កូរ៉េខាងជើងប្រកាសថា ខ្លួននឹងកាត់ផ្តាច់បណ្តាញទំនាក់ទំនងទាំងអស់ជាមួយនឹងកូរ៉េខាងត្បូង រួមមានបណ្តាញទំនាក់ទំនងបន្ទាន់ រវាងមេដឹកនាំនៃប្រទេសទាំងពីរ។
កូរ៉េខាងជើងនិយាយថា នេះជាវិធានការដំបូងក្នុងចំណោមវិធានការបន្តបន្ទាប់ទេ ដោយរបបនេះចាត់ទុកកូរ៉េខាងត្បូងជាសត្រូវ។
ការហៅទូរស័ព្ទប្រចាំថ្ងៃ ដែលធ្វើឡើងទៅកាន់ការិយាល័យទំនាក់ទំនងក្នុងទីក្រុង Kaesong តាមព្រំដែនកូរ៉េខាងជើង នឹងត្រូវផ្អាកចាប់ពីថ្ងៃអង្គារនេះទៅ។
កូរ៉េទាំងពីរ បានបង្កើតការិយាល័យនោះ ដើម្បីកាត់បន្ថយភាពតានតឹង ក្រោយមានការចរចាក្នុងឆ្នាំ ២០១៨។
បើតាមលក្ខណៈបច្ចេកទេ កូរ៉េខាងជើង និងកូរ៉េខាងត្បូង កំពុងស្ថិតនៅក្នុងសង្គ្រាមជាមួយគ្នានៅឡើយ ពីព្រោះមិនទាន់មានការបង្កើតកិច្ចព្រមព្រៀងសន្តិភាពនៅឡើយទេ នៅពេលសង្គ្រាមកូរ៉េបានបញ្ចប់ក្នុងឆ្នាំ ១៩៥៣។
ប្រព័ន្ធផ្សព្វផ្សាយកូរ៉េខាងជើងចុះផ្សាយថា កូរ៉េខាងជើង “នឹងកាត់ផ្តាច់ និងបិទទាំងស្រុងនូវបណ្តាញទំនាក់ទំនង រវាងអាជ្ញាធរនៃប្រទេសទាំងពីរ”។
ប្រទេសនេះនិយាយទៀតថា បណ្តាញទំនាក់ទំនងយោធាក៏នឹងត្រូវកាត់ផ្តាច់ផងដែរ។
នៅពេលការិយាល័យទំនាក់ទំនង ត្រូវបានបិទជាបណ្តោះអាសន្នកាលពីខែមករា ដោយសារតែបញ្ហាវីរុស COVID-19 ការធ្វើទំនាក់ទំនងរវាងប្រទេសទាំងពីរ ធ្វើឡើងតាមរយៈការហៅទូរស័ព្ទ។
“ពួកយើងបានឈានដល់ការសន្និដ្ឋានថា មិនចាំបាច់មានការអង្គុយទល់មុខគ្នា ជាមួយនឹងអាជ្ញាធរកូរ៉េខាងត្បូងទៀតឡើយ និងមិនមានបញ្ហាត្រូវពិភាក្សាជាមួយពួកគេឡើយ ដោយសារពួកគេធ្វើឲ្យពួកយើងស្រងាកចិត្ត”។
Kim Yo-jong ដែលត្រូវជាប្អូនស្រីបង្កើតរបស់មេដឹកនាំកូរ៉េខាងជើង គីម ជុងអ៊ុន បានគំរាមកាលពីសប្តាហ៍មុនថា នឹងធ្វើការបិទការិយាល័យទំនាក់ទំនងគ្នា ប្រសិនជាកូរ៉េខាងត្បូងមិនបញ្ឈប់ក្រុមផ្តាច់ខ្លួនផ្ញើខិត្តប័ណ្ណចូលក្នុងទឹកដីកូរ៉េខាងជើង។
នាងនិយាយថា យុទ្ធនាការខិត្តប័ណ្ណ គឺជាសកម្មភាពអរិយភាពដែលបានរំលោភកិច្ចព្រមព្រៀងសន្តិភាព ដែលបានធ្វើឡើងក្នុងអំឡុងកិច្ចប្រជុំកំពូលកាលពីឆ្នាំ ២០១៨ រវាងមេដឹកនាំនៃប្រទេសទាំងពីរ។
អ្នកផ្តាច់ខ្លួនចូលមកកូរ៉េខាងត្បូងម្តងម្កាល បានធ្វើការបង្ហោះប៉េងប៉ោងដែលមានខិត្តប័ណ្ណ រិះគន់របបកុម្មយនិស្ត ចូលទៅក្នុងទឹកដីកូរ៉េខាងជើង ដោយពេលខ្លះមានការផ្គត់ផ្គង ដើម្បីទាក់ទាញប្រជាជនកូរ៉េខាងជើង ឲ្យយកចាប់យកប៉េងប៉ោងនោះ។
ប្រជាជនកូរ៉េខាងជើងទាំងអស់ អាចទទួលបានព័ត៌មានតែពីខាងប្រព័ន្ធផ្សព្វផ្សាយរបស់រដ្ឋមួយគត់ ដោយសារពួកគេភាគច្រើន មិនមានអ៊ីនធឺណិតប្រើប្រាស់។
ទំនាក់ទំនងរវាងប្រទេសបងប្អូនទាំងពីរ ហាក់បានប្រសើរឡើងក្នុងឆ្នាំ ២០១៨ នៅពេលមេដឹកនាំនៃប្រទេសទាំងពីរ បានធ្វើការជួបគ្នាចំនួន ៣លើក ដើម្បីចរចាគ្នា។
ប៉ុន្តែទីក្រុងព្យុងយ៉ាងបានធ្វើការកាត់ផ្តាច់ទំនាក់ទំនង ជាមួយនឹងក្រុងសេអ៊ូល បន្ទាប់ពីកិច្ចប្រជុំកំពូលបានបរាជ័យ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC