ភ្នំពេញ៖ ទង្វើរនៃសកម្មភាពរបស់ប្តីថៅកែហាង ធារ៉ា ដែលផ្ទុះកំហឹងរឿងប្តីប្រពន្ធខ្លួន បែរយកចានគប់ទៅលើកូនឈ្នួលត្រូវចំមុខពេញមួយទំហឹង រួចយកជើងទាត់ធាក់បន្ថែមទៀត បន្ទាប់ចូលទៅទៅជួយឃាត់ បានកំពុងធ្វើឲ្យមហាជនស្អប់ខ្ពើមយ៉ាងខ្លាំង និងថែមទាំងជំរុញឲ្យសមត្ថកិច្ចចាប់ដាក់គុកទៀតផង។
តាមរយៈវីដេអូកាមេរ៉ាសុវត្ថិភាព ហេតុការណ៍ដ៏សាហាវនេះ បានកើតឡើងនៅហាងធារ៉ា ផ្លូវ១០៨ កែងផ្លូវ៥១ ទល់មុខទីលានប្រជាធិតេយ្យ ខណ្ឌដូនពេញ វេលាម៉ោងជិត១២យប់ កាលពីថ្ងៃទី០៦ ខែមិថុនា ឆ្នាំ២០២០។
នៅក្នុងវីដេអូបានបង្ហាញឲ្យឃើញ ដំបូងឡើយ ខណៈស្ត្រីជាប្រពន្ធ និងកូនៗឈ្នួល កំពុងរៀបចំអាហារជូនអតិថិជន នៅពេលនោះ ស្រាប់តែបុរសជាប្តីនោះ មិនដឹងដើរមកពីណា ចូលមកទាញចាន កែវ បោកលើតុ និងលើដីយ៉ាងសន្ធាប់តែម្តង ។ ក្រោយពីបានឃើញថៅប្រុសរូបនេះបោកបំផ្លាញរបស់ទ្រព្យដ៏សាហាវ និងបារម្ភពីសុវត្ថិភាពថៅកែស្រី ភ្លាមៗនោះ បុរសជាកូនឈ្នួល២នាក់ក៏បានចូលមកឃាត់។ ទោះយ៉ាងណា ម្នាក់ក្នុងចំណោមកូនឈ្នួលទាំងពីរ ត្រូវថៅកែគប់ចានត្រូវចំមុខពេញទំហឹង បណ្តាលឲ្យដេកដួលទៅនឹងដីភ្លាមៗតែម្តង។ មិនត្រឹមតែប៉ុណ្ណឹង ថៅកែចិត្តសាហាវព្រៃផ្សៃរូបនេះ ក៏បានប្រើជើងទាត់ធាក់ទៅលើជនរងគ្រោះបន្ថែម ដោយបានចង្អុល និងបោះពាក្យសម្តីថា កុំចេះដឹងរឿងប្តីប្រពន្ធអាញ់។
យ៉ាងណាមិញ ក្រោយពីបានឃើញហេតុការណ៍នេះ ពិតជាតក់ស្លុតពេក និងពិសេសអាណិតអាសូរទៅដល់បុរសជាកូនឈ្នួលដែលពុំដឹងអ្វីសោះ បែរត្រូវរងរបួសធ្ងន់ធ្ងរបែបនេះ ឯកឧត្តម ហ៊ុន ជា បានបង្ហោះសារលើហ្វេសបុកទាំងកំហឹងឈឺចាប់ និងចង់ជួយដល់ជនរងគ្រោះ ដោយឯកឧត្តមបានសរសេរយ៉ាងដូច្នេះថា៖ «មានម៉ានលុយហ្ហា មើលងាយគេខ្លាំងណាស់មិនបាច់យកសំណងពីវាទេ ឲ្យចូលគុកទៅ អ្នករងគ្រោះសូមឆាតមកខ្ញុំផង ខ្ញុំជួយ»៕ ដោយ៖ លឹម ហុង