តាកែវ៖ ឯកឧត្តមបណ្ឌិត អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ និងឯកឧត្តម អ៊ូច ភា អភិបាលខេត្តតាកែវ បានបើកការដ្ឋានស្ថាបនាផ្លូវលំជនបទ ក្រោមក្របខណ្ឌគម្រោងសាច់ប្រាក់ពលកម្មសម្រាប់អភិវឌ្ឍន៍ជនបទ និងគាំទ្រកសិករ ស្ថិតនៅភូមិព្រៃឈើទាល ឃុំតាភេម ស្រុកត្រាំកក់ ខេត្តតាកែវ នាព្រឹកថ្ងៃទី ១០ ខែមិថុនា ឆ្នាំ២០២០។
សូមបញ្ជាក់ថា គម្រោងសាច់ប្រាក់ពលកម្មសម្រាប់អភិវឌ្ឍន៍ជនបទ និងគាំទ្រកសិករ ជាគម្រោងដែលទទួលហិរញ្ញប្បទានផ្ទាល់ពីរាជរដ្ឋាភិបាលកម្ពុជា ក្នុងគោលបំណងចូលរួមកាត់បន្ថយភាពក្រីក្រ លើកកម្ពស់ជីវភាព និងសុខមាលភាពរស់នៅរបស់ប្រជាជនជនបទ និងប្រជាកសិករ ដែលត្រូវធ្វើឡើងតាមរយៈ ការបង្កើតឱកាសការងាររយៈពេលខ្លីតាមកម្មវិធីសាច់ប្រាក់ពលកម្មដែលនឹងជួយដោះស្រាយជីវភាពបន្ទាន់ក្នុងរយៈពេលខ្លីផង និងបង្កើតជាទុនសម្រាប់ការវិនិយោគបន្តលើរបរកសិកម្ម ឫមុខរបរសមស្របដ៏ទៃទៀតផងដែរ និងការអភិវឌ្ឍន៍ហេដ្ឋារចនាសម្ព័ន្ធផ្លូវជនបទ និងលូបង្ហូទឹកក្នុងតំបន់ទីប្រជុំជន។
បើតាមការបញ្ជាក់ពីលោក លីវ សំណាង ប្រធានមន្ទីរអភិវឌ្ឍន៍បទខេត្តតាកែវ បានឲ្យដឹងថា ការស្ថាបនាផ្លូវកសាងឡើងដោយកំលាំងពលកម្ម របស់បងប្អូនប្រជាពលរដ្ឋ ចំនួន ១៣ អនុគម្រោង មានប្រវែង ១៣,៤០១ គីឡូម៉ែត្រ ស្ថិតនៅឃុំតាភេម ឃុំជាងទង ឃុំអូសារាយ ឃុំត្រពាំងក្រញូង ឃុំត្រពាំងធំខាងជើង ឃុំសំរោង ក្នុងស្រុកត្រាំកក់ ខេត្តតាកែវ។ លោកបន្តថាកាលពី ឆ្នាំ២០១៧ ដល់ឆ្នាំ២០១៩ អនុវត្តចំនួន៤២អនុគម្រោងដីស ប្រវែង ៤៨,៦៧៥គីឡូម៉ែត្រ ស្ថិតនៅឃុំ តាភេម ឃុំត្រពាំងធំខាងជើង ឃុំត្រពាំងធំខាងត្បូង ឃុំជាងទង ឃុំអូរសារាយ ឃុំត្រពាំងក្រញូង ឃុំសំរោង ឃុំគុស។ សរុបចាប់ពីឆ្នាំ ២០១៧ ដល់ឆ្នាំ២០២០ មានចំនួន ៥៥ខ្សែប្រវែង ៦២,០៧៦គីឡូម៉ែត្រ ចំនួន៨ឃុំនៅស្រុកត្រាំកក់ ខេត្តតាកែវ ៕
ដោយ៖តាកែវ