ភ្នំពេញ ៖ ក្រសួងសុខាភិបាល បានបញ្ជាក់ថា ដោយសារបរិភោគត្រីក្រពត នៅខេត្តកោះកុង ដែលសរុបករណីពុលចំនួន១០នាក់ ក្នុងនោះស្លាប់ម្នាក់ ហើយអ្នកដែលបានពុលចំនួន៩នាក់ទៀត បានដាក់ឲ្យសម្រាកនៅមន្ទីរពេទ្យខេត្តកោះកុង ចំនួន៣នាក់ និងមន្ទីរពេទ្យបង្អែកស្រែអំបិលចំនួន៦នាក់។
ករណីស្លាប់ម្នាក់ខាងលើនេះ គឺជាបុរសអ្នកនេសាទ មានសភាពពុលធ្ងន់ធ្ងរជាងគេ មានអាយុ៣៦ឆ្នាំ រស់នៅភូមិកោះស្តេច ឃុំកោះស្តេច ស្រុកគិរីសាគរ ខេត្តកោះកុង ដែលបានបាត់បង់ជីវិតនៅថ្ងៃទី២២ ខែមករាឆ្នាំ២០១៨ បន្ទាប់ពីចាប់បានត្រីក្រពតទម្ងន់៦គីឡូក្រាម រួចយកមកបរិភោគជាមួយអ្នកនេសាទ៩នាក់ទៀត។ ដោយមានការយកចិត្តទុកដាក់ជួយសង្គ្រោះពីសំណាក់គ្រូពេទ្យ បច្ចុប្បន្នអ្នកជំងឺទាំង៩នាក់នោះ មានសភាពធូរស្រាយច្រើនហើយ។
កន្លងមក ក្រសួងសុខាភិបាលតែងតែធ្វើការណែនាំ និងរំលឹកចំពោះវិធានការការពារករណីពុលចំណីអាហារ ដែលមានទាំងការពុលបណ្តាលមកពីការបរិភោគត្រីក្រពតនេះបានផងដែរ។ ជាថ្មីម្តងទៀត លោកបណ្ឌិតសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល សូមធ្វើការក្រើនរំលឹក ណែនាំ និងអំពាវនាវដល់សាធារណជនទាំងអស់ ឲ្យមានការប្រុងប្រយ័ត្ន និងចូលរួមអនុវត្តវិធានការបង្ការការពុលចំណីអាហារ ជាពិសេសការរួមគ្នាអនុវត្តឲ្យបានខ្ជាប់ខ្ជួននូវអនាម័យចំណីអាហារល្អគ្រប់ៗគ្នា ចាប់តាំងពីអ្នកបរិភោគរហូតដល់អ្នកបម្រើអាហារ ដើរតួនាទីសំខាន់នៅក្នុងការលើកកម្ពស់សុវត្ថិភាពចំណីអាហារ ចាប់តាំងពីការរៀបចំណីអាហារ របៀបទុកដាក់ និងពេលចម្អិនអាហារ។ ដើម្បីចៀសវាងបានបញ្ហាសុខភាព ដែលអាចធ្វើឲ្យបាត់បង់ជីវិតបាន និងដើម្បីចៀសផុតពីការពុលត្រីក្រពតដូចករណីខាងលើ សូមបងប្អូនប្រជាពលរដ្ឋ សូមកុំបរិភោគត្រីក្រពតដែលមានជាតិពុល ដោយសារវាមានជាតិពុលនៅក្នុងខ្លួនវាដែលអាចបណ្តាលឲ្យស្លាប់បាន។ ជាតិពុលនៅក្នុងខ្លួនត្រីក្រពតនេះមិនអាចកម្ចាត់ចោលបានទេ ទោះបិជាបានចម្អិត ឬដាក់ឲ្យកកក៏ដោយ។
សូមបញ្ជាក់ថា នៅក្នុងប្រទេសកម្ពុជា មានត្រីក្រពតចំនួន១០ប្រភេទ ក្នុងនោះមាន៣ប្រភេទមានជាតិពុល។ តាមការស្រាវជ្រាវបានរកឃើញថា ត្រីក្រពតដែលមានជាតិពុលនោះរួមមាន Tetraodon cochinchinensis , Monotrete leiurus និង Tetraodon fluviatilis ដែលមានភិនភាគដូចគ្នុងរូបភាពភ្ជាប់ជូន។ ត្រីក្រពតទាំងនេះ មានជាតិពុលដែលមានសក្តានុពលខ្ពស់ និងអាចបណ្តាលឲ្យមានជំងឺធ្ងន់ធ្ងរ និងស្លាប់បាន។ នៅពេលយើងបរិភោគត្រីទាំងនេះ ជាតិពុលបានជ្រាបទៅប៉ះពាល់ប្រព័ន្ធសរសៃប្រសាទកណ្តាល និងអាចបណ្តាលឲ្យស្លាប់។
ត្រីក្រពតដែលមានសារធាតុទាំង៣ប្រភេទខាងលើនេះ មានជាតិពុលខ្ពស់បំផុតនៅរដូលពងកូនបន្តពូជ ដែលជាធម្មតាកើតឡើងនៅក្នុងខែកុម្ភៈ មីនា និងចន្លោះខែកក្កដា ទៅខែកញ្ញា។ ចំពោះជាតិពុលនៅក្នុងខ្លួនត្រី ក៏មានកម្រិតខុសគ្នាដែរ គឺពង និងស្ពែម របស់វាមានជាតិពុលខ្ពស់ជាងគេ បន្ទាប់មកគឺថ្លើម ពោះវៀន ស្បែក និងសាច់។ រោគសញ្ញាចាប់ផ្តើមក្នុងរយៈពេល២០នាទីទៅ២ម៉ោង បន្ទាប់ពីបានបរិភោគត្រីបែបនេះ ។ រោគសញ្ញារួមមាន រមាស់ចាក់ៗ នៅបបូរមាត់ និងមាត់ បន្ទាប់មកមានអាការៈ ឈឺក្បាល វិលមុខ រមាស់ចាក់ៗនៅចុងអវយវៈ មានការពិបាកនិយាយ បាត់លំនឹងដងខ្លួន ខ្សោយសាច់ដុំ ខ្វិន ស្ពឹកចុងដៃចុងជើង ក្អួត រាក ល្ហិតល្ហៃ រឹងថ្គាម ឬអាចបណ្តាលឲ្យស្លាប់តែម្តង។ នៅក្នុងករណីដែលពុលខ្លាំង ការស្លាប់អាចបណ្តាលមកពីការខ្វិនផ្លូវដង្ហើម។ ក្រោយពីពុលភ្លាមៗ ការធ្វើឲ្យក្អួត (ប្រសិនបើអាចធ្វើទៅបាន) អាចជួយបញ្ចេញជាតិពុលពីក្នុងខ្លួនយើងបានមួយចំណែក ហើយអ្នកពុលនោះត្រូវប្រញាប់ប្រញាល់មកស្វែងរកការជួយសង្គ្រោះជាបន្ទាន់នៅមូលដ្ឋានសុខាភិបាលសាធារណៈដែលនៅជិតលោកអ្នកបំផុត ដោយស្ថានភាពអ្នកពុលតម្រូវឲ្យស្ថិតនៅក្រោមការត្រួតពិនិត្យ តាមដាន ពីគ្រូពេទ្យជាចាំបាច់។
លោករដ្ឋមន្ត្រី បានបញ្ជាក់ថា “ប្រសិនបើលោកអ្នក មានរោគសញ្ញាដូចរៀបរាប់ខាងលើ កើតមានឡើងបន្ទាប់ពីបានបរិភោគត្រីក្រពត សូមបងប្អូនប្រញាប់ទៅមណ្ឌលសុខភាព ឬមន្ទីរពេទ្យដែលនៅជិតផ្ទះលោកអ្នកជាបន្ទាន់ និងសូមប្រាប់គ្រូពេទ្យពីការដែលអ្នកបានបរិភោគត្រីក្រពត”៕ ដោយ៖បញ្ញាស័ក្តិ
