ខេត្តបាត់ដំបង៖ ពលរដ្ឋចំនួន៦៨គ្រួសារ ដែលរងគ្រោះដោយសារគ្រោះធម្មជាតិខ្យល់កន្ត្រាក់ ស្ថិតក្នុងឃុំចំនួន៣ នៅស្រុកមោងឫស្សី បានទទួលអំណោយមនុស្សធម៌ពីសាខាកាកបាទក្រហមខេត្តបាត់ដំបង ។
ពិធីនាំយកអំណោយមនុស្សធម៌ចែកជូនពលរដ្ឋនាពេលនោះ ក្រោមអធិបតីភាពឯកឧត្តម អ៊ុយ រី អនុប្រធានកិត្តិយសសាខាកាកបាទក្រហមខេត្តបាត់ដំបង ឯកឧត្តមបណ្ឌិត ប៊ុត គឹមស៊ាន ប្រធានសាខាកាកបាទក្រហមខេត្តបាត់ដំបង កាលពីថ្ងៃទី១៦ ខែមិថុនា ឆ្នាំ២០២០។
ឯកឧត្តម អ៊ុយ រី អនុប្រធានកិត្តិយសសាខាកាកបាទក្រហមខេត្តបាត់ដំបង បានសម្តែងនូវការសោកស្ដាយ ចំពោះការខូចខាតផ្ទះសម្បែងទ្រព្យសម្បត្តិ រហូតដល់មានការបាត់បង់អាយុជីវិត សមាជិកគ្រួសារទៀត ដែលនេះជាគ្រោះមហន្តរាយដោយធម្មជាតិ គ្មាននរណាម្នាក់ចង់ជួបប្រទះឡើយ។ ថ្វីត្បិតតែអំណោយមនុស្សធម៌ បាននាំយកមកចែកជូននេះ មានចំនួនតិចតួចក្ដី មិនសមល្មមនឹងការខាតបង់របស់បងប្អូន តែក៏អាចជួយសម្រាលទុក្ខលំបាករបស់បងប្អូនបានមួយកម្រិត ហើយក៏ជាការបង្ហាញនូវការយកចិត្តទុកដាក់ ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេសកាកបាទក្រហមកម្ពុជា ដែលមានសម្ដេចកិត្តិព្រឹទ្ធជាប្រធាន។
ឯកឧត្តមបណ្ឌិត ប៊ុត គឹមស៊ាន ប្រធានសាខាកាកបាទក្រហមខេត្តបាត់ដំបង បាននាំការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់គិតគូរចំពោះសុខទុក្ខពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនាឬនិន្នាការនយោបាយណាមួយឡើយ។
ឯកឧត្តមបណ្ឌិត ប៊ុត គឹមស៊ាន បានអំពាវនាវដល់ពលរដ្ឋ មានការអត់ធ្មត់ចូលរួមទាំងអស់គ្នា ប្រយុទ្ធប្រឆាំងការឆ្លងរាលដាលនៃជំងឺកូវីដ១៩ ដែលជាសោកនាដកម្មដំបូងនៃការផ្ទុះជំងឺផ្លូវដង្ហើមថ្មីកូវីដ១៩ គឺជាមេរៀន សម្រាប់ពិភពលោក ព្រោះតែមិនបានប្រយ័ត្នក្នុងការធ្វើដំណើរ ដែលជាមូលហេតុនៃការចម្លង៕
ដោយ៖អ៊ុងសារុំ
