ភ្នំពេញ៖ ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍ គណៈកម្មាធិការជាតិរៀបចំការប្រកួតកីឡាអាស៊ីអគ្នេយ៍ (SEA Games) លើកទី៣២ ឆ្នាំ២០២៣ (CAMSOC) បានដឹកនាំកិច្ចប្រជុំលើរបៀបវារៈសំខាន់ៗចំនួនពីរ នៅក្នុងកិច្ចប្រជុំប្រចាំសប្តាហ៍ នាល្ងាចថ្ងៃទី១៥ ខែមិថុនា ឆ្នាំ២០២០។
បើតាមការផ្សាយព័ត៌មានរបស់ CAMSOC បានឲ្យដឹងថា ឯកឧត្តម វ៉ាត់ ចំរើន អគ្គលេខាធិការ CAMSOC មានប្រសាសន៍ក្រោយបញ្ចប់កិច្ចប្រជុំថា របៀបវារៈដ៏សំខាន់ពីរនេះ រួមមាន៖ ទី១-គឺការត្រួតពិនិត្យចុងក្រោយទៅលើស្លាកសញ្ញា (Logo) និងកែសម្រួលលើនិមិត្តសញ្ញា (Mascot) ក៏ដូចជាកែសម្រួលលើពាក្យស្លោក ឬបាវចនា ស៊ីហ្គេម ឆ្នាំ២០២៣។ ដូច្នេះយើងយកធាតុបី (Games Property) ដែលបានលើកឡើងនៅក្នុងកិច្ចពិភាក្សា សប្តាហ៍នេះ ដោយឯកឧត្តមបណ្ឌិត ថោង ខុន ប្រធានអង្គប្រជុំឲ្យកែសម្រួលឡើងវិញ និងគ្រោងឆ្លងថ្នាក់ដឹកនាំ នាចុងខែមិថុនា ឬនាដើមខែកក្កដា ឆ្នាំ២០២០ ខាងមុខឆាប់ៗនេះ នៅក្នុងកិច្ចប្រចាំឆមាស CAMSOC ដែលដឹកនាំដោយសម្តេចពិជ័យសេនា ទៀ បាញ់ ឧបនាយកដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធាន CAMSOC។
ឯកឧត្តម វ៉ាត់ ចំរើន អះអាងទៀតថា ក្រោយពីបានពិនិត្យពិចារណាទៅលើស្លាកសញ្ញា និមិត្តសញ្ញា និងបាវចនា នេះ គឺដើម្បីធ្វើយ៉ាងណាឲ្យទស្សនទាននៃស៊ីហ្គេម ឆ្នាំ២០២៣របស់យើងមានភាពទូលំទូលាយ និងទទួលយកបានទាំងបណ្តាប្រទេសអាស៊ានទាំងអស់ (១១ប្រទេសរួមទាំងម្ចាស់ផ្ទះកម្ពុជា)។
ចំពោះរបៀបវារៈទី២ គឺពិនិត្យពិភាក្សាគ្នាលើការរៀបចំទទួលធ្វើម្ចាស់ផ្ទះអាស៊ានប៉ារ៉ាហ្គេម (កីឡាជនពិការ) លើកទី១២ ឆ្នាំ២០២៣ ក្រោយបញ្ចប់ ស៊ីហ្គេម ដោយយើងបានធ្វើពង្រាងកាលបរិច្ឆេត ដោយយកថ្ងៃទី១ដល់ថ្ងៃទី១០ ខែឧសភា ឆ្នាំ២០២៣ ហើយម្យ៉ាងទៀតយើងបានពិនិត្យរួមគ្នាអំពីស្លាកសញ្ញា និមិត្តសញ្ញា និងបាវចនា ដោយគ្រាន់តែផ្លាស់ ប្តូរបន្តិចបន្តួចទៅតាមរបៀប និងបច្ចេកទេសរបស់ជនពិការ។ ចំពោះពិធីបើក-បិទ គឺកិច្ចប្រជុំបានពិភាក្សាគ្នាដោយធ្វើដោយឡែកពីគ្នា ប៉ុន្តែការរត់ភ្លើងគុប គឺធ្វើរួមគ្នាតែមួយជាមួយស៊ីហ្គេមដែរ។ ទាំងអស់នេះគឺជាអ្វីដែលយើងបានធ្វើការរួមគ្នា ដោយឲ្យគណៈកម្មការជំនាញទាំង១៤នៃ CAMSOC បញ្ចូលអំពីការរៀបចំការប្រកួអាស៊ានប៉ារ៉ាហ្គេម និងបញ្ជូលសកម្មភាពការងារនានាក្នុងដំណើរឆ្ពោះទៅទទួលរៀបចំរបស់អាស៊ានប៉ារ៉ាហ្គេម លើកទី១២ ឆ្នាំ២០២៣ របស់ព្រះរាជាណាចក្រកម្ពុជាផងដែរ។
សូមបញ្ជាក់ថា កិច្ចប្រជុំប្រចាំសប្តាហ៍របស់ CAMSOC តែងតែបានអញ្ជើញគណៈកម្មាធិការជាតិប៉ារ៉ាឡាំពិកកម្ពុជា (NPCC) ដែលតំណាងដោយឯកឧត្តម យី វាសនា អគ្គលេខាធិការ ដើម្បីរៀបចំខ្លួនឲ្យបានកាន់តែប្រសើរ ក្នុងការរៀបចំទទួលធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣ និងអាស៊ានប៉ារ៉ាហ្គេម លើកទី១២ ឆ្នាំ២០២៣ ឲ្យទទួលបានជោគជ័យជាប្រវត្តិសាស្ត្រជាលើកដំបូងរបស់កម្ពុជា៕ ដោយ៖បញ្ញាស័ក្តិ
