ខេត្តកោះកុង៖ រសៀលថ្ងៃសុក្រ ទី២៦ ខែមករា ឆ្នាំ២០១៨ សាលាដំបូងខេត្តកោះកុង បានសម្រេចផ្ដន្ទាទោស លើអតីតសកម្មជនអង្គការមាតាធម្មជាតិចំនួន ២នាក់ ពីបទញុះញង់ និងបទរំលោភសិទ្ធិបុគ្គល ហើយត្រូវសាលាដំបូងខេត្តនេះ សម្រេចផ្ដន្ទាទោស ឱ្យយុវជនទាំង ២នាក់ ជាប់ពន្ធនាគារយៈពេល ១ឆ្នាំ ប៉ុន្តែត្រូវអនុវត្តទោសក្នុងពន្ធនាគាររយៈពេល ៥ខែ និង ៧ខែទៀត នៃទោសត្រូវបានព្យួរ។ យុវជនទាំង ២នាក់ ក៏ត្រូវតុលាការពិន័យជាប្រាក់ម្នាក់ៗ ចំនួនមួយលានរៀលផងដែរ។
លោក ឌឹម គុនឌី និង លោក ហ៊ុន វណ្ណះ ត្រូវបានផ្ដន្ទាទោសផ្អែកតាមមាត្រា ៤៩៥ នៃក្រមព្រហ្មទណ្ឌ ស្ដីពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងមាត្រា ៣០២ ដែលចែងពីអំពើថតរូបភាព នៃបុគ្គលនៅក្នុងទីកន្លែងឯកជនដោយគ្មានការព្រមព្រៀង។
ការប្រកាសសាលក្រមលើការផ្ដន្ទាទោសនេះ ធ្វើឡើងដោយ លោកចៅក្រម កែវ សុខា បន្ទាប់ពីសវនាការ កាលពីម្សិលមិញ។
ការផ្តន្ទាទោសនេះ ទោះបីជាភាគីជាប់ចោទ បានអះអាងថា មិនមានភ័ស្ដុតាងគ្រប់គ្រាន់ក្នុងការផ្ដន្ទាទោសលើយុវជនទាំង ២ ពីបទញុះញង់និងរំលោភលើសិទ្ធិបុគ្គល នៃក្រុមហ៊ុន លី យ៉ុងផាត់ ដែលជាដើមបណ្ដឹងក្នុងរឿងក្ដីនេះបែបណាក្តី។
មុនពេលមានការចាប់ខ្លួន និងឃុំខ្លួន យុវជនទាំង ២ កាលពីថ្ងៃទី១២ ខែកញ្ញា ឆ្នាំ២០១៧ សកម្មជនទាំង ២នាក់ បានថតសកម្មភាពកប៉ាល់ ដែលពួកគេ បានសង្ស័យថា ជាប់ពាក់ព័ន្ធនឹងសកម្មភាពបូមខ្សាច់ខុសច្បាប់នៅក្នុងលំហរសមុទ្រ។
យោងតាមច្បាប់កម្ពុជា ការថតរូប ឬវីដេអូអាចចាត់ទុកថាខុសច្បាប់ លុះត្រាតែការថតនោះមានជាប់រូបបុគ្គលណាម្នាក់នៅទីកន្លែងឯកជនដោយគ្មានការព្រមព្រៀងពីបុគ្គលនោះ។
លោក ឌឹម គុនឌី និងលោក ហ៊ុន វណ្ណៈ ត្រូវបានអង្គការលើកលែងទោសអន្តរជាតិ (Amnesty International) ទទួលស្គាល់ថា ជាអ្នកទោសមនសិការ ដោយសារអ្នកទាំង ២នាក់ ត្រូវបានឃុំខ្លួនបណ្ដោះអាសន្នរង់ចាំសវនាការ តាំងពីថ្ងៃចាប់ខ្លួន។
យុវជនទាំង ២នាក់ គេរំពឹងថា នឹងត្រូវដោះលែង ឱ្យមានសេរីភាពវិញនៅប៉ុន្មានសប្ដាហ៍ខាងមុខនេះ៕ ដោយ៖ លីកាដូ