ភ្នំពេញ៖ រដ្ឋបាលខេត្តព្រះសីហនុ បានឲ្យដឹងថា គម្រោងវិនិយោគ ដែលទទួលបានការលើកទឹកចិត្ត និងកំពុងដំណើរការនៅក្នុងខេត្តព្រះសីហនុ មានចំនួន១៩៤ គម្រោង និងមានទុនវិនិយោគសរុបចំនួន ៣០.០៩១.០៦១.៩២៤ ដុល្លាអាមេរិក។ នេះបើយោងតាម គួច ចំរើន អភិបាល នៃគណៈអភិបាលខេត្តព្រះសីហនុ ក្នុងសន្និសីទសារព័ត៌មាន ស្តីពីវឌ្ឍនភាព និងទិសដៅការងារបន្តរបស់រដ្ឋបាលខេត្តព្រះសីហនុ នៅថ្ងៃទី៩មិថុនានេះ។
លោកថា ខេត្តព្រះសីហនុ ជាខេត្តដែលមានវិស័យសេដ្ឋកិច្ចសំខាន់ៗរួមមាន៖ វិស័យឧស្សាហកម្ម ពាណិជ្ជកម្ម ទេសចរណ៍ និងកសិកម្ម ដែលជាវិស័យអាទិភាពសម្រាប់ការអភិវឌ្ឍ ខឿនសេដ្ឋកិច្ចជាតិរបស់រាជរដ្ឋាភិបាល ។ សក្តានុពលរួមមាន៖ កំពង់ផែសមុទ្រទឹកជ្រៅ តំបន់សេដ្ឋកិច្ចពិសេស មានចំនួន១០ ទីតាំង (៤កំពុងដំណើរការ និង៦ត្រៀមដំណើការ) អាកាសយានដ្ឋានអន្តរជាតិខេត្តព្រះសីហនុ និងឆ្នេរសមុទ្រដ៏ស្រស់ស្អាតដែលត្រូវបានប្រសិទ្ធនាមជា “តារារះនាទិសនិរតី” ។
លោកបន្តថា គម្រោងសាងសង់ផ្លូវល្បឿនលឿន(Expressway) ភ្នំពេញ-ព្រះសីហនុ មានប្រវែងប្រមាណជាង ១៩០ គីឡូម៉ែត្រ សម្រេចបានបាន ២០,៦៥% និងដោះស្រាយផលប៉ះពាល់បាន ៨៨,៨៤% គិតត្រឹមខែមេសា ឆ្នាំ ២០២០។
សូមបញ្ជាក់ដែរថា៖ គម្រោងសាងសង់ផ្លូវល្បឿនលឿននេះ ត្រូវបានបើកការដ្ឋានសាងសង់ នាថ្ងៃទី ២២ ខែមីនា ឆ្នាំ២០២០ ដោយរយៈពេលសាងសង់ចំនួន ៤៨ខែ ហើយគ្រោងនឹងបញ្ចប់ការសាងសង់មុនពេលកំណត់ នាចុងឆ្នាំ២០២២ នេះ ដោយគ្រោងប្រើប្រាស់ថវិកាវិនិយោគ ប្រមាណ ២.០០០លានដុល្លារអាមេរិក។
លោក ចំរើន ថ្លែងថា បើយោងតាមរបាយការណ៍ បានគូសបញ្ជាក់ថា គម្រោងវិនិយោគលើវិស័យអចលនទ្រព្យ មានចំនួន១២ ក្រុមហ៊ុន/គម្រោង ទុនវិនិយោគសរុប ១.០៦៦.៥០០.០០០ ដុល្លាអាមេរិក។ តំបន់សេដ្ឋកិច្ចពិសេស មានចំនួន១០ ក្រុមហ៊ុន អភិវឌ្ឍន៍លើផ្ទៃដី ២.៥៨៦,២៦ ហិកតា ទុនវិនិយោគសរុប ១.៤៨១.៣៥៨.៨០២ ដុល្លារអាមេរិក ។
