តាកែវ៖ប្រជាពលរដ្ឋនៅក្នុងខេត្តតាកែវ រង់ចាំមើលចំណាត់ការរបស់អាជ្ញាធរខេត្តតាកែវ ដែលចេញលិខិតឲ្យផ្ទះមួយខ្នង ដែលមិនគោរពតាមការណែនាំរបស់អាជ្ញាធរក្រុងដូនកែវ សាងសង់រំលោភយកដីចំណីបឹងតាកែវ នៅជាប់ប្រឡាយលេខ១៥ ស្ថិតនៅភូមិពីរ សង្កាត់រកាក្នុង ក្រុងដូនកែវ ខេត្តតាកែវ ។
លោក ប៉ាន ភារៈ អភិបាលរងក្រុងដូនកែវ បានប្រាប់ភ្នាក់ងារយើងឲ្យដឹងកាលពីថ្ងៃទី៩ ខែមិថុនានេះថា ឯកឧត្តម អ៊ូច ភា អភិបាលខេត្តតាកែវ បានចេញលិខិតបន្ទាន់មួយឲ្យម្ចាស់ផ្ទះមួយកន្លែង ដែលសាងសង់រំលោភយកដីចំណីបឹង ត្រូវរុះរើចេញជាបន្ទាន់ ខណៈដែលម្ចាស់ផ្ទះខាងលើបានធ្វើការសាងសង់សំណង់រឹងថ្មបេតុង រំលោភចូលក្នុងដីចំណីបឹងរបស់រដ្ឋ នៅជាប់ប្រឡាយលេខ១៥ ដែលជាបេនកំពុងទូកលើ មិនគោរពតាមការចុះហាមឃាត់របស់អាជ្ញាធរក្រុងដូនកែវអស់ជាច្រើនលើកច្រើនសា ។ លោកបន្តថា ក្រោយឯកឧត្តមអភិបាលខេត្ត ពិនិត្យលើការណីខាងលើនេះរួច ដែលម្ចាស់ផ្ទះខាងលើ ហាក់បីដូចជាមើលស្រាលលើការណែនាំរបស់អាជ្ញាធរ ហើយនៅតែហ៊ានបន្តសាងសង់ផ្ទះ ទាំងរំលោភបំពាន យកដីរបស់រដ្ឋ ទើបឯកឧត្តម អ៊ូច ភា បានចេញនៅលិខិតជូនដំណឹងបន្ទាន់មួយទៅកាន់ម្ចាស់ផ្ទះ ឲ្យធ្វើការរុះរើចេញក្នុងរយៈពេល ៧ថ្ងៃ ចំពោះសំណង់រឹងគ្មានច្បាប់អនុញ្ញាត ដែលបន្តល្មើសសាងសង់រំលោភយកទាំងបំពាន ជាមួយនិងការហាមឃាត់របស់អាជ្ញាធរក្រុង ហើយមកដល់ថ្ងៃទី ១០ ខែមិថុនា នេះជិតដល់ថ្ងៃដែលអាជ្ញាធរខេត្ត បានកំណត់ហើយ។
ប្រភពពីប្រជាពលរដ្ឋនៅក្នុងក្រុងដូនកែវ រង់ចាំមើលនៅចំណាត់ការរបស់ឯកឧត្តមអភិបាលខេត្តតាកែវ តើមានប្រសិទ្ធភាពឬយ៉ាងណាដែរ ខណៈដែលពលរដ្ឋនាំគ្នានិយាយថា ម្ចាស់គេហដ្ឋានខាងលើជាមន្ត្រីអាវុធហត្ថ និងមានមន្ត្រីធ្វើការនៅសាលាខេត្តតាកែវ ជាអ្នកចាំជួយរត់ការលើការងារសាងសង់នេះថែមទៀត ៕
ដោយ៖ តាកែវ