តាកែវ៖ ស្នងការនគរបាលខេត្តតាកែវ បានជំរុញឲ្យអធិការនគរបាលស្រុកថ្មី ត្រូវតែបន្តផ្តល់សេវាសាធារណៈ ជូនដល់បងប្អូនប្រជាពលរដ្ឋនៅមូលដ្ឋាន ឲ្យបានលឿននិងរហ័ស ជាពិសេសត្រូវបន្ថែមកម្លាំងចុះយាម និងល្បាតនៅតាមគោលដៅទីប្រជុំជននានាក្នុងស្រុក ដើម្បីទុបស្កាត់ការកើតមានឡើង នៅអំពើចោរកម្ម ក្មេងទំនើងបងតូចបងធំ ជាការធានាឲ្យបានលើសុវត្ថិភាពភូមិឃុំ ។ ឯកឧត្តមឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បានថ្លែងក្នុងពិធីប្រកាសតែងតាំងមុខតំណែង លោក ឡេង ប៊ុនឡុង ជាអធិការនគរបាលស្រុកព្រៃកប្បាសថ្មីជំនួសលោក ជុំឈឿន អធិការស្រុកចាស់ ដែលឈរជើងនៅអធិការស្រុកបានជាង៣០ឆ្នាំត្រូវ ចូលនិវត្តន៍ កាលពីរសៀលថ្ងៃទី ១០ ខែមិថុនា ឆ្នាំ២០២០ ។
ឯកឧត្តមស្នងការបានបន្តថា មួយរយៈពេលកន្លងមក ប៉ុន្មានឆ្នាំដែលលោកមកកាន់មុខតំណែងជាស្នងការនគរបាលខេត្តតាកែវ លោកសង្កេតឃើញមានអធិការស្រុកពីររូប ដែលជាជើងចាស់ ច្បាស់លើបទពិសោធន៍ការងារ មានអធិការស្រុកបាទី និងអធិការស្រុកព្រៃកប្បាស ដែលពួកគាត់ទាំងពីសុទ្ធសឹងតែដល់អាយុចូលនិវត្តន៍ ដូច្នេះចំពោះអធិការថ្មី ត្រូវអនុវត្តតាមកិច្ចការងារអនុវត្តន៍ណាល្អៗ ពីអធិការចាស់ ដើម្បីធានានៅសុវត្ថិភាពជូនពលរដ្ឋ និងបង្ក្រាបរាល់បទល្មើស ដែលកើតមានឡើងនៅតាមមូលដ្ឋាន ហើយបើសិនជាមានការងារមួយចំនួន នៅមានការងឿងឆ្ងល់ អាចសុំយកបល់ពីអធិការចាស់ ដើម្បីអនុវត្តការងារនាពេលបច្ចុប្បន្នឲ្យទទួលបានជោគជ័យ ។
ជាមួយគ្នានេះដែរ លោកស្នងការក៏បានណែនាំបន្ថែម ដល់កម្លាំងនគរបាលទាំងអស់ ត្រូវចូលរួមសកម្មភាព និងអាជ្ញាធរមូលដ្ឋានលើការងាររួមគ្នា ប្រយុទ្ធប្រឆាំងនឹងជំងឺកូវីដ១៩ ខណៈដែលនៅក្នុងប្រទេសកម្ពុជា កំពុងតែមានការថមថយ ចុះចំពោះការកើតមានឡើង នៅជំងឺកូវីដ១៩នេះ ក៏ពិតមែន ក៏ប៉ុន្តែយើងនៅតែអនុវត្ត និងមានការប្រុងប្រយ័ត្នជានិច្ច ទៅលើការឆ្លងរីករាលដាល នៅក្នុងសហគមន៍ មួយវិញទៀត ត្រូវតែអនុវត្តវិធានការអនាម័យ ជាមួយនិងការណែនាំរបស់ក្រសួងសុខាភិបាល ៕
ដោយ៖តាកែវ
