ភ្នំពេញ៖ រថយន្តដឹកកញ្ចក់ម៉ាកហ៊ីយ៉ាន់ដាយមួយគ្រឿង បើកគេចពីម៉ូតូជ្រុលជាន់ហ្វ្រាំង បណ្ដាលឲ្យរអិលកញ្ចក់ទៅមុខគាបជាប់ស្លាប់កម្មករម្នាក់ភ្លាមៗ រីឯពីនាក់ទៀតមិនមានរងរបួសទេ ដែលទីតាំងតាមបណ្តោយផ្លូវជាតិលេខ ១ ក្នុងសង្កាត់ច្បាអំពៅទី១ ខណ្ឌច្បាអំពៅ រាជធានីភ្នំពេញ។
បើយោងតាមប្រភពព័ត៌មានពីបងប្អូនប្រជាពលរដ្ឋ នៅនឹងកន្លែងកើតហេតុ បានឲ្យដឹងថា ឃើញរថយន្តម៉ាកហ៊ីយ៉ាន់ដាយ ដឹកកញ្ចក់មួយគ្រឿងដែលពាក់ផ្លាកលេខ ភ្នំពេញ 3E 72 18 ធ្វើដំណើរទិសដៅពីលិចមកកើត លុះមកដល់ចំណុចកើតហេតុ ក៏ឃើញម៉ូតូបើកយ៉ាងលឿន រួចជ្រេពីខាងមុខរថយន្ត ក៏ចាប់ហ្វ្រាំងទៅក៏រអិលកញ្ចក់គាបជាប់នឹងដើមទ្រូងកម្មករម្នាក់ស្លាប់យ៉ាងអាណោចអាធ័ម ។ រីឯកម្មករពីនាក់ទៀត មិនមានរបួសទេហើយក៏ព្យាយាមស្រែកឲ្យបងប្អូនប្រជាពលរដ្ឋ នៅជិតនោះជួយគាស់ដើម្បីជួយសង្គ្រោះ តែដោយសភាពគាបជាប់ធ្ងន់ធ្ងរពេកក៏បានដាច់ខ្យល់ស្លាប់ទៅ។
ហើយភ្លាមនោះដែរ ក៏មានកម្លាំងអាជ្ញាធរមានសមត្ថកិច្ច ក៏គាត់បានចុះជួយហៅរថយន្តស្ទូច 2 គ្រឿង ដើម្បីមកជួយសង្គ្រោះកម្មករ ដែលគាបជាប់នឹងកញ្ចក់នោះដែរ តែដោយសភាពធ្ងន់ធ្ងរពេក ក៏គាត់បានដាច់ខ្យល់ស្លាប់បាត់បង់ជីវិតបាត់ទៅហើយ។
ក្រោយពេលកើតហេតុសមត្ថកិច្ចក៏មកដល់កន្លែង ដើម្បីសាកសួរព័ត៌មានបន្ថែម និងធ្វើកំណត់ហេតុ ដើម្បីប្រគល់សាកសពយកទៅស្រុកកំណើតនៅខេត្តព្រៃវែង យកទៅធ្វើបុណតាមប្រពៃណី៕
ដោយ៖សាម៉េត