ភ្នំពេញ៖ អ្នកនាំពាក្យក្រសួងយុត្តិធម៌ បានលើកឡើងថា ពាក់ព័ន្ធនឹងបាតុកម្មកំពុងពុះកញ្ជ្រោលនៅអាមេរិក មានប្រតិកម្មរបស់ស្ថាប័នសិទ្ធិមនុស្សខ្លះ ក្នុងស្រុកនិងក្រៅស្រុកមួយចំនួន មិនបានផ្តោតលើវិធានការរបស់រដ្ឋាភិបាលអាមេរិក ទៅលើក្រុមបាតុករទាល់តែសោះ ដូចដែលពួកគេធ្លាប់ប្រតិកម្មចំពោះកម្ពុជានាពេលកន្លងមក ហើយពួកគេ ទទួលស្គាល់វិធានការ របស់រដ្ឋាភិបាលអាមេរិក ជាវិធានការសមស្របនិងចាំបាច់។
លោកជិន ម៉ាលីន អ្នកនាំពាក្យ និងជារដ្ឋលេខាធិការក្រសួងយុត្តិធម៌ បានថ្លែងសារលើបណ្តាញសង្គមហ្វេសប៊ុក កាលពីថ្ងៃទី៧ខែមិថុនាឆ្នាំ២០២០ថា “ឃើញមានប្រតិកម្មខ្លះដែរ របស់ស្ថាប័នសិទ្ធិមនុស្ស ក្នុងស្រុកនិងក្រៅស្រុកមួយចំនួន ដែលមាននិន្នាការនយោបាយប្រឆាំងនឹងកម្ពុជា នាពេលកន្លងមក តែប្រតិកម្មទាំងនោះ មិនបានផ្តោតលើវិធានការរបស់រដ្ឋាភិបាលអាមេរិក ទៅលើក្រុមបាតុករទាល់តែសោះ ដូចដែលពួកគេធ្លាប់ប្រតិកម្មចំពោះកម្ពុជានាពេលកន្លងមក”។
អ្នកនាំពាក្យ បានលើកឡើងទៀតថា” ក្រៅតែពីការទាមទាយុត្តិធម៌ ជូនជនរងគ្រោះ និងប្រឆាំងការរើសអើងពូជសាសន៍តែប៉ុណ្ណោះ។ តើនេះមានន័យថា ពួកគេទទួលស្គាល់វិធានការរបស់រដ្ឋាភិបាលអាមេរិក ជាវិធានការសមស្របនិងចាំបាច់មែនដែរឬទេ? បើដូច្នេះមែន លើកក្រោយសូមកុំមករិះគន់វិធានការរបស់កម្ពុជា? Sick!”។
សូមបញ្ជាក់ថា ទ្រព្យសម្បត្តិ ព្រមទាំងអាជីវកម្មមួយចំនួនរបស់ប្រជាពលរដ្ឋខ្មែរនៅទីក្រុងឡុងប៊ិច សហរដ្ឋ អាមេរិក បានរងការបំផ្លិចបំផ្លាញ ដោយសារតែបាតុកម្មទាមទារយុត្តិធម៌ក្រោយការស្លាប់របស់លោក ចច ផ្លយ George Floyd ។
បាតុកម្មតវ៉ានៅអាមេរិកនេះ បានផ្ទុះឡើងក្រោយពេលដែលបុរសស្បែកខ្មៅលោក ចច ផ្លយ វ័យ៤៦ឆ្នាំ បានស្លាប់ដោយសារមន្ត្រីប៉ូលិសស្បែកស ចាប់ខ្លួនរូបគាត់ និងបានគ្រៀកផ្ទប់នឹងដី ដោយយកជង្គង់សង្កត់ក របស់គាត់ រយៈពេល ៨នាទី កាលពីល្ងាចថ្ងៃចន្ទ នៅក្រុង Minneapolis រដ្ឋ Minnesota ។ ហើយរហូតមកដល់ពេលនេះ មានពលរដ្ឋអាមេរិកកាំងជាង៤០ទីក្រុង បានផ្ទុះការធ្វើបាតុកម្ម ។
