នៅពេលយុវជន Antonio Gwynn Jr. បានឃើញពីការបំផ្លិចបំផ្លាញពីការតវ៉ានៅកន្លែងរស់នៅរបស់គាត់ ក្នុងទីក្រុង Buffalo រដ្ឋ New York គាត់បានយកអំបោស និងធុញសំរាម និងចាប់ផ្តើមបោសសម្អាតតាមដងផ្លូវអស់ជាច្រើនម៉ោង។
គាត់បានចាប់ផ្តើមបោសសម្អាតនៅម៉ោង ២ព្រឹក ថ្ងៃចន្ទ និងបន្តធ្វើវារហូតអស់រយៈពេល ១០ម៉ោង។ នៅពេលក្រុមអ្នកជិតខាងនៅក្នុងសហគមន៍បានធ្វើដំណើរមកដល់នៅពេលព្រឹក ដើម្បីធ្វើការបោសសម្អាត ពួកគេបានដឹងថា យុវជននោះបានធ្វើកិច្ចការសឹងតែរួចរាល់ទាំងស្រុង។
Antonio Gwynn Jr. អាយុ ១៨ឆ្នាំ ជាសិស្សវិទ្យាល័យ។ គាត់បានប្រាប់ CNN ថាគាត់បានឃើញនៅលើសារព័ត៌មានថា វិថី Bailey នៅក្នុងទីក្រុង Buffalo មានសំរាម និងកម្ទេចកម្ទីកញ្ចក់ពេញ ហើយគាត់បានដឹងថា ប្រជាជននៅក្នុងតំបន់ត្រូវការប្រើប្រាស់ផ្លូវ ដើម្បីធ្វើដំណើរនៅពេលព្រឹក។
នៅពេលមានការផ្សព្វផ្សាយពីការប្រឹងប្រែងធ្វើកិច្ចការរបស់គាត់ដើម្បីសហគមន៍ទាំងមូល មនុស្សនៅក្នុងសហគមន៍បានធ្វើការឆ្លើយតបចំពោះសកម្មភាពដ៏ល្អរបស់គាត់។
លោក Matt Block បានដឹងពីរឿងរបស់យុវជននោះនៅតាមសារព័ត៌មាន ហើយគាត់បានសម្រេចចិត្តផ្តល់រង្វាន់ឡាន Ford Mustang ឆ្នាំ ២០០៤ ពណ៌ក្រហមដល់គាត់មួយគ្រឿង។ លោក Matt Block វ័យ ២៧ឆ្នាំ បានថ្លែងប្រាប់ CNN ថាឡាននោះជាឡានដែលគាត់ចង់បានពេលនៅក្មេង ប៉ុន្តែសព្វថ្ងៃនេះ គាត់ប្រើប្រាស់វាម្តងម្កាលប៉ុណ្ណោះ។ លោកបានឃើញ យុវជន Gwynn បង្ហោះសុំយោបល់ពីការទិញឡាននៅលើគណនេយ្យរបស់គាត់ ដូច្នេះគាត់បានផ្តល់រង្វាន់ឡានទៅឲ្យយុវជននោះ។
ចំណែកអ្នកជំនួយម្នាក់ឈ្មោះ Bob Briceland ក៏បានដឹងពីការផ្តល់កាដូរជាឡានដល់យុវជននោះ ហើយគាត់បានសម្រេចចិត្តបន្តការធានារ៉ាប់រងរថយន្តឥតគិតថ្លៃមួយឆ្នាំទៀត លើការធានារបស់ភ្នាក់ងាររបស់គាត់។
ក្រោយបញ្ចប់ថ្នាក់វិទ្យាល័យ ក្មេងប្រុសជំទង់រូបនោះមានគម្រោងបន្តការសិក្សានៅសាលាពាណិជ្ជកម្ម ដើម្បីសន្សំលុយបន្តរៀននៅសកលវិទ្យាល័យ។ ក្រោយពេលបានលឺដំណើររឿងរបស់គេ សកលវិទ្យាល័យ Medaille នៅក្នុងទីក្រុងខាងលើ បានផ្តល់អាហារូបករណ៍ពេញថ្លៃដល់គាត់ ហើយគាត់នឹងចាប់ផ្តើមចូលរៀនផ្នែកជំនួញនៅសកលវិទ្យាល័យខាងលើ នៅរដូវស្លឹកឈើជ្រុះខាងមុខ។
យុវជននោះបានអរគុណចំពោះសហគមន៍របស់គាត់ ដែលបានផ្តល់កាដូដ៏ពិសេសសម្រាប់រូបគាត់៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN