ស្ទឹងត្រែង:កម្មករធ្វើការនៅក្រុមហ៊ុនអង្គរបាណាណាប្រមាណជាង៣០០នាក់ ផ្ទុះការតវ៉ារឿងប្រាក់ខែនិងទាមទាសិទ្ធិការងារ ក្រោយពីដោះដូរមេការក្រុមហ៊ុនធ្វើឲ្យ ពួកគាត់រងកៀបសង្កត់ពីមេការវៀតណាម។ក្រុមហ៊ុនចំណាយទុនខ្ទង់លានដុល្លារមួយនោះស្តិតក្នុងភូមិឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែងនៅព្រឹកទី ៩ ខែមិថុនាឆ្នាំ ២០២០។
កម្មករជាច្រើនរយនាក់មកឈរតវ៉ានៅមុខស្នាក់ការក្រុមហ៊ុន ស្នើឱ្យមន្ទីរបណ្តុះបណ្តាលការងារនិងវិជ្ជាជីវៈខេត្ត ចុះដោះស្រាយ។ករណីការងាររបស់កម្មករនៅក្នុងក្រុមក្រុមហ៊ុនផលិតចេកអំបូងនាំចេញទៅក្រៅប្រទេសនេះគ្រប់គ្រងមិនបានល្អក្រោយដូរមេការមកថ្មីហើយប្រើប្រាស់កម្មករមិនបានអនុវត្តតាមកិច្ចសន្យា។
លោកឈានសំណាងតំណាងឲ្យកម្មករស្នើ លោកប្រធានមន្ទីរបណ្តុះបណ្តាលការងារនិងវិជ្ជាជីវៈខេត្តពិនិត្យសកម្មភាពការងារកម្មករក្រោយពីដោះដូរមេការក្រុមហ៊ុនធ្វើឲ្យ ពួកគាត់រងកៀបសង្កត់ពីមេការវៀតណាម។ដូចជាការប្រើប្រាស់កម្មករមានអកប្បកិរិយាមើលងាយមកលើកម្មករប្រើពាក្យសម្តីមិនសមរម្យមកលើកម្មករនិងមិនគោរពតាមកិច្ចសន្យាឡើយ។
តំណាងកម្មករបន្តថា នេះជាមេការថ្មីចូលមកបំពេញការងារមិនទាន់បាន២ខែផង ហ៊ានប្រមាថមើលងាយ ហើយដកការងារមិនឱ្យកម្មករធ្វើតាមអំពើចិត្ត។ប្រាក់ខែបើកមិនទៀងទាត់និងហ៊ានជ្រើសរើសកម្មករថ្មីរបស់ខ្លួនចូលមកធ្វើការនិងផ្អាកការងារកម្មករចាស់ឱ្យធ្វើមួយថ្ងៃឈប់មួយថ្ងៃធ្វើឱ្យពួកគាត់បាត់បង់ប្រាក់ចំណូលសម្រាប់ដោះស្រាយជីវភាពប្រចាំថ្ងៃ។
លោក ប៊ួរ វិរុនប្រធានមន្ទីរបណ្តុះបណ្តាលការងារនិងវិជ្ជាជីវៈខេត្តស្ទឹងត្រែងបានសំណូមពរឱ្យកម្មករធ្វើការអត់ធ្មត់និងសូមឱ្យរំសាយការប្រមូលផ្តុំចេញពីមុខទីស្នាក់ការរបស់ក្រុមហ៊ុនដើម្បីទុកឱកាសឱ្យមន្ត្រីស្ថាប័នមានសមត្ថកិច្ចធ្វើការដោះស្រាយជូននៅថ្ងៃទី១០ខែមិថុនានេះដោយលើកហេតុផលថាមានការប្រជុំនៅសាលាខេត្ត។
លោកហ៊ វ៉ាងយុងមេការចំការចេកអង្គរបាណាណាបានចេញមុខមកសម្របសម្រួលជាមួយកម្មករ។តែការនិយាយសម្របសម្រួលនោះមិនដូចអ្វីដែលកម្មករចង់បាន៕
ដោយ៖សុខុម