មានក្រុមបាតុករចូលរួមធ្វើបាតុកម្ម ប៉ុន្តែមិនបានប្រព្រឹត្តទៅដោយសន្តិវិធីត្រឹមត្រូវនោះទេ គឺមានជនឆ្លៀតឱកាស រួមមានទាំងការប្រើអំពើហិង្សាយ៉ាងសាហាវ វាយកម្ទេច ដុតបំផ្លាញសម្បត្តិសាធារណៈ និងគាស់ហាងជនស្លូតត្រង់ លួចយកទំនិញ និងទ្រព្យសម្បត្តិថែមទៀត ។
ជាក់ស្តែង ទិដ្ឋភាពនៅខេមបូឌាថោន នៅទីក្រុងឡុងប៊ិច ក្នុងរដ្ឋកាលីហ្វ័រញ៉ា ក្រោយពីការតវ៉ា កាលពីយប់ថ្ងៃទី៣១ ឧសភា រួមមកជាលទ្ធផល គឺទទួលរងការខូចខាត នៅទីប្រជុំជន ពីលួចគាស់យកទ្រព្យសម្បត្តិ ។
អ្វីដែលសោកសៅ នៅក្នុងខេមថោន គឺសហគមន៍ខ្មែរ ដែលកំពុងជួបការលំបាក នៃអាជីវកម្ម ដោយសារវីរុសកូវីដ-១៩ ផងនោះ ឥឡូវនេះទទួលរងការបំផ្លាញបន្ថែមទៀត ។
អាជីវកម្មមួយចំនួន ត្រូវបានខូចខាត ដោយសារចោរកម្ម (ជនឆ្លៀតឱកាសតវ៉ា នៅកណ្តាលទីក្រុងឡុងប៊ិច ) ដុតកម្ទេច វាយកញ្ចក់ ដូចជាភោជនីយដ្ឋាន ហាងរថភ្លើងក្រោមដី និងហាងផ្សេងទៀត ដែលខូចខាតធ្ងន់ធ្ងរ គឺហាងទូរស័ព្ទ ហាងគ្រឿងអលង្ការ និងឱសថស្ថានខ្មែរ ។
កាលពីថ្ងៃទី១ មិថុនា ស្ថានឯកអគ្គរាជទូតកម្ពុជាប្រចាំនៅអាមេរិក បានអំពាវនាវដល់ប្រជាពលរដ្ឋ សិស្ស និងនិស្សិតខ្មែរទាំងអស់ ដែលកំពុងរស់នៅ ស្នាក់នៅ និងសិក្សានៅទីនោះ ត្រូវមានការប្រុងប្រយ័ត្នឲ្យបានខ្ពស់បំផុតក្នុងការការពារសុវត្ថិភាពផ្ទាល់ខ្លួន និងក្រុមគ្រួសារក៏ដូចជា ទ្រព្យសម្បត្តិដូចខាងក្រោម ៖ ស្ថិតនៅឲ្យបានឆ្ងាយពីការជួបជុំ ឬប្រមូលផ្ដុំនានា ទោះបីក្រោមរូបភាព ឬមូលហេតុអ្វីក៏ដោយ ជៀសវាស និងព្យាយាមកាត់បន្ថយឲ្យបានច្រើនបំផុតចំពោះការចេញទៅខាងក្រៅ ។
ស្ថានឯកអគ្គរាជទូតកម្ពុជាប្រចាំអាមេរិក បានទទួលព័ត៌មានអំពីការខូចខាតធុរកិច្ច (Business) និងទ្រព្យសម្បត្តិរបស់បងប្អូនខ្មែរយើងមួយចំនួន នៅទីក្រុង Long Beach ដោយបាតុកម្មហិង្សា នៅថ្ងៃទី៣១ ខែឧសភា ឆ្នាំ២០២០ កន្លងមកនេះ ។ ស្ថានទូតសូមចូលរួមសំដែងការសោកស្តាយ ហើយមានការព្រួយបារម្ភថា ករណីបែបនេះ ក៏អាចកើតមានផងដែរ ចំពោះបងប្អូនខ្មែរយើងនៅតាមទីក្រុងផ្សេងៗទៀត ៕
ដោយ៖កូឡា