ភ្នំពេញ៖ ប្រទេសចិនជាទីផ្សារនាំចេញផ្លែចេកស្រស់ដ៏ធំមួយរបស់កម្ពុជា។ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា ការនាំចេញផលិផលកសិកម្ម ក្រៅពីកៅស៊ូធម្មជាតិ គឺមានគ្រប់ស្វាយចន្ទីរ ផ្លែចេក និងស្វាយស្រស់ មាននិន្នាការកើនឡើងគួរឲ្យកត់សំគាល់ ទន្ទឹមនឹងនេះបណ្តាក្រុមហ៊ុនកំពុងបោះទុនវិនិយោគលើដំណាំកសិកម្ម បាននិងកំពុងស្រូបយកកំលាំងពលកម្មយ៉ាងគំហុក។
ឯកឧត្តម វេង សាខុន បានអះអាងថា ប្រាក់ចំណូលទទួលបានពីការនាំចេញផលិតផលផ្លែចេកស្រស់ បានប្រមាណពី ២០ ០០០ ទៅ ២៥ ០០0 ដុល្លារអាមេរិកក្នុងមួយហិកតាក្នុងមួយឆ្នាំ រីឯកៅស៊ូធម្មជាតិ និងស្វាយចន្ទីរ វិញទទួលបានត្រឹមតែជាង ១ ០០០ ដុល្លារអាមេរិកក្នុងមួយហិកតាក្នុងមួយឆ្នាំ។
យោងតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា ការនាំចេញផ្លែចេកស្រស់ក្នុងរយៈពេល ៥ខែដំបូងឆ្នាំ ២០២០នេះ សម្រេចបានប្រមាណ ១២,៤១ម៉ឺនតោន បានកើនឡើង ១៧២,៧៣ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៩។
កម្ពុជាបាន និងកំពុងទទួលបានផលជាផ្លែផ្កាល្អប្រសើរជាបណ្តើរៗ ក្នុងរយៈពេលជិតពីរឆ្នាំចុងក្រោយនេះ ក្រោយពីរាជរដ្ឋាភិបាលបានដាក់ចេញនូវគោលនយោបាយបើកទូលាយដល់វិស័យឯកជន ក្នុងការបោះទុនវិនិយោគលើវិស័យកសិកម្មតាមរយៈការផ្តល់សម្បទានដីសេដ្ឋកិច្ច កាលពី ៨ ទៅ ១៥ឆ្នាំកន្លងមក ស្របពេលដែលកម្ពុជាទទួលបានការចុះពិធីសារនៃការនាំចេញផ្លែឈើទៅកាន់បណ្តាប្រទេសមួយចំនួន ជាពិសេសប្រទេសចិន ជាបន្តបន្ទាប់ពីនាប៉ុន្មានឆ្នាំចុងក្រោយនេះ។
គួរបញ្ជាក់ថា ក្រសួងកសិកម្ម រុក្ខាប្រមាញ់ និងនេសាទ បាននិងកំពុងខិតខំពង្រឹងកិច្ចសហប្រតិបត្ដិការជាមួយដៃគូអភិវឌ្ឍន៍នានា រួមនិងវិស័យឯកជន ដើម្បីគាំទ្រលើការវិនិយោគគ្រប់ខ្សែសង្វាក់តម្លៃកសិកម្មចាប់ពីចំណុច A ដល់ Z តាមរយៈការបង្កើនផលិតភាពផលិតផល ការវេចខ្ចប់ ការរក្សាស្តុកទុក ការកែច្នៃប្រកបដោយគុណភាពអនាម័យ និងសុវត្ថិភាព សមស្របតាមស្តង់ដារនៃទីផ្សារនាំចេញ៕
ដោយ៖សម្ផស្ស