បាត់ដំបង៖ មន្ទីរព័ត៌មានខេត្តបាត់ដំបង បានឲ្យដឹងថា ស្ត្រីវ័យ២៦ឆ្នាំម្នាក់ បានស្លាប់ភ្លាមៗនៅក្នុងករណីផ្ទុះដុំម្សៅ សូដ្យូមក្លរ៉ាត (SodiumChloride) សម្រាប់បាញ់បញ្ជាដើមមៀឬហៅតាង៉ែនឲ្យចេញផ្លែ ។
ករណីនេះ បានកើតឡើងនៅរសៀលថ្ងៃទី១៣ ខែមិថុនា ឆ្នាំ២០២០ វេលាម៉ោង១៣និង៣០នាទី ស្ថិតនៅចំការ មៀនមួយកន្លែង ក្នុងភូមិតាគ្រក់ឃុំត្រែង ស្រុករតនមណ្ឌល ខេត្តបាត់ដំបង ។
ករណីផ្ទុះម្សៅ សូដ្យូមក្លរ៉ាត កើតឡើក្នុងពេលដែលប្អូនស្រី យាន យ៉ា ជាកម្មករចំការ បានយកដុំម្សៅ សូដ្យូមក្លរ៉ាត ដាក់ក្នុងធុងជ័រខៀវលាយទឹកមកបុក ពេលកំពុងបុកបណ្តាលឱ្យផ្ទុះឡើងស្លាប់ភ្លាមៗនៅនឹងកន្លែង។
សូមជម្រាបជូនថា អ្នកដាំដើមតាង៉ែន តែងប្រើប្រាស់ថ្នាំបាញ់ដើ់មដើម្បីបញ្ជាឱ្យចេញផ្លែហើយថ្នាំដែលបាញ់នេះត្រូវប្រើប្រាស់ទឹកថ្នាំម្សៅសូដ្យូមក្លរ៉ាត (SodiumChloride) ដែលលាយជាល្បាយសម្រាប់បាញ់ ក៏ប៉ុន្តែការប្រើប្រាស់ដុំម្សៅសូដ្យូមក្លរ៉ាត មកបុកបែបនេះ គឺពិតជាបង្កគ្រោះថ្នាក់ខ្លាំងណាស់។ ករណីនេះ បានឱ្យដឹងពីមន្ត្រី នៃស្នងការដ្ឋាននគរបាលខេត្តបាត់ដំបង ។
មន្ត្រី នៃស្នងការដ្ឋាននគរបាលខេត្តបាត់ដំបង សូមធ្វើការអំពាវនាវ ដល់បងប្អូនប្រជាពលរដ្ឋ សូមមេត្តាប្រុងប្រយ័ត្នចំពោះការប្រើប្រាស់វត្ថុទាំងនេះ ព្រោះវត្ថុនេះពិតជាបង្កគ្រោះថ្នាក់ដល់អាយុជីវិត យ៉ាងពិតប្រាកដ ៕ ដោយ៖កូឡាប
