ព្រះសីហនុ៖ លោកស្រី យូ ចន្ថា មុខរបរ មន្ត្រីរាជការ បានយល់ព្រមលក់ដីមួយកន្លែងទៅអោយចិនតម្លៃជាង ៣ លានដុល្លារ និងបានយកលុយកក់ពីចិនចំនួនជាង ២ លានដុល្លារ តែមិនព្រមកាត់ឈ្មោះអោយ ទើបចិនប្ដឹងទារយកលុយវិញ ។
សូមបញ្ជាក់ថា កាលពីថ្ងៃទី២៧ខែឧសភាឆ្នាំ២០២០ លោក ធុច បញ្ចសន្តិភាព ព្រះរាជអាជ្ញារង នៃអយ្យការអមសាលាដំបូងខេត្តព្រះសីហនុ បានចេញដីកាបញ្ជាឲ្យចូលខ្លួន គឺលោកស្រី យូ ចន្ថា មុខរបរ មន្ត្រីរាជការ អាសយដ្ឋានបច្ចុប្បន្ននៅភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ ឲ្យចូលបង្ហាញខ្លួននៅការិយាល័យបទល្មើសព្រហ្មទណ្ឌ នៃបញ្ជាការដ្ឋានកងរាជអាវុធហត្ថខេត្តព្រះសីហនុ នៅថ្ងៃទី២៩ ខែមិថុនា ឆ្នាំ២០២០ ដើម្បីសាកសួរលើបណ្តឹងព្រហ្មទណ្ឌ ពីបទរំលោភលើទំនុកចិត្ត ប្រព្រឹត្តនៅភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ កាលពីថ្ងៃទី២៤ ខែមករា ឆ្នាំ២០១៩។
លោកស្រី យូ ចន្ថា មុខរបរ មន្ត្រីរាជការ បានយល់ព្រមលក់ដីមួយកន្លែងទៅឲ្យជនជាតិចិនតម្លៃជាង ៣ លានដុល្លារ និងបានយកលុយកក់ពីចិនចំនួនជាង ២ លានដុល្លារ តែមិនព្រមកាត់ឈ្មោះឲ្យ ទើបចិនប្ដឹងទារយកលុយវិញតែម្ដង។
លោកស្រី យូ ចន្ថា ត្រូវបានកម្លាំងកងរាជអាវុធហត្ថខេត្តព្រះសីហនុ សហការជាមួយអាវុធហត្ថខេត្តសៀមរាប ចាប់ខ្លួននៅថ្ងៃទី៤ ខែមិថុនា ហើយបញ្ជូនមកអាវុធហត្ថខេត្តព្រះសីហនុ នៅថ្ងៃទី៦ ខែមិថុនា ឆ្នាំ២០២០ តាមដីកាបញ្ជាឲ្យចូលខ្លួនរបស់លោក ធុច បញ្ចសន្ដិភាព ព្រះរាជអាជ្ញារង នៃអយ្យការអមសាលាដំបូងខេត្តព្រះសីហនុ ពីបទ រំលោភលើទំនុកចិត្ត ប្រព្រឹត្តទៅភូមិ១ សង្កាត់លេខ៣ ក្រុងព្រះសីហនុ កាលពីថ្ងៃទី២៤ ខែមករា ឆ្នាំ២០១៩។
ដើមចមនៃរឿងនេះ គឺស្ដ្រីឈ្មោះ យូ ចន្ថា បានព្រមព្រៀងលក់ដីមួយកន្លែង ក្នុងតម្លៃ៣.៦០០.០០០ដុល្លារ ទៅឲ្យជនជាតិចិន។ ក្រោយមកជនរងគ្រោះ បានប្រគល់ប្រាក់កក់ចំនួន ២.២៥០.០០០ដុល្លារ ឲ្យទៅជនសង្ស័យ ដោយសន្យាថា រត់ការកាត់ប្លង់ដោយប្រើប្រាស់ពេល១១ខែ។ ប៉ុន្តែរហូតដល់ពេលកំណត់ ជនសង្ស័យមិនបានបំពេញកាតព្វកិច្ចតាមអ្វី ដែលសន្យា ទើបជនរងគ្រោះសម្រេចដាក់ពាក្យបណ្ដឹង ដើម្បីឲ្យសមត្ថកិច្ចជួយរកយុត្តិធម៌ជូនតែម្ដង។
ទោះយ៉ាងណា កងរាជអាវុធហត្ថខេត្តព្រះសីហនុ កាលពីថ្ងៃទី៤ ខែមិថុនា ឆ្នាំ២០២០ បានចុះអនុវត្តដីកា ខាងលើ ដោយចាប់ខ្លួន លោកស្រី យូ ចន្ថា ។ លោកស្រី យូចន្ថា ត្រូវបានបញ្ជូនពីកងរាជអាវុធហត្ថខេត្តសៀមរាប
មកកងរាជអាវុធហត្ថខេត្តព្រះសីហនុម្ដងវិញ។
លោកស្រី យូ ចន្ថា (ដែលគេហៅងារថា ជំទាវ) ធ្លាប់មានរឿងអាស្រូវទំនាស់ដីធ្លីស្ទើរគ្រប់ទីកន្លែង ដូចជា នៅខេត្តសៀមរាប និងខេត្តព្រះសីហនុ ដែលបង្កក្តៅក្រហាយដល់ប្រជាពលរដ្ឋមិនចេះឈប់ ៕
ដោយ៖កូឡាប
