តាកែវ៖ ឯកឧត្តម អ៊ូច ភា អភិបាលខេត្តតាកែវ បានធ្វើការណែនាំនិងជំរុញទៅលោកប្រធានមន្ទីរសាធារណការ និងដឹកជញ្ជូនខេត្ត នឹងលោកប្រធានមន្ទីរវប្បធម៌ និងវិចិត្រសិល្បៈខេត្ត ត្រូវសហការគ្នាក្នុងការរៀបចំកែលម្អក្បូរក្បាច់ និងលាបពណ៌ឡើងវិញ ឲ្យសមនឹងរូបសំណាកព្រះវិស្ណុ ដែលជានិមិត្តរូបរបស់ខេត្តតាកែវរបស់យើង និងជួសជុលរូបសំណាក់តោពីរ ដែលបច្ចុប្បន្នមានសភាពចាស់ និងបែកបាក់កន្លែងខ្លះមួយចំនួន ពិសេសគឺស្រាវជ្រាវរកប្រវត្តិរបស់ព្រះវិស្ណុ ដើម្បីបានដឹងអំពីប្រវត្តិរបស់ព្រះអង្គ ។ ការជំរុញនេះដែរ បានធ្វើឡើង នៅរសៀលថ្ងៃទី១១ ខែមិថុនា ឆ្នាំ២០២០ ខណៈដែលឯកឧត្តម អ៊ូច ភា អភិបាល នៃគណៈអភិបាលខេត្តតាកែវ រួមជាមួយ លោក ណុប នី ប្រធានមន្ទីរសាធារណការ និងដឹកជញ្ជូនខេត្ត លោកប្រធានមន្ទីរអង្គភាពពាក់ព័ន្ធ លោក កង អាណាន់ អភិបាលក្រុងដូនកែវ បានចុះត្រួតពិនិត្យមើលការស្ថាបនាកែលម្អឡើងវិញ នូវខឿនព្រះវិស្ណុ ផ្លូវបំបែកតោពីរ ស្ថិតនៅភូមិផ្សារតាកោ សង្កាត់រកាក្នុង ក្រុងដូនកែវ ខេត្តតាកែវ។
ជាមួយគ្នានេះដែរ ឯកឧត្តម អ៊ូច ភា ក៏បានផ្តាំផ្ញើទៅដល់ក្រុមជាងជួសជុល ត្រូវធ្វើឲ្យបានលឿន និងសមស្រមតាមលក្ខណៈបច្ចេកទេស ព្រោះរូបសំណាកព្រះវិស្ណុ និងរូបសំណាកតោពីរនេះ វាគឺជាចំណុចផ្លូវចូលមកទីរួមខេត្តតាកែវរបស់យើង ព្រមទាំងបង្ហាញ ពីសោភ័ណភាពផងដែរ ដូច្នោះសូមយកចិត្តទុកដាក់ជួសជុលឲ្យបានល្អ ៕
ដោយ៖ តាកែវ