គណនីហ្វេសប៊ុកមួយឈ្មោះ Mesh បានបង្ហោះវីដេអូបង្ហាញទិដ្ឋភាពស្ត្រីម៉ាឡេស៊ីវ័យក្មេងម្នាក់ ត្រូវបានជួយសង្គ្រោះជីវិតដោយបុរសឥណ្ឌាមានទឹកចិត្តល្អៗ២នាក់ ខណៈឃើញស្ត្រីនោះកំពុងប៉ុនប៉ងលោតសម្លាប់ខ្លួនពីលើស្ពាន។
គាត់បានសរសេរថា៖ «នេះជារឿងមួយដែលបុរសឥណ្ឌាចុះពីឡាន ហើយជួយសង្គ្រោះស្ត្រីម៉ាឡេម្នាក់ពីការលោតចុះពីលើស្ពាន។ មិនមែនប្រជាជនឥណ្ឌាទាំងអស់សុទ្ធតែជាមនុស្សប្រមឹកទេ។ វីរបុរសពិតប្រាកដមួយចំនួននៅតែមាននៅទីនេះ។»
នៅក្នុងវីដេអូ ស្ត្រីម្នាក់អាចត្រូវបានគេមើលឃើញអង្គុយនៅលើបង្កាន់ដៃស្ពានគួរឲ្យរន្ធត់។ បន្ទាប់មក គេក៏បានឃើរថយន្ត២បាំងកន្លះពណ៌ទឹកក្រូច១គ្រឿង បានបើកថយក្រោយ មកឈប់អែប ខណៈបុរសម្នាក់បានចុះដើរសំដៅមកកាន់នាង។ ប៉ុន្តែ គាត់ពុំទាន់បង្ហាញកាយវិការសង្គ្រោះនាងទេ។
បន្ទាប់មក បុរសម្នាក់ទៀតនៅក្នុងរថយន្ត ក៏បានចុះ និងដើរឈ្លបពីខាងក្រោយ ស្រវ៉ាចាប់ក្រសោបនាងយ៉ាងតឹង រួចទាញចេញពីលើបង្កាន់ដៃស្ពានដោយសុវត្ថិភាព។
បុរសឥណ្ឌាទាំងពីរ បានរង់ចាំនៅកន្លែងកើតហេតុ រហូតទាល់តែប៉ូលិសមកដល់ ដើម្បីធានាថា នាងនឹងមានសុវត្ថិភាព និងចាកចេញឆ្ងាយពីកន្លែងលោតធ្វើអត្តឃាតនេះ។ ជាមួយគ្នានេះផងដែរ ជនជាតិម៉ាឡេស៊ី ក៏បានសម្តែងនូវការថ្លែងអំណរគុណយ៉ាងខ្លាំង ចំពោះបុរសឥណ្ឌាទាំងពីរ មានទឹកចិត្តយកចិត្តទុកដាក់ និងភាពក្លាហានរបស់ពួកគេ សម្រាប់ហេតុការណ៍ជួយសង្គ្រោះស្ត្រីម្នាក់៕
ប្រែសម្រួល៖ លឹម ហុង (ប្រភព៖ worldofbuzz)