មេដឹកនាំភីលីពីន រូទ្រីហ្គូ ដូធឺតេ (Rodrigo Duterte) បាននិយាយកាលពីថ្ងៃសុក្រម្សិលមិញថា លោកបានប្រាប់ មេដឹកនាំមីយ៉ានម៉ា អ៊ុងសាន ស៊ូជី ថាកុំឲ្យខ្វល់ខ្វាយចំពោះការត្អូញត្អែររបស់ពួកសកម្មជនសិទ្ធិមនុស្ស។
ថ្លែងនៅក្នុងកិច្ចប្រជុំក្នុងទីក្រុង New Delhi ប្រទេសឥណ្ឌា បុរសខ្លាំងភីលីពីនរូបនេះ បាននិយាយថា គាត់មានការអាណិតចំពោះអ្នកស្រី អ៊ុងសាន ស៊ូជី ដែលត្រូវបានគេថ្កោលទោស និងរិះគន់យ៉ាងខ្លាំង ក្នុងរយៈពេលប៉ុន្មានខែថ្មីៗនេះ ដោយចោទប្រកាន់រដ្ឋាភិបាលអ្នកស្រីថា បានសម្លាប់ជនជាតិដើមភាគតិចរ៉ូហ៊ីងយ៉ា។
លោកបញ្ជាក់ថា អ្នកស្រី ស៊ូជីបានត្អូញត្អូថា ពួកយើងនិយាយពីប្រទេសរបស់ពួកយើង ពីផលប្រយោជន៍ និងប្រទេសខ្លួន ហើយលោក បានប្រាប់ទៅអ្នកស្រីវិញថា កុំឲ្យប្រកាន់នឹងពួកសកម្មជនសិទ្ធិមនុស្សអី ព្រោះពួកគេគ្រាន់តែជាក្រុមមាត់ចាបមាត់ព្រាបទេ។
រដ្ឋាភិបាលរបស់មេដឹកនាំភីលីពីន ក៏ធ្លាប់រងការថ្កោលទោសពីសំណាក់អង្គការសិទ្ធិមនុស្ស និងអង្គការសហប្រជាជាតិ ជុំវិញគោលនយោបាយ សង្គ្រាមប្រឆាំងគ្រឿងញៀនរបស់ លោកដូធឺតេ ដែលបណ្តាលឲ្យមនុស្សរាប់ពាន់នាក់ស្លាប់។
រដ្ឋាភិបាលមីយ៉ាម៉ា ត្រូវបានសហគមន៏អន្តរជាតិចោទថា បានប៉ុនប៉ងបោសសំអាតជនជាតិដើមភាគតិចរ៉ូហ៊ីយ៉ា នៅក្នុងរដ្ឋរាំឃីន ក្រោយពេលមានអំពើហឹង្សារបស់កងកំលាំងមីយ៉ានម៉ាបង្ក្រាបលើក្រុមនេះយ៉ាងសាហាវ ដែលបណ្តាលឲ្យមនុស្សជិត ៧.០០០នាក់ស្លាប់ និងភូមិរបស់ជនជាតិដើមនេះជាច្រើនត្រូវបានដុតបំផ្លាញ។
ក្នុងអំពើហឹង្សាដែលចាប់ផ្តើមផ្ទុះឡើងតាំងពីខែសីហាឆ្នាំមុនមក ក៏ធ្វើឲ្យជនជាតិរ៉ូហ៊ីងយ៉ាជិត ៧០០.០០០នាក់ភៀសខ្លួនទៅកាន់ប្រទេសបង់ក្លាដេស។
ទោះយ៉ាងណា ប្រទេសមីយ៉ានម៉ា និងបង់ក្លាដេស បានព្រមព្រៀងគ្នាបញ្ជូនជនភៀសខ្លួនទាំងអស់នោះឲ្យត្រឡប់មកប្រទេសមីយ៉ានម៉ាវិញ ហើយការបញ្ជូនមកនឹងត្រូវប្រើរយៈពេល ២ឆ្នាំ៕ សុភ័ក្ត្រ
