សៀមរាប ៖ នាថ្ងៃទី១០ ខែមិថុនា ឆ្នាំ២០២០ ចាប់ពីវេលាម៉ោង៨និង២០នាទី រហូតដល់ម៉ោង៥និង២០នាទី កម្លាំងការិយាល័យបង្ការ ពន្លត់អគ្គិភ័យ និងសង្គ្រោះ បានចូលរួមសហការជាមួយរដ្ឋបាលស្រុកប្រាសាទបាគង និងអធិការដ្ឋាននគរបាលស្រុកប្រាសាទបាគង ដើម្បីរៀបចំបូមយកទឹកបង្ហូរបញ្ចូលទឹកកសិន្ធុវត្តបាគង ។
លោកឧត្តមសេនីយ៍ត្រី ភឹង សម្បត្តិ ស្នងការរង ទទួលការិយាល័យនគរបាលបង្ការ ពន្លត់អគ្គិភ័យ និង សង្គ្រោះ នៃស្នងការដ្ឋាននគរបាលខេត្តសៀមរាប មានប្រសាសន៍ថា ក្នុងនោះប្រើប្រាស់រថយន្តពន្លត់អគ្គិភ័យចំនួន ៦គ្រឿង ប្រើទឹកសរុបអស់ចំនួន២៤ ឡាន ក្នុងនោះមាន ៖ ១. រថយន្ដពន្លត់អគ្គិភ័យ ស្នងការដ្ឋាននគរបាលខេត្ត ចំនួន២ គ្រឿង ប្រើប្រាស់ទឹកអស់ ៦រថយន្ត ។ ២. រថយន្ដពន្លត់អគ្គិភ័យ អធិការដ្ឋាននគរបាលស្រុកប្រាសាទបាគង ចំនួន១គ្រឿង ប្រើប្រាស់ទឹកអស់ ៨រថយន្ត ។ ៣. រថយន្ដពន្លត់អគ្គិភ័យ កងរាជអាវុធហត្ថខេត្ត ចំនួន២គ្រឿងប្រើប្រាស់ទឹកអស់ ៧រថយន្ត និង៤. រថយន្ដពន្លត់អគ្គិភ័យ អាជ្ញាធរអប្សារា ចំនួន ១ គ្រឿងប្រើប្រាស់ទឹកអស់ ៣រថយន្ត ។
លោក សូរ ប្លាតុង អភិបាលស្រុកប្រាសាទបាគង បាននិយាយថា ក្រោមការជួយជំរុញគាំទ្រ និងយកចិត្តដាក់ខ្ពស់ ពីលោក ទៀ សីហា អភិបាលនៃគណៈអភិបាលខេត្តសៀមរាប ក្រុមការងារត្រូវបានចែកចេញជាបីក្រុម គឺក្រុម ទី១ ប្រើប្រាស់ រថយន្តពន្លត់អគ្គិភ័យដឹកទឹកចំនួន ៦គ្រឿង ក្នុងនោះមាន រថយន្តមកពីស្នងការដ្ឋាននគរបាលខេត្តសៀមរាប ២គ្រឿង ទីបញ្ជាការកងរាជអាវុធហត្ថខេត្តសៀមរាប ២គ្រឿង អធិការនគរបាលស្រុកប្រាសាទបាគង ១គ្រឿង និងរថយន្តរបស់អាជ្ញាធរជាតិអប្សរា ១គ្រឿង ដឹកទឹកយកមកបូមបញ្ចូលក្នុងកសិន្ធុដើម្បីសង្គ្រោះត្រីជំហានដំបូង បានចំនួន ១៨ឡាន ។ ក្រុមទី២ អនុវត្តដោយក្រុមការងារ អាជ្ញាធរជាតិអប្សរា កំពុងបុកអណ្តូងបានជម្រៅ ប្រមាណ៣០ម៉ែត្រហើយ កំពុងត្រៀមបូមចេញ ។ ក្រុមទី៣ ជាក្រុមជីកស្រះដោយដៃ ក្នុងកសិន្ធុនេះ មានការងារអាជ្ញាធរជាតិអប្សរា មន្ត្រីសាលាស្រុក និងបងប្អូនប្រជាពលរដ្ឋ ស្មគ្រ័ចិត្តចូលរួម ព្រោះគ្រឿងចក្រមិនអាចចូលធ្វើការបាន ដើម្បីត្រៀមផ្ទេរត្រីដែលនៅសេសសល់ ចូលមកកន្លែងថ្មីនេះ ។
លោក សូរ ប្លាតុង បានបញ្ជាក់ថា នៅព្រឹកថ្ងៃទី១១ខែមិថុនាឆ្នាំ២០២០នេះ កម្លាំងគណៈបញ្ចាការឯកភាពស្រុក ប្រមាណ១៣០នាក់ និងបញ្ជូនទៅបន្ថែមសំរាប់ចូលរួម ក្នុងការជួយជីកស្រះបន្ត។
តាមការសង្កេតបន្ទាប់ពីយើងបានបូមទឹកចូលក្នុងកសិណ ហើយត្រីជាច្រើន ដែលនៅសេសសល់ បានចាប់ផ្តើមហែលទឹកផ្លាស់ប្តូរទីតាំង ដែលអាចឲ្យយើងសន្និដ្ឋានបាន ថាយើងនៅមានឱកាសច្រើន សម្រាប់កិច្ចការងារជួយសង្គ្រោះត្រីទាំងនេះបានផងដែរ។ កសិន្ធុនេះ បានរីងទឹកអស់ បណ្តាលឲ្យត្រីប្រាធំៗជាង១០ក្បាល បានងាប់ ហើយគណៈកម្មការវត្ត បានត្រីទៅកប់ ចំណែកត្រីធំៗមួយចំនួនទៀត ត្រូវបានយកចេញទៅលែងនៅទីតាំងផ្សេង ដើម្បីសង្គ្រោះជីវិត៕
ដោយ៖កូឡាប