បាត់ដំបង៖កសិករក្នុងខេត្តបាត់ដំបងប្រញាប់ប្រញាលធ្វើស្រែ បានមានសន្ទុះលឿនជាងឆ្នាំមុនៗកន្លងទៅ ទោះបីនៅដើមរដូវវស្សារ មានសភាពយឺតយ៉ាវបន្តិច ក្នុងការបង្កបង្កើនដំណាំស្រូវ ប៉ុន្តែមានភ្លៀងធ្លាក់ផ្ទួនៗរយៈពេលប៉ុន្មានថ្ងៃនៅចុងក្នុងខែឧសភានិងដើមខែមិថុនាឆ្នាំ២០២០នេះ។
លោក ឈឹម វជ្ជរ៉ា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តបាត់ដំបង បានប្រាប់ឲ្យដឹងតាមទូរស័ព្ទថា គិតត្រឹមថ្ងៃទី៩ខែមិថុនាឆ្នាំ២០២០ ដោយមានការជំរុញបន្ថែមពីមន្ត្រីកសិកម្ម ធ្វើឲ្យការចាប់ផ្ដើមធ្វើស្រែរបស់កសិករនៅខេត្តបាត់ដំបង សម្រេចបានប្រមាណ ២៧ភាគរយ ស្មើនឹងលើផ្ទៃដីជាង ៨ម៉ឺនហិកតា ក្នុងនោះមានប្រភេទស្រូវស្រាល ស្រូវកណ្ដាលនិងស្រូវឡើងទឹក ដែលការធ្វើស្រែនៅដើមរដូវនេះមានលឿនជាងឆ្នាំមុនៗកន្លងទៅ ។ទោះបីកសិករធ្វើស្រែបានលឿនមែន ប៉ុន្តែគិតត្រឹមរយៈពេលដូចគ្នា បរិមាណទឹកភ្លៀងនៅឆ្នាំ២០២០នេះ មានការថយចុះជាងឆ្នាំមុនដល់ទៅជាង ១០០មិលី្លម៉ែត្រ ព្រោះតែភ្លៀងធ្លាក់មិនទាន់បានរាយប៉ាយបានល្អ នៅគ្រប់ទីកន្លែងនៃខេត្តបាត់ដំបង។
យោងតាមរបាយការណ៍របស់មន្ទីរកសិកម្មខេត្តបាត់ដំបង បានបង្ហាញថានៅឆ្នាំ២០១៩ ការដាំដុះដំណាំស្រូវនៅខេត្តបាត់ដំបង សរុបមានចំនួន ៣៦៦ ៣៥៧ហិកតា ស្មើនឹង១១៤,៤៩ភាគរយ នៃផែនការ។ រីឯការដាំដុះដំណាំរួមផ្សំនិងឧស្សាហកម្មបានចំនួន ២៣៧ ៥០៤ហិកតា ស្មើនឹង ១១៣,១០ភាគរយ នៃផែនការ។
គួរបញ្ជាក់ថា បើតាមការព្យាករណ៍របស់ក្រសួងធនធានទឹកនិងឧតុនិយម កាលពីថ្ងៃទី៩ខែមិថុនាឆ្នាំ២០២០ បានឲ្យដឹងថា ចាប់ពីថ្ងៃទី១០ ដល់១៦ ខែមិថុនា ឆ្នាំ២០២០ នៅតំបន់ទំនាប់កណ្ដាល ដែលមានខេត្តបាត់ដំបងផងនោះនឹងមានភ្លៀងធ្លាក់ពីកម្រិតមធ្យមទៅច្រើន ហើយក៏មានបាតុភូតខ្យល់កន្ត្រាក់ ផ្គរ រន្ទះ ដែលអាចកើតមានជាយថាហេតុ ដោយបញ្ហានេះ ក្រសួងក៏បានអំពាវនាវដល់ពលរដ្ឋឲ្យមានការប្រុងប្រយ័ត្នផងដែរ៕
ដោយ៖អ៊ុងសារុំ