គម្រោងវិនិយោគដីសម្បទានសេដ្ឋកិច្ច មានចំនួន៥ ក្រុមហ៊ុន អភិវឌ្ឍន៍លើផ្ទៃដី ១១.៧២៨ ហិកតា ទុនវិនិយោគសរុប ១១២.៥៤៨.៩២៤ ដុល្លារអាមេរិក។
គម្រោងវិនិយោគដីជួលរយៈពេលវែង មានចំនួន៣ក្រុមហ៊ុន អភិវឌ្ឍន៍លើផ្ទៃដី ៧.០៥១,៩៧ ហិកតា ទុនវិនិយោគសរុប ៧.៦៩៣.០៣៤.៤៤០ ដុល្លាអាមេរិក។ គម្រោងវិនិយោគកោះឆ្នេរ មានចំនួន២០ក្រុមហ៊ុន អភិវឌ្ឍន៍លើផ្ទៃដី ១១.៦៣៧ ហិកតា ទុនវិនិយោគសរុប ៣.៩០០.៥៧០.២៥១ ដុល្លារអាមេរិក។ គម្រោងវិនិយោគលើវិស័យសេវាកម្មទេសចរណ៍ និងសណ្ឋាគារ មានចំនួន៦០ ក្រុមហ៊ុន/គម្រោង ទុនវិនិយោគសរុប ១០.៧៤៥.៦០១.៨៤៩ ដុល្លារអាមេរិក។
គម្រោងវិនិយោគលើវិស័យកសិកម្ម កសិ-ឧស្សាហកម្ម មានចំនួន១១ ក្រុមហ៊ុន/គម្រោង ទុនវិនិយោគសរុប ២១៣.៩៥៣.៥៤០ ដុល្លារអាមេរិក។ គម្រោងវិនិយោគលើវិស័យកម្មន្តសាល មានចំនួន៦ ក្រុមហ៊ុន/គម្រោង ទុនវិនិយោគសរុប ៥៩.០៦៣.៦៧៤ ដុល្លារអាមេរិក។ គម្រោងវិនិយោគលើវិស័យការច្នៃម្ហូរអាហារ ផលិតភេសជ្ជៈ និងថ្នាំជក់ មានចំនួន៩ ក្រុមហ៊ុន/គម្រោង ទុនវិនិយោគសរុប ៣៣៤.៧២៩.៧៤០ ដុល្លារអាមេរិក។
គម្រោងវិនិយោគលើវិស័យការច្នៃឈើ គ្រឿងសង្ហារឹម មានចំនួន៦ ក្រុមហ៊ុន/គម្រោង ទុនវិនិយោគសរុប ១០២.៩៦៥.៨៨០ ដុល្លារអាមេរិក ។គម្រោងវិនិយោគលើវិស័យសំណង់ មានចំនួន៣ ក្រុមហ៊ុន ទុនវិនិយោគសរុប១៤៧.៩២២.០៥០ ដុល្លារអាមេរិក។ គម្រោងវិនិយោគលើវិស័យទូរគមនាគមន៍ មានចំនួន២ ក្រុមហ៊ុន/គម្រោង ទុនវិនិយោគសរុប ៩៨៧.០១៩ ដុល្លារអាមេរិក។
គម្រោងវិនិយោគលើវិស័យអាជីវកម្មរ៉ែ មានចំនួន២ ក្រុមហ៊ុន/គម្រោង ទុនវិនិយោគសរុប ៧.០៧៩.៩០៥ ដុល្លារអាមេរិក។ គម្រោងវិនិយោគលើវិស័យ រោងចក្រ សហគ្រាសមានចំនួន៤៧ ក្រុមហ៊ុន/គម្រោង ទុនវិនិយោគសរុប ៤.២០០.៦៨៥.៨៣២ ដុល្លារអាមេរិក៕
ដោយ៖សម្ផស្ស