ភ្នំពេញ៖ ឯកឧត្តមឧបនាយករដ្ឋមន្ត្រី ប្រាក់ សុខុន បានបញ្ជាក់ជូនលោកជំទាវរដ្ឋមន្ត្រីការបរទេសអូស្ត្រាលីជាថ្មី នូវគោលការណ៍រដ្ឋធម្មនុញ្ញរបស់កម្ពុជាដែលមិនអនុញ្ញាតឱ្យមានវត្តមានមូលដ្ឋានយោធាបរទេសណាមួយនៅក្នុងទឹកដីកម្ពុជា ហើយជំហររបស់កម្ពុជា ស្វាគមន៍គ្រប់ប្រទេសមកធ្វើសមយុទ្ធយោធារួមគ្នា ក៏ដូចជាបង្កើនកិច្ចសហប្រតិបត្តិការដែលផ្តល់ផលប្រយោជន៍ទៅវិញទៅមកនៅមូលដ្ឋានកងទ័ពជើងទឹករាម។
ក្រសួងការបរទេស នៅយប់ថ្ងៃទី៩ខែមិថុនាឆ្នាំ២០២០ បានចេញសេចក្តីជូនព័ត៌មាននៃកិច្ចពិភាក្សាការងារតាមទូរស័ព្ទរវាងឯកឧត្ដម ប្រាក់ សុខុន ឧបនាយករដ្ឋមន្ដ្រី រដ្ឋមន្ដ្រីការបរទេសនិងសហប្រតិបត្តិការអន្តរជាតិ ជាមួយ លោកជំទាវ ម៉ារីស ផេន រដ្ឋមន្ត្រីការបរទេសនិងជារដ្ឋមន្ត្រីកិច្ចការនារីអូស្ត្រាលី។
យោងតាមសេចក្តីជូនព័ត៌មានក្រសួងការបរទេស បានឱ្យដឹងថា ក្នុងជំនួបពិភាក្សានេះលោកឧបនាយករដ្ឋមន្ត្រី ប្រាក់ សុខុន បានឆ្លៀតបញ្ជាក់ជូនលោកស្រីរដ្ឋមន្ត្រីការបរទេសអូស្ត្រាលីជាថ្មីនូវគោលការណ៍រដ្ឋធម្មនុញ្ញរបស់កម្ពុជាដែលមិនអនុញ្ញាតឱ្យមានវត្តមានមូលដ្ឋានយោធាបរទេសណាមួយនៅក្នុងទឹកដីកម្ពុជា។
លោកឧបនាយករដ្ឋមន្ត្រី ក៏បានលើកបង្ហាញពីពីជំហររបស់កម្ពុជា និងការបញ្ជាក់របស់សម្តេចតេជោ ហ៊ុន សែន នាយករដ្ឋមន្ត្រី អំពីការស្វាគមន៍គ្រប់ប្រទេសមកធ្វើសមយុទ្ធយោធារួមគ្នាក៏ដូចជាបង្កើនកិច្ចសហប្រតិបត្តិការដែលផ្តល់ផលប្រយោជន៍ទៅវិញទៅមកនៅមូលដ្ឋានកងទ័ពជើងទឹករាម។
ក្នុងជំនួបនេះឯកឧត្តម ប្រាក់ សុខុនក៏បានថ្លែងអំណរគុណអូស្ត្រាលីចំពោះការជួយយកអាសារគ្នាទៅវិញទៅមកដល់ប្រជាជននៃប្រទេសទាំងពីរ បន្ទាប់ពីការផ្ទុះឡើងនៃជំងឺរាតត្បាតជាសាកលកូវីដ-១៩ ហើយបានពិភាក្សាគ្នាអំពីការប្រតិបត្តិពហុភាគីនិយម ដើម្បីបង្កើនសាមគ្គីភាពនិងកិច្ចសហប្រតិបត្តិការក្នុងការប្រយុទ្ធប្រឆាំងនឹងជំងឺរាតត្បាតនេះ។ ឯកឧត្តមឧបនាយករដ្ឋមន្ត្រីក៏បានថ្លែងអំណរគុណចំពោះជំនួយហិរញ្ញវត្ថុ និងបច្ចេកទេសរបស់អូស្ត្រាលី នៅក្នុងវិស័យសុខាភិបាលនិងការប្រយុទ្ធប្រឆាំងជាមួយការផ្ទុះឡើងនៃជំងឺកូវីដ១៩ហើយនិងបានឯកភាពលើកកម្ពស់កិច្ចសហប្រតិបត្តិការបន្ថែមទៀត រវាងអាស៊ាននិងអូស្ត្រាលីលើការឆ្លើយតបនិងការព្យាបាលជំងឺកូវីដ១៩។
ឆ្លើយតបទៅនឹងចំណាប់អារម្មណ៍របស់លោកស្រី ម៉ារីស ផេន ក្នុងការលើកកម្ពស់កិច្ចសហប្រតិបត្តិការលើវិស័យកិច្ចការនារី, លោកឧបនាយករដ្ឋមន្ត្រីបានគូសបញ្ជាក់ថា ក្នុងគម្រោងរៀបចំព្រឹត្តិការណ៍ជាច្រើនកម្ពុជាមានគោលបំណងរៀបចំព្រឹត្តិការណ៍មួយស្តីពីស្ត្រី នៅក្នុងសន្តិភាព និងសន្តិសុខជាព្រឹត្តិការណ៍អមកិច្ចប្រជុំកំពូលអាស៊ី-អឺរ៉ុប លើកទី១៣ (ASEM 13) និងកិច្ចសហប្រតិបត្តិការផ្សេងៗទៀតដែលអាចធ្វើទៅបានក្នុងការលើកកម្ពស់អំណាចរបស់ស្ត្រី។
លោកឧបនាយករដ្ឋមន្ត្រី និងលោកស្រី ម៉ារីស ផេន បានផ្លាស់ប្តូរយោបល់លើបញ្ហាតំបន់មួយចំនួនទាក់ទងនឹងបញ្ហាសន្តិភាព សន្តិសុខ និងស្ថិរភាពក្នុងតំបន់ផងដែរ៕
ដោយ ៖ កូឡាប