ភ្នំពេញ៖ លោកឃួង ស្រេងអភិបាលរាជធានីភ្នំពេញ កាលពីព្រឹកថ្ងៃទី២៧ មករានេះបានដឹកនាំមន្ត្រីនិងអាជ្ញាធរមូលដ្ឋានចុះសំណេះសំណាលសួរសុខទុក្ខប្រជាពលរដ្ឋនៅក្នុងសហគមន៍ក្រីក្រ អូអណ្តូង សង្កាត់គោករការខណ្ឌព្រែកព្នៅ និងបានណែនាំអោយមន្ត្រីមូលដ្ឋានយកចិត្តទុកដាក់ក្នុងការបំរើសេវាជូនប្រជាពលរដ្ឋអោយកាន់តែប្រសើរឡើង។
លោក ឃួង ស្រេង ខណៈសំណេះសំណាលជាមួយមេភូមិ មេសហគមនចៅសង្កាត់ និងខណ្ឌ នាពេលនោះ បានមានប្រសាសន៍លើកឡើងថា ក្នុងនាមជាមន្ត្រីត្រូវធ្វើអំពើល្អជាមួយប្រជាជនអោយបានច្រើនជាងនិយាយ ចុះជួយ សហគមនក្រីក្រ ថាតើពួកគាត់ចង់បានអ្វីអោយយើងជួយពួកគាត់។ ប្រធានសហគមន ចៅសង្កាត់ ក្រុមប្រឹក្សា មេភូមិត្រូវប្រើសំដីសំដៅអោយល្អជាមួយប្រជាពលរដ្ឋ យកចិត្តទុកដាក់ជាមួយប្រជាពលរដ្ឋ ពិសេសការផ្តល់សេវាជូនគាត់អោយបានលឿន។
លោកបញ្ជាក់ថា ការបំរើប្រជាជនប្រៀបបាននឹងការដណ្តាំបាយអញ្ចឹងដែរ ដោយចាប់ផ្តើមដណ្តាំរហូតបានឆ្អិន មិនមែនជាត់បាយហើយទុកចោលនោះទេ។កុំធ្វើអ្វីអោយខុសពីច្បាប់ កុំយកលុយគេជាថ្នូរនឹងការបំរើសេវា ប្រយ័ត្នមានទោស ទណ្ឌខណៈដែលគេប្តឹង ។តែបើគេអោយយកទៅ កុំធ្វើអោយប្រជាពលរដ្ឋមិនសប្បាយចិត្ត ជាមួយយើងអោយសោះ។
លោកជម្រុញអោយមានការលះបង់រួមគ្នាដើម្បីបំរើផលប្រយោជន៍ជូនប្រជាពលរដ្ឋមអោយរីកធំធាត់ ។ នៅសង្កាត់គោករការនេះមានបណ្ឌលសុខភាពហើយមានទាំងរថយន្តសង្គ្រោះបន្ទាន់ និងមានផ្លូវល្អ ទៀតវាមិនមានបញ្ហាទេ សំខាន់យើងបំរើប្រជាពលរដ្ឋបានលឿនឬអត់។ចំពោះ ផលប៉ះពាល់ជាមួយប្រជាពលរដ្ឋ យើងត្រូវរួមគ្នាសិក្សាអោយបានច្បាស់ ដើម្បីកាត់បន្ថយការថ្នាំងថ្នាក់ពីប្រជាពលរដ្ឋ
ហើយបើការងារនោះ ថ្នាក់សង្កាត់ខណ្ឌដោះស្រាយមិនបាន រាយការណ៍មកក្រុងដើម្បីអោយក្រុងដោះស្រាយបន្ត មិនត្រូវទុកការខ្វល់ខ្វាយរបស់ប្រជាជនចោលនោះទេ។
លោកថា បញ្ហាទឹក លោកមានគម្រោងទិញទឹកពីរដ្ឋាករ ដោយលោកនឹងប្រគល់ជូនរថយន្តដើម្បីដឹកទឹក លក់ដូនប្រជាជនក្នុងតម្លៃមួយដែលអាចអោយពួកគាត់ទទួលយកបាន សំខាន់អោយតែអ្នកកាន់រថយន្តដឹកទឹកនេះអាចដោះស្រាយកម្លាំងពលកម្ម ប្រេង និងរថយន្តបានពេលរថយន្តខូចបង់។
ក្រោយពីបញ្ចប់ការសំណេះសំណាល លោកឃួង ស្រេង បានបន្តការចុះសួរសុខទុក្ខប្រជាពលរដ្ឋនៅក្នុងសហគមន៍ក្រីក្រ អូអណ្តូង សង្កាត់គោករការខណ្ឌព្រែកព្នៅបន្តទៀត ដើម្បីចង់ដឹងពីការលំបាករបស់ប្រជាពលរដ្ឋក្នុងសហគមនមួយនេះនិងបានចែកជាថ្នាំពេទ្យអោយប្រជាពលរដ្ឋក្នុងសហគមននេះផងដែរ៕ ដោយ៖កូឡាប