បាត់ដំបង៖ មានភ្ញៀវទេសចរជាតិនិងអន្តរជាតិតិចតួចប៉ុណ្ណោះ បានមកចូលរួមទស្សនា ខណៈពេលបើកដំណើរវិញ បានប្រមាណមួយសប្ដាហ៍ដំបូង បន្ទាប់ពីមានការអនុញ្ញាតពីរាជរដ្ឋាភិបាល។
លោក ឌី កែវ អនុទទួលបន្ទុកសារមន្ទីរនៃមន្ទីរវប្បធម៌និងវិចិត្រសិល្បៈខេត្តបាត់ដំបង បានប្រាប់ឲ្យដឹងកាលថ្ងៃទី៧ ខែមិថុនា ឆ្នាំ២០២០ថា ក្នុងរយៈពេលមួយសប្ដាហ៍ដំបូងនេះ សារមន្ទីរខេត្តបាត់ដំបង មានភ្ញៀវជាតិនិងអន្តរជាតិ បានមកចូលទស្សនាត្រឹមតែ ១១នាក់ប៉ុណ្ណោះ ដែលក្នុងនោះមានភ្ញៀវបរទេស ៣នាក់។ កាលមិនទាន់មានបញ្ហាកូវីដ១៩ ក្នុងមួយសប្ដាហ៍ដូចគ្នា មានភ្ញៀវជាតិចូលទស្សនាចាប់ពី២០ទៅ៣០នាក់ និងពេលខ្លះ បើមានសិស្សចុះមកធ្វើកម្មសិក្សា គឺមានចំនួនលើសនឹង ហើយភ្ញៀវអន្តរជាតិ មានចាប់ពី៥ ទៅ១០នាក់ ប៉ុន្តែពួកគេភាគច្រើនមកម្នាក់ឬ២នាក់ មិនសូវមកជាក្រុមនោះទេ។
លោក គឹម សុភ័ណ ប្រធានស្តីទីមន្ទីរវប្បធម៌ និងវិចិត្រសិល្បៈ បានមានប្រសាសន៍ថា នៅខេត្តបាត់ដំបង មានសារមន្ទីរចំនួន៣ ក្នុងនោះមានសារមន្ទីរខេត្ត សារមន្ទីរវត្តពោធិវាល និងសារមន្ទីរវត្តកំផែង ដោយមានវត្ថុបុរាណផ្សេងៗ ដូចជាចម្លាក់ ភាជន៍ជាដើម សរុបមានជាង១៧០០ ដែលរបស់ទាំងអស់នេះ ត្រូវបានមន្ទីរប្រមូលពីតាមវត្តអារាមបុរាណ ប្រាសាទបុរាណ ទីទួលបុរាណឬតាមល្អាងភ្នំជាដើម និងមួយចំនួនទៀត ត្រូវបានពលរដ្ឋយកមកប្រគល់ជូន នៅពេលពួកគាត់ធ្វើស្រែចម្ការ ឬកាយដីធ្វើអ្វីមួយប្រទះឃើញ ហើយវត្ថុបុរាណទាំងអស់នេះ សុទ្ធតែជារបស់ក្នុងខេត្តបាត់ដំបង។
លោក គឹម សុភ័ណ បានអំពាវនាវដល់ពលរដ្ឋ ដែលបានប្រទះឃើញនូវវត្ថុបុរាណទាំងអស់ សូមប្រគល់ជូនជំនាញ ដើម្បីធ្វើការរក្សាទុកក្នុងសារមន្ទីរ ក៏ដូចជាស្រាវជ្រាវពីប្រវត្តិ ឲ្យបានយល់ដឹងទាំងអស់គ្នា និងមួយទៀត នៅពេលកាន់តែស្ងប់ស្ងាត់បញ្ហាជំងឺកូវីដ១៩ មន្ទីរវប្បធម៌ សហការជាមួយមន្ទីរទេសចរណ៍ រួមទាំងសមត្ថកិច្ចពាក់ព័ន្ធបន្តស្រាវជ្រាវរកទីកន្លែងប្រវត្តិសាស្ត្រនានាក្នុងខេត្ត ដើម្បីរៀបចំជាកន្លែងទេសចរណ៍ ក៏ដូចជាការធ្វើកំណាយផ្សេងៗ។
គួរបញ្ជាក់ថា សារមន្ទីរខេត្តបាត់ដំបង ត្រូវបានបង្កើតឡើងក្រោមស្នាព្រះហស្ត នៃសម្ដេចព្រះបរមរតនកោដ្ឋ នរោត្តម សីហនុ ព្រះវរាជបិតាជាតិខ្មែរ អំឡុងឆ្នាំ១៩៦០ ដោយមានឈ្មោះដំបូងថា សារមន្ទីរសង្គមរាស្ត្រនិយម និងត្រូវបានជួសជុលកែលម្អឡើងវិញនៅឆ្នាំ២០១៧ និងបើកដំណើរការនៅឆ្នាំ២០១៩ ដោយសារមន្ទីរនេះ បើកឲ្យចូលទស្សនាចាប់ពីថ្ងៃអង្គារ ដល់ថ្ងៃអាទិត្យ ៕
ដោយៈអ៊ុងសារុំ
