បាត់ដំបង៖ កម្លាំងប៉ូលិសការិយាល័យប្រឆាំងគ្រឿងញៀនខេត្តបាត់ដំបង បានចាប់បុរស៣នាក់ជួញដូររក្សាទុកនិងថ្នាំម៉ាទឹកកក៨ថង់ ម៉ូតូមួយគ្រឿង សម្ភារពាក់ព័ន្ធមួយចំនួន កសាងសំណុំរឿងបញ្ជូនទៅតុលាការ ដើម្បីចាត់ការទៅតាមផ្លូវច្បាប់នៅ ថ្ងៃទី៧ ខែមិថុនា ឆ្នាំ២០២០។
ហេតុការណ៍ចាប់ឃាត់ខ្លួនជនសង្ស័យ៣នាក់នេះ បានធ្វើឡើងកាលពី ថ្ងៃទី៥-៦ ខែមិថុនា ឆ្នាំ២០២០ នៅចំណុចផ្សេងគ្នា ក្នុងស្រុករតនមណ្ឌល និង ស្រុកបាណន់ ខេត្តបាត់ដំបង។
លោកសុខ និមល នាយការិយាល័យប្រឆាំងបទល្មើសគ្រឿងញៀនខេត្តបាត់ដំបង បានឲ្យដឹងថា ជនសង្ស័យ៣នាក់ដែលចាប់ឃាត់ខ្លួន ករណីទី១ ឈ្មោះសាអាង វិឆៃ ភេទប្រុស អាយុ២៦ឆ្នាំ រស់នៅភូមិព្រៃអំពរ ឃុំអណ្ដើកហែប ស្រុករតនមណ្ឌល ខេត្តបាត់ដំបង ដកហូតបានថ្នាំម៉ាទឹកកក៦ថង់ ទូរស័ព្ទដៃមួយគ្រឿង កាំបិតមួយដើម និងសម្ភារមួយចំនួនទៀត កាលពីម៉ោង១៤និង២៨នាទីថ្ងៃទី៥ ខែមិថុនា ឆ្នាំ២០២០ នៅចំណុចភូមិព្រៃអំពរ ឃុំអណ្ដើកហែប ស្រុករតនមណ្ឌល ខេត្តបាត់ដំបង។ ក្រោយពីសាកសួរឈ្មោះសាអាង វិឆៃ កម្លាំងបានចុះទៅចាប់ឈ្មោះធាន សុផាត ភេទប្រុស អាយុ២១ឆ្នាំ រស់នៅភូមិគីឡូ៣៨ ឃុំត្រែង ស្រុករតនមណ្ឌល ខេត្តបាត់ដំបង ដកហូតបានថ្នាំម៉ាទឹកកកមួយថង់ ទូរស័ព្ទដៃមួយគ្រឿង សម្ភារពាក់ព័ន្ធប្រើប្រាស់ថ្នាំញៀនមួយចំនួនទៀត កាលពីម៉ោង១៦និង៤០នាទីថ្ងៃទី៥ ខែមិថុនា ឆ្នាំ២០២០ នៅចំណុចភូមិគីឡូ៣៨ ឃុំត្រែង ស្រុករតនមណ្ឌល ខេត្តបាត់ដំបង។ ករណីទី២ ឈ្មោះសុន សុវណ្ណ ភេទប្រុស អាយុ៣០ឆ្នាំ រស់នៅភូមិកម្មករសង្កាត់ស្វាយប៉ោ ក្រុងបាត់ដំបង ខេត្តបាត់ដំបង ដកហូតបានថ្នាំម៉ាទឹកកកមួយថង់ ម៉ូតូមួយគ្រឿងសម្ភារពាក់ព័ន្ធប្រើប្រាស់ថ្នាំញៀនមួយចំនួនទៀត កាលពីម៉ោង១៨និង២០នាទី ថ្ងៃទី៦ ខែមិថុនា ឆ្នាំ២០២០ នៅចំណុច ភូមិស្វាយប្រគាប ឃុំឈើទាល ស្រុកបាណន់ ខេត្តបាត់ដំបង។
លោកសុខ និមល បានបញ្ជាក់ថា កម្លាំងបានសហការជាមួយកម្លាំងប៉ូលិសស្រុកទាំង២ ចុះបង្ក្រាបបានករណីរនេះ ហើយចាប់ឃាត់ខ្លួនជនសង្ស័យ៣នាក់ និងវត្ថុតាងបានភ្លាមៗជាក់ស្ដែងតែម្ដង។ បច្ចុប្បន្ននេះ កម្លាំងបានកសាងសំណុំរឿងបញ្ជូនជនសង្ស័យនិងវត្ថុតាង ទៅតុលាការ ដើម្បីចាត់ការទៅតាមផ្លូវច្បាប់ នៅថ្ងៃទី៧ ខែមិថុនា ឆ្នាំ២០២០ហើយ៕
ដោយ៖អ៊ុងសារុំ