ចំនួនអ្នកស្លាប់ដោយសារវីរុសកូរ៉ូណាទូទាំងពិភពលោកបានហក់ឡើងដល់ជាង ៤០៦.០០០នាក់ គិតត្រឹមថ្ងៃអាទិត្យម្សិលមិញនេះ ខណៈដែលការឆ្លងថ្មីកំពុងផ្ទុះខ្លាំងនៅក្នុងប្រទេសប្រេស៊ីល និងឥណ្ឌា។
ចំនួនអ្នកស្លាប់សរុបនៅក្នុងសហរដ្ឋអាមេរិចស្មើនឹង ១ ភាគ ៣ នៃចំនួនអ្នកស្លាប់ទូទាំងសកលលោក ប៉ុន្តែចំនួនអ្នកស្លាប់កំពុងតែមានការកើនឡើងយ៉ាងលឿននៅអាមេរិចខាងត្បូង។
ចំនួនអ្នកស្លាប់ដោយសារ COVID-19 ក្នុងរយៈពេល ៥ខែ ពេលនេះស្មើនឹងចំនួនអ្នកស្លាប់ដោយសារជំងឺគ្រុនចាញ់ជារៀងរាល់ឆ្នាំ។ គ្រុនចាញ់ជាជំងឺដ៏កាចសាហាវមួយ ក្នុងចំណោមជំងឺផ្សេងៗទៀតក្នុងពិភពលោក។
ចំនួនអ្នកឆ្លងសរុបទូទាំងពិភពលោកបានកើនដល់ជាង ៧.០០០.០០០នាក់ ដោយក្នុងនោះមានចំនួនអ្នកឆ្លងជិត ២.០០០.០០០នាក់ ឬស្មើ ៣០ភាគរយ នៅសហរដ្ឋអាមេរិច។
វីរុសកូរ៉ូត្រូវបានគេរកឃើញដំបូងកាលពីថ្ងៃទី ១០ ខែមករា ក្នុងទីក្រុងវូហាន ប្រទេសចិន។
អាមេរិចមានអ្នកស្លាប់ច្រើនបំផុតក្នុងលោកដោយតួលេខមានជាង ១១២.០០០នាក់។ ចំនួនអ្នកស្លាប់នៅក្នុងប្រទេសប្រេស៊ីលមានការកើនឡើងយ៉ាងលឿន ហើយប្រទេសនេះប្រហែលអាចតាមទាន់អង់គ្លេសក្លាយជាប្រទេសទី ២ដែលមានអ្នកស្លាប់ច្រើនបំផុត។
ចំណែកអ្នកជាសះស្បើយសរុបទូទាំងពិភពលោកមានជាង ៣.៤៦០.០០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Reuters
