិចិន សារធាតុញៀនប្រភេទកេតាមីនប្រមាណ ៧គីឡូក្រាម និង ឧបករណ៍កែច្នៃ និងសារធាតុគីមីផ្សំជាច្រើនមុខ ៕
ដោយ៖កូឡាប