ទាហានឥណ្ឌាយ៉ាងតិចចំនួន ២០នាក់បានស្លាប់ នៅក្នុងការប៉ះទង្គិចគ្នាជាមួយនឹងកងកម្លាំងរបស់ចិន នៅតំបន់ព្រំដែលមានជម្លោះហិមាល័យ (Himalayan)។ នេះបើតាមការបញ្ជាក់របស់មន្ត្រីឥណ្ឌា។
ហេតុការណ៍ប៉ះទង្គិចគ្នាកើតឡើងក្រោយមានភាពតានតឹងយ៉ាងខ្លាំង រវាងមហាអំណាចនុយក្លេអ៊ែរទាំងពីរ។ វាជាការប៉ះទង្គិចគ្នាដ៏គ្រោះថ្នាក់លើកដំបូង ក្នុងរយៈពេលជាង ៤៥ឆ្នាំចុងក្រោយ។
យោធាឥណ្ឌាដំបូងនិយាយថា ទាហានរបស់ខ្លួនចំនួន ៣នាក់បានស្លាប់ ហើយភាគីទាំងពីរសុទ្ធតែមានអ្នកស្លាប់។
ប៉ុន្តែក្រោយមកនៅថ្ងៃអង្គារម្សិលមិញនេះ មន្ត្រីឥណ្ឌានិយាយថា ទាហានមួយចំនួនដែលរងរបួសធ្ងន់ បានស្លាប់។
ក្រសួងកិច្ចការផ្ទៃក្នុងឥណ្ឌា បានចោទចិនថារំលោភកិច្ចព្រមព្រៀងដែលបានព្រមព្រៀងកាលពីសប្តាហ៍មុន ដើម្បីគោរពខ្សែបន្ទាត់គ្រប់គ្រងជាក់ស្តែងនៅតំបន់ជ្រលងភ្នំ Galwan។
តើភាគីទាំងពីរនិយាយអ្វីខ្លះពីការហេតុការណ៍នោះ
កាលពីថ្ងៃអង្គារ យោធាឥណ្ឌាបាននិយាយថា ទាហានខ្លួន ៣នាក់ រួមមានមន្ត្រីម្នាក់ផងនោះ បានស្លាប់នៅក្នុងការប៉ះទង្គិចគ្នានៅតំបន់ Ladakh ដែលជាតំបន់មានជម្លោះ ក្នុងតំបន់ Kashmir។
ក្រោយមកនៅថ្ងៃដដែល ឥណ្ឌាបានបញ្ចេញសេចក្តីប្រកាស ដោយនិយាយថា ភាគីទាំងពីរបានចែកផ្លូវគ្នា។
ចិនមិនបានបញ្ជាក់ពីការស្លាប់របស់ទាហានខ្លួននោះឡើយ ប៉ុន្តែបានចោទប្រកាន់ឥណ្ឌាវិញថា បានឆ្លងព្រំដែលចូលមកខាងចិន។
អ្នកនាំពាក្យក្រសួងការបរទេសចិន ឈ្មោះ Zhao Lijian បាននិយាយថា ឥណ្ឌាបានឆ្លងព្រំដែនចំនួន ២ដងកាលពីថ្ងៃចន្ទ ញុះញង់ និងបានវាយប្រហារលើកងកម្លាំងចិន បណ្តាលឲ្យមានការប្រឈមដាក់គ្នាដ៏ធ្ងន់ធ្ងរ រវាងកងកម្លាំងព្រំដែននៃប្រទេសទាំងពីរ។
ភាគីទាំងពីរបានអះអាងថា គ្មានការបាញ់គ្រាប់កាំភ្លើងមួយឡើយក្នុងរយៈពេល ៤ទសវត្សរ៍មក ហើយយោធាឥណ្ឌានិយាយនៅថ្ងៃអង្គារថា មិនមានការបាញ់គ្រាប់ឡើយ ក្នុងការប៉ះទង្គិចចុងក្រោយ។
សូមបញ្ជាក់ថា មហាអំណាចនុយក្លេអ៊ែរទាំងពីរមានជម្លោះនឹងគ្នា លើតំបន់ព្រំដែនរយៈពេលជាយូរមកហើយ។ ការប៉ះទង្គិចគ្នារវាងកងកម្លាំងនៃប្រទេសទាំងពីរ កើតជាលក្ខណៈវាយតប់គ្នា និងគប់ដុំថ្ម ប៉ុន្តែមិនមានការបាញ់គ្រាប់នោះទេ។
ប្រទេសទាំងពីរមានសង្គ្រាមជាមួយគ្នាតែម្តងប៉ុណ្ណោះ រហូតមកដល់ពេលនេះ គឺនៅក្នុងឆ្នាំ ១៩៦២ នៅពេលដែលឥណ្ឌាបរាជ័យដ៏អាមាស់៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
