ភ្នំពេញ៖ ផ្អើលទាំងយប់ រថយន្ដធុនធំដឹកជ្រូកមួយគ្រឿងរេចង្កូតឡើងខឿនផ្លូវអូសជាង៥០ម៉ែត្រ រួចក៏បន្ដទៅដំណើរមុខបុកធ្លុះរបងផ្ទះប្រជាពលរដ្ឋបណ្ដាលឲ្យរងការខូចខាតយ៉ាងដំណំ តែសំណាងល្អមិនបណ្ដាលឲ្យមាននរណាម្នាក់រងរបួសនោះឡើយ ហេតុការណ៍គ្រោះថ្នាក់ចរាចរណ៍ដ៏គួរឲ្យភ្ញាក់ផ្អើលនេះកើតឡើងកាលពីវេលាម៉ោង១២ ឈានរំលងអធ្រាត្រ ចូលថ្ងៃទី១៥ ខែមិថុនា ឆ្នាំ២០២០ ដែលស្ថិតតាមបណ្ដោផ្លូវវិមានឈ្នះ ឈ្នះ ក្នុងសង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
បើយោងតាមប្រភពពីកន្លែងកើតហេតុបានឲ្យដឹងថា គេឃើញរថយន្ដធុនធំដឹកជ្រូកមួយគ្រឿងក្បាលពណ៌ស ដែលបានធ្វើដំណើរក្នុងទិសដៅពីលិចមកកើតក្នុងល្បឿនលឿនខណៈពេលនោះមិនដឹងថាតៃកុងរថយន្ដងោកឬក៏មានបញ្ហាបច្ចេកទេសរថយន្ដយ៉ាងណានោះទេ ក៏រេចង្កូតមកបុកខឿនផ្លូវអូសជាង៥០ម៉ែត្ររួចក៏បន្ដដំណើរទៅបុកនិងរបងផ្ទះប្រជាពលរដ្ឋបណ្ដាលឲ្យធ្លុះនិងរងការខូចខាតសម្ភារមួយចំនួនទៀតផង។
ចំណែកតៃកុងវិញក៏បានទាក់ទងទៅខាងក្រុមហ៊ុនឲ្យជួយដោះស្រាយជាមួយម្ចាស់ផ្ទះទៅលើការខូចខាត។
ក្រោយពេលកើតហេតុសមត្ថកិច្ចក៏ចុះមកដល់កន្លែងកើតហេតុបានទាក់ទងខាងនគរបាលជំនាញចរាចរណ៍រធ្វើការវាសវែងយករថយន្ដបង្ក ទៅរក្សាទុករង់ចាំដោះស្រាយតាមផ្លូវច្បាប់ ចំណែកឯម្ចាស់រថយន្ដដែលបង្កក៏ដូចជាអ្នកតំណាងក្រុមហ៊ុនរង់ចាំដោះស្រាយទៅលើការខូចខាតជាមួយនឹងម្ចាស់ផ្ទះនៅពេលក្រោយ៕ ដោយហង់ ភត្រា និងហុឹម សាម៉េត