ខេត្តព្រះសីហនុ ៖ ឯកឧត្ដម ទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានមានប្រសាសន៍ថា ខេត្តព្រះសីហនុ នៅសល់ផ្ទៃដីរងផលប៉ះពាល់ដោយសារមីន និងគ្រាប់ប្រមាណជាង ៥,៥ គីឡូម៉ែត្រក្រឡា និងត្រូវការថវិកាបោសសម្អាតប្រមាណ ១,៥ លានដុល្លារអាមេរិក ដេីម្បីដោះស្រាយបញ្ចប់ការរងផលប៉ះដោយសារមីន និងគ្រាប់។
ការបញ្ជាក់បែបនេះ ក្នុងឱកាសដែល ឯកឧត្ដម ទេសរដ្ឋមន្ត្រី លី ធុជ អញ្ជើញជាអធិបតីភាព ក្នុងពិធីបិទវគ្គបណ្តុះបណ្តាលរំលឹក ស្តីពីការប្រើប្រាស់ Tablet ក្នុងការប្រមូលទិន្នន័យអង្កេតចម្ការមីន/ចម្ការគ្រាប់បែកចង្កោម ដល់មន្ត្រីម៉ាពូចំនួន១៩ខេត្តនៅថ្ងៃទី១១ ខែមិថុនា ឆ្នាំ២០២០។
វគ្គបណ្ដុះបណ្ដាលនេះ មានការអញ្ជើញចូលរួមពី ឯកឧត្ដម គង់ វិតាណៈ អភិបាលរងខេត្តព្រះសីហនុ និងជាប្រធានគណៈកម្មាធិការសកម្មភាពមីនខេត្ត ថ្នាក់ដឹកនាំ មន្ត្រី បុគ្គលិកអាជ្ញាធរមីន មន្ត្រីគម្រោង DFID និងមន្ត្រីគម្រោងបោសសម្អាតមីនដេីម្បីលទ្ធផល (CFR)។
ក្នុងនាមសម្តេចតេជោនាយករដ្ឋមន្ត្រី និងជាប្រធានអាជ្ញាធរមីន ឯកឧត្ដម ទេសរដ្ឋមន្ត្រី លី ធុជ បានកោតសរសើរ និងថ្លែងអំណរគុណដល់មន្ត្រីក្រុមការងាររៀបចំផែនការសកម្មភាពមីន(ម៉ាពូ) ២៥ រាជធានី ខេត្ត ដែលបានចូលរួមយ៉ាងសកម្មក្នុងការសម្របសម្រួលការងារសកម្មភាពមីននៅតាមរាជធានី ខេត្តនីមួយៗ ដើម្បីឆ្លើយតបនឹងតម្រូវការជាក់ស្ដែងរបស់សហគមន៍ ការងារអភិវឌ្ឍន៍ និងចូលរួមកាត់បន្ថយហានិភ័យដោយសារមីននិងសំណល់ជាតិផ្ទុះពីសង្គ្រាម។
ជាមួយគ្នានេះ ការងារចំពោះមុខ ឯកឧត្ដមទេសរដ្ឋមន្ត្រី បានស្នើសុំអោយមន្ដ្រីម៉ាពូទាំងអស់បន្តយកចិត្តទុកដាក់ខ្ពស់ និងសហការអោយបានជិតស្និទ្ធបន្ថែមទៀតជាមួយភាគីពាក់ព័ន្ធសកម្មភាពមីនទាំងអស់ និងត្រៀមខ្លួនដោះស្រាយរាល់បញ្ហាប្រឈមនានា ពាក់ព័ន្ធនឹងបញ្ហាមីន និងសំណល់ជាតិផ្ទុះពីសង្គ្រាមក្នុងដែនសមត្ថកិច្ចរបស់ខ្លួន ជាពិសេសត្រូវចូលរួមជាមួយរាជរដ្ឋាភិបាលកម្ពុជា ក្រោមការដឹកនាំដ៏ខ្ពង់ខ្ពស់របស់ សម្តេចតេជោនាយករដ្ឋមន្ត្រី ក្នុងការសម្រេចអោយបាននូវគោលដៅកម្ពុជាគ្មានឆ្នាំ២០២៥។
មុននឹងបិទបញ្ចប់វគ្គ ឯកឧត្ដម ទេសរដ្ឋមន្ត្រី លី ធុជ បានផ្តល់អនុសាសន៍ណែនាំចំនួន ០៦ចំណុច ដេីម្បីពង្រឹងភាពជាអ្នកដឹកនាំ និងទទួលជោគជ័យការងារប្រកបដោយប្រសិទ្ធភាពខ្ពស់ រួមមាន៖
១.យល់ឲ្យ បានច្បាស់នូវគោលដៅយុទ្ធសាស្ត្រ គោលនយោបាយ និងនីតិវិធីរបស់អង្គភាព។
២.ធានាឲ្យ បាននូវគុណភាព ប្រសិទ្ធភាពការងារដោយចំណាយពេលវេលា និងថវិកាអោយសមស្របនឹងគោលដៅ
៣.បង្កេីនការយល់ដឹងចំពោះបរិយាកាសជុំវិញខ្លួន និងភារកិច្ចរបស់ខ្លូន
៤.រៀបចំគោលដៅ និងផែនការជាប្រចាំ
៥.ត្រូវរក្សាឲ្យបានសុខុមាលភាព និងនិងសុខដុមរមនាឲ្យ ល្អក្នុងអង្គភាព និង
៦.ត្រូវដោះស្រាយដោយចាប់ផ្ដើមពីបញ្ហាតូចៗជាមុនសិន មុននឹងត្រៀមខ្លួនដោះស្រាយបញ្ហាជាយុទ្ធសាស្ត្រ៕ដោយ៖កូឡាប