ប្រទេសចិនបានប្រាប់ដល់និស្សិតរបស់ខ្លួន ឲ្យពិចារណាពីហានិភ័យ នៃសិក្សានៅក្នុងប្រទេសអូស្ត្រាលី អំឡុងពេលមានការរាតត្បាតវីរុសកូរ៉ូណា ដែលការព្រមាននេះ រឹតតែធ្វើឲ្យមានជម្លោះនយោបាយ រវាងប្រទេសទាំងពីរកាន់តែខ្លាំងឡើង។
ក្រសួងអប់រំចិន បានចេញសេចក្តីណែនាំនេះ ទៅនិស្សិតរបស់ខ្លួន កាលពីថ្ងៃអង្គារម្សិលមិញនេះ មុនពេលសកលវិទ្យាល័យ នៅអូស្ត្រាលី បើកដំណើរការវិញក្នុងខែកក្កដា។
ក្រសួងចិន បានលើកឡើងពីការគំរាមកំហែងរបស់វីរុសកូរ៉ូណា និងការរើសអើងប្រឆាំងជនជាតិអាស៊ី ដែលជាហានិភ័យអាចកើតមានឡើង។
នៅក្នុងសេចក្តីប្រកាស ក្រសួងបាននិយាយថា និស្សិតទាំងអស់គួរប្រុងប្រយ័ត្ន នៅពេលជ្រើសរើស ឬត្រឡប់ទៅកាន់ប្រទេសអូស្ត្រាលីវិញ។
“ការរីករាលដាលនៃវីរុសកូរ៉ូណាជុំវិញពិភពលោក មិនទាន់ត្រូវបានគ្រប់គ្រងបានឡើយ ហើយវាមានហានិភ័យ ក្នុងការធ្វើដំណើរជាអន្តរជាតិ និងនៅទីធ្លាសាលា។ ក្នុងអំឡុងពេលរាតត្បាត មានការរើសអើងជាច្រើនប្រឆាំងនឹងជនជាតិអាស៊ី នៅក្នុងប្រទេសអូស្ត្រាលី”។
សូមបញ្ជាក់ថា អូស្ត្រាលីមានអ្នកឆ្លងវីរុសកូរ៉ូណាសរុបចំនួន ៧.២៦៥នាក់ និងស្លាប់ ១០២នាក់។ អ្នកជាសះស្បើយមាន ៦.៧២០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
