បន្ទាយមានជ័យ ៖ នគរបាលប៉ុស្តិ៍ព្រំដែនបឹងសាគូនៃវរសេនាតូច៩១១ និងនគរបាលអធិការដ្ឋានក្រុងប៉ោយប៉ែត បានបង្ក្រាបករណីគ្រឿងញៀន ដោយឃាត់ខ្លួនជនជាតិថៃ២នាក់រឹបអូសវត្ថុតាងមួយចំនួន ។
ការចុះត្រួតពិនិត្យករណីគ្រឿងញៀន កាលពីវេលាម៉ោង៥ល្ងាច ថ្ងៃទី១៥ ខែមិថុនា ឆ្នាំ២០២០ នៅផ្ទះជួលចំណុចនៅមាត់អូរព្រំដែន ស្ថិតក្នុងភូមិក្បាលស្ពាន១ សង្កាត់-ក្រុងប៉ោយប៉ែត ខេត្តបន្ទាយមានជ័យ ដោយមានលោកវរសេនីយ៍ត្រី រស់ ពិសិដ្ឋ មេបញ្ជាការរងនៃវរព្រំដែនគោក៩១១ និងជានាយប៉ុស្តិ៍នគរបាលព្រំដែនបឹងសាគូ បានដឹកនាំកម្លាំងប៉ុស្តិ៍សហការជាមួយនឹងម្ចាស់ផ្ទះ ព្រមទាំងកម្លាំងជំនាញគ្រឿងញៀន នៃអធិការដ្ឋាននគរបាលក្រុងប៉ោយប៉ែត ដឹកនាំដោយលោកវរសេនីយ៍ទោ កែវ ដូ អធិការរងទទួលបន្ទុកគ្រឿងញៀន។
នគរបាលទាំង២អង្គភាព ឲ្យដឹងថា ៖ ការត្រួតពិនិត្យនេះឈានដល់ការឃាត់ជនសង្ស័យ បានចំនួន២នាក់ ឈ្មោះប៉ាតាឆាត គ្រីត (Mr PATTACHAT KRIT )ភេទប្រុស អាយុ៥១ឆ្នាំ ជនជាតិថៃ កាន់លិខិតឆ្លងដែនលេខៈAA6917469 ។ ឈ្មោះ ជីវង់ អាម៉ន សាវ៉ាន់យ៉ា (Mrs CHINWONGAMORN SAWANYA) ភេទស្រី អាយុ៤៨ឆ្នាំ ជនជាតិថៃ កាន់លិខិតឆ្លងដែនលេខៈAA5682330
និងដកហូតបានវត្ថុតាងរួមមាន៖ ម្សៅក្រាមសថ្លា ៣១ថង់ ថ្នាំគ្រាប់ពណ៌ក្រហម ៦ថង់ ថ្នាំគ្រាប់ពណ៌ប៉ៃតង ៩១គ្រាប់ ជញ្ជីងថ្លឹង ១ កែវ ៣ និង សម្ភារសម្រាប់ជក់មួយចំនួនទៀត។
ជនសង្ស័យនិងវត្ថុតាងនៃបទល្មើសចែកចាយ និងជួញដូរត្រូវបានកម្លាំងនគរបាលព្រំដែនគោគ៩១១ ប្រគល់ឲ្យកម្លាំងជំនាញគ្រឿងញៀន នៃអធិការដ្ឋាននគរបាលក្រុងប៉ោយប៉ែត ។ ហើយនគរបាលនេះ ត្រូវចាត់ការបញ្ជូនបន្តទៅការិយាល័យនគរបាលប្រឆាំងគ្រឿងញៀន នៃស្នងការដ្ឋានខេត្ត ដើម្បីកសាងសំណុំរឿងបញ្ជូនទៅតុលាការតាមនីតិវិធី៕
ដោយ ៖ បន្ទាយ
