ភ្នំពេញ៖ ផ្សិតប៉ក់ ឬផ្សិតផូងផាំង ជាប្រភេទផ្សិតភ្នំធម្មជាតិ ដ៏មានរសជាតិឆ្ងាញ់ កំពុងមានទីផ្សារ និងលក់បានតម្លៃថ្លៃ។ អ្នករុករកផ្សិតប៉ក់ម្នាក់បានឱ្យដឹងថា គាត់អាចរកចំណូលពីផ្សិតប៉ក់នេះ ក្នុងមួយថ្ងៃ ចាប់ពី១៥ម៉ឺនរៀល ទៅ ៣៥ម៉ឺនរៀល ហើយថ្ងៃខ្លះ លើសនេះក៏មាន ចំណែកតម្លៃលក់ឱ្យឈ្មួញកណ្តាល គឺចាប់ពី ៣៥.០០០រៀល ឡើងទៅ ក្នុង១គីឡូក្រាម។ តែតម្លៃនេះទាបជាងឆ្នាំមុន ដោយឆ្នាំមុនៗ លក់បានរហូតដល់ ៥ម៉ឺនរៀលឡើងក្នុង១គីឡូក្រាម។
ផ្សិតប៉ក់ ជាប្រភេទផ្សិតភ្នំម្យ៉ាង ដែលសំបូរនៅស្រុកពីរតែប៉ុណ្ណោះ គឺស្រុកភ្នំក្រវាញ និងស្រុកវាលវែង ក្នុងទឹកដីខេត្តពោធិ៍សាត់។ផ្សិតប្រភេទនេះ កើតចេញពីផេះផង់ នៃភ្លើងឆេះព្រៃកន្លងមក លុះត្រូវបានការស្រោចស្រពដោយដំណក់ទឹកភ្លៀង ក៏កើតចេញជាផ្សិតនេះឡើង ហើយផ្សិតប្រភេទនេះ គឺខុសពីផ្សិតធម្មតា ត្រង់វាដុះនៅក្នុងដី ដែលមានរាងមូលដូចពងក្រួច ហើយគេអាចសម្គាល់បានដោយឃើញមានដីពើងប្រះឡើងលើ នៅតំបន់ដែលធ្លាប់មានភ្លើងឆេះព្រៃកន្លងមក។
ដោយឡែកក្រុមឈ្មួញកណ្តាល បានចំណាយលុយទិញផ្សិតប្រភេទនេះ ចាប់ពី ២០លានរៀល ទៅ ៣០លានរៀល ក្នុងមួយថ្ងៃ អ្នកខ្លះទិញយកទៅលក់បន្តឱ្យម៉ូយមកពីស្រុកភ្នំក្រវាញ អ្នកខ្លះទៀត ទិញយកទៅលក់ផ្ទាល់នៅច្រកព្រំប្រទល់ខ្មែរ-ថៃ ក្នុងខេត្តប៉ៃលិន, បន្ទាយមានជ័យ, ព្រះវិហារជាដើម។
ក្រុមឈ្មួញបានឲ្យដឹងថា ពួកគេ តែងតែនាំចេញទៅលក់នៅប្រទេសថៃ ព្រោះផ្សិតប៉ក់លក់បានតម្លៃខ្ពស់ មានតែលក់ឱ្យប្រទេសថៃទេ មានប៉ុន្មានគេទទួលទិញយកទាំងអស់ ប៉ុន្តែពួកគាត់មិនបានដឹងថា គេយកទៅធ្វើជាអ្វីបន្តទៀតទេ។ ក៏ប៉ុន្តែជាធម្មតា បងប្អូនប្រជាពលរដ្ឋខ្មែរ និយមយកផ្សិតប៉ក់ ឫផ្សតិផូងផាំងនេះ មកស្ងោ ឬឆា ក៏បាន ដោយវាមានរសជាតិឆ្ងាញ់ខុសប្លែកពីផ្សិតប្រភេទផ្សេងៗទៀត។
គួរបញ្ជាក់ថា ផ្សិតប៉ក់ ឫផ្សតិផូងផាំងនេះ ច្រើនតែដុះក្នុងដី ហើយមួយកន្លែងៗ មានយ៉ាងតិចចាប់ពីកន្លះគីឡូក្រាមឡើងទៅ ហើយមានខ្លះធំរហូតប៉ុនមេដៃ និងខ្លះមេជើង៕
ដោយ៖សម្ផស្ស
