តារាបង្ហាញម៉ូតរូបស្រស់សោភា អ្នកនាង នៅ សូនីតា ត្រូវបានដឹងថា ចាប់ដៃគ្នាជាមួយស្វាមី លោក ទិត្យ ថាវរឹទ្ធ ទទួលបានចំណងដៃអាពាហ៍ពិពាហ៍កូនប្រុសម្នាក់ដ៏ស្រស់ស្អាត ដែលគិតមកទល់ពេលនេះ មានអាយុជិត១ខួបហើយ។
តែយ៉ាងណា នៅ សូនីតា តែងធ្វើឲ្យមនុស្សប្រុសជាច្រើន លួចច្រណែនយ៉ាងខ្លាំង ដល់ថ្នាក់អ្នកខ្លះថា នាងយកប្តីចាស់ ព្រោះតែសម្លឹងឃើញទ្រព្យសម្បត្តិ និងមានបុណ្យស័ក្តិកិត្តិយសខ្ពស់។ ប៉ុន្តែ អ្វីដែលមនុស្សមួយចំនួនបានចោទឡើងបែបនេះ គឺជាការផ្ទុយស្រឡះទាំងស្រុងតែម្តង ព្រោះថា អ្នកនាងមិនមែនជាមនុស្សមើលឃើញតែទ្រព្យសម្បត្តិគេបែបនេះនោះទេ។
ដើម្បីបកស្រាយឲ្យបងប្អូនបានដឹងពីជម្រៅចិត្តរបស់ខ្លួន អ្នកនាង នៅ សូនីតា បានទម្លាយចេញការពិតដ៏ចាក់ដោត តាមរយៈបណ្តាញសង្គមហ្វេសប៊ុកយ៉ាងដូច្នេះថា៖
«បុរសម្នាក់នេះ អាចមិនមែនជាបុរសសង្ហា មិនឡូយឆាយ បណ្ដើរគ្នាទៅណាមកណា ក៏មិនសក្តិសមនឹងនាងដែរ តែបើនិយាយថា មកពីគាត់ជាអ្នកមាន មានទ្រព្យ មានមុខមាត់ ក៏មិនមែនអាចឱ្យនាងជ្រើសរើសគាត់ដែរ ព្រោះថា លុយដែលនាងមាន ការងារដែលនាងធ្វើ ក៏អាចចិញ្ចឹមនាង និងគ្រួសារនាងឱ្យរស់នៅបានស្រួលហើយ។ ប៉ុន្តែអាចមានចំណុចផ្សេងទៀត ដែលនាងសុខចិត្តជ្រើសយកបុរសវ័យច្រើនជាងនេះគឺ ៖
១. មិនសង្ហា បណ្ដើរទៅណាមិនសម តែគាត់មានចរិតចាស់ទុំ បណ្ដើរទៅណាមកណា ធ្វើឱ្យនាងមានសេចក្ដីថ្លៃថ្នូរ អាចចូលចំណោមគេចុះ។
២. គាត់ធ្វើឱ្យនាងមានអារម្មណ៍ថា កក់ក្ដៅ មានសុវត្ថិភាព គ្រប់ពេលដែលនាងមានគាត់នៅក្បែរ។
៣. គាត់ផ្ដល់កម្លាំងចិត្ត ជំរុញនាងគ្រប់កាលៈទេសៈ និងតែងតែផ្ដល់គំនិតល្អៗ គាំទ្រនាងគ្រប់ពេល។
៤. គាត់ប្រៀបដូចជាឪពុកម្នាក់ អត់ឱន អធ្យាស្រ័យ មានចិត្តមេត្តា ចេះការពារ និងជាពិសេសគឺ មិនដែលធ្វើឱ្យនាង ខ្វល់គិត ពិបាកចិត្ត ព្រោះតែគាត់នោះឡើយ។
៥. គាត់អាចធ្វើបានគ្រប់យ៉ាងដើម្បីនាង លះបង់ ស្មោះត្រង់ យល់ចិត្ត ជាពិសេសគឺ សម្ដីសម្ដៅគិតគូរ មិនចេះត្អូញត្អែរ មិនពូកែដ្រាម៉ា មិនស្រែកគំហក មិនដែលបង្ខំនាងនោះទេ អ្វីៗគឺ ផ្ដល់សិទ្ធក្នុងការ គិត ពិភាក្សា និងដោះស្រាយគ្នាជានិច្ច។
ជ្រើសរើសគូជីវិត មិនបាច់ខ្វល់ទេថា គាត់សមនឹងយើង ឬក៏អត់ អ្នកដទៃគេមើលមិនគិត ឬនិយាយបែបណា អ្វីដែលសំខាន់គឺ យើងអាចទទួលយកគាត់បាន គាត់អាចផ្ដល់ឱ្យយើង នូវអ្វីដែលយើងត្រូវការ នោះគឺ សេចក្ដីស្រឡាញ់ ភាពស្មោះត្រង់ ក្នុងជីវិតគូដ៏យូរអង្វែង។ បញ្ជាក់ ចាស់ឬក្មេងអាស្រ័យទៅលើចរិតររបស់ប្តីដែរ» ៕ ដោយ៖ លឹម ហុង