តាកែវ៖ ដោយមើលឃើញពីផលប៉ះពាល់ដែលធ្វើឲ្យកម្មករកម្មការិនីមួយចំនួន នៅក្នុងយុទ្ធនាការប្រយុទ្ធប្រឆាំងនិងជំងឺកូវីដ១៩ នេះ ក្រុមហ៊ុនជីប ម៉ុង អ៊ិនស៊ីមែន បានចូលរួមសហការជាមួយនិងស្ថាប័នរដ្ឋ លើការងារជួយដល់សង្គម ចែកអំណោយមនុស្សធម៌ជួយដល់កម្មករ កម្មការិនីដែលទទួលរងនៅផលប៉ះពាល់ធ្ងន់ធ្ងរ ក្នុងអំឡុងពេលយុទ្ធនាការប្រយុទ្ធប្រឆាំងនិងជំងឺកូវីដ១៩ នៅក្នុងប្រទេសកម្ពុជា ហើយនៅព្រឹកថ្ងៃទី៩ ខែមិថុនា ឆ្នាំ២០២០នេះដែរ តំណាងក្រុមហ៊ុនជីប ម៉ុង រួមជាមួយអាជ្ញាធរក្រុងដូនកែវ បានសហការគ្នា ធ្វើការប្រមូលនៅបងប្អូនកម្មករកម្មការិនី ចំនួន ៧០គ្រួសារ ដែលកំពុងមានជីវភាពខ្វះខាត ដើម្បីធ្វើការចែកអំណោយជាគ្រឿងឧបភោគបរិភោគជូនដល់ពួកគាត់ ក្នុងការចូលរួមចំណែករំលែកនៅទុកលំបាករបស់បងប្អូនកម្មករ មួយចំនួនផងដែរ ។
នៅក្នុងពិធីចែកអំណោយនេះដែរ លោក កង អាណាន់ អភិបាលក្រុងដូនកែវ បានមានប្រសាសន៍ថា នេះជាការរួមចំណែកមួយជាមួយនិងរាជរដ្ឋាភិបាលរវាងស្ថាប័នឯកជន ឬក្រុមហ៊ុនមួយចំនួន ក្នុងស្រុក ដើម្បីរួមគ្នាប្រយុទ្ធប្រឆាំងនិងជំងឺកូវីដ១៩នេះ ។ លោកអភិបាលក្រុងបានបន្ត នៅពេលថ្មីនេះ កម្ពុជារបស់យើងបានធ្វើការព្យាបាលអ្នកជំងឺឆ្លងកូវីដ១៩ បានជាសះស្បើយជាច្រើននាក់ហើយ ក៏ប៉ុន្តែជំងឺនេះ នៅតែមានការគំរាមគំហែងខ្លាំងនៅលើបណ្តាប្រទេសជាច្រើននៅលើសកលោក មិនថាតែប្រទេសកម្ពុជាឡើយ ហើយក្នុងពេលថ្មីៗនេះសម្តេចតេជោហ៊ុនសែន បានមានប្រសាសន៍ក្រើនរំលឹកដល់បងប្អូនប្រជាពលរដ្ឋ នៅក្នុងប្រទេសទាំងអស់ មិនត្រូវឆ្វេសប្រហែសនៅជំងឺឆ្លងកូវីដ១៩នេះទេ ព្រោះវាអាចនិងផ្ទុះឡើងវិញ បើសិនជាពួកយើងទាំងអស់គ្នា មិនមានការប្រុងប្រយ័ត្នទៅលើការការពារ ស្របតាមគោលការណ៍ណែនាំរបស់ក្រសួងសុខាភិបាល ៕ដោយ៖តាកែវ
