ស្ទឹងត្រែង៖ សមត្ថកិច្ចនគរបាលប្រឆាំងគ្រឿងញៀនខេត្តស្ទឹងត្រែង ឃាត់ខ្លួនជាបន្តបន្ទាប់ពាក់ព័ន្ធករណីរក្សាទុក ជួញដូរនិងប្រើប្រាស់ដោយខុសច្បាប់នូវសារធាតុញៀន។ ការចុះបង្ក្រាបនៅភូមិកាំងមេម៉ាយ សង្កាត់ព្រះបាទ ក្រុងស្ទឹងត្រែង កាលពីថ្ងៃទី 9 ខែមិថុនាឆ្នាំ 2020។
មន្ត្រីនគរបាលការិយាល័យប្រឆាំងគ្រឿងញៀន នៃស្នងការដ្ឋានខេត្តស្ទឹងត្រែង បានប្រាប់ឲ្យដឹងថា ដោយមានការអនុញ្ញាតពីលោកជេត ខេមរា ព្រះរាជអាជ្ញាអមសាលាដំបូងខេត្តស្ទឹងត្រែង សមត្ថកិច្ចបានប្រើវិធី ដើម្បីឈានដល់ការឃាត់ខ្លួន។
ជនសង្ស័យដែលត្រូវឃាត់ខ្លួនទី១ ឈ្មោះយឹម សំណាង ភេទប្រុសអាយុ៣២ឆ្នាំមានមុខរបរ ជាកម្មកររស់នៅភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង។ ទី២ ឈ្មោះផាត់ សារ៉ាក់ ភេទស្រីអាយុ៣៧ឆ្នាំ មុខរបរមិនពិតប្រាកដ រស់នៅភូមិកាំងមេម៉ាយ សង្កាត់ព្រះបាទ ក្រុងស្ទឹងត្រែង។ ទី៣ ឈ្មោះយ៉ែម មេត្រី ហៅជ័យ ភេទប្រុសអាយុ៣២ឆ្នាំ មុខរបបមិនពិតប្រាកដ រស់នៅភូមិព្រែក សង្កាត់ស្ទឹងត្រែង ក្រុងស្ទឹងត្រែង។
ទី៤ឈ្មោះម៉ាក់ រ៉ាម៉េត ភេទប្រុសអាយុ៣៣ឆ្នាំ មុខរបរជាកសិករ រស់នៅភូមិកោះខនឌិន សង្កាត់សាមគ្គី ក្រុងស្ទឹងត្រែង។ ទី៥ ឈ្មោះម៉ាក់ បូរ៉ាន ភេទប្រុសអាយុ១៩ឆ្នាំ ជាកសិកររស់នៅភូមិកោះខនឌិន សង្កាត់សាមគ្គី ក្រុងស្ទឹងត្រែង។
បន្ទាប់ពីសមត្ថកិច្ចធ្វើការឃាត់ខ្លួនមុខសញ្ញាពាក់ព័ន្ធគ្រឿងញៀន នៅកន្លែងផ្សេងគ្នាមក និងបានដកហូតវត្ថុតាងថ្នាំញៀន ប្រភេទមេតំហ្វេតាមីនក្រាមពណ៌សថ្លា(ICE)ចំនួន 23 កញ្ចប់តូច(6 កញ្ចប់ធំនិង 5 កញ្ចប់តូច) ទម្ងន់សរុប២១,៩៤ក្រាម។ ករណីនេះសមត្ថកិច្ចបានរៀបចំសំណុំរឿង បញ្ជូនទៅសាលាដំបូងខេត្តនៅថ្ងៃទី១០ ខែមិថុនា ឆ្នាំ២០២០៕
ដោយ៖សុខុម
