កំពង់ធំ ៖ បុរសម្នាក់តាំងខ្លួនជាមន្ត្រីតុលាការខេត្តកំពង់ធំ ដើរញុះញង់ឲ្យប្រធានភូមិចំនួន៥ភូមិ ក្នុងសង្កាត់ស្រយ៉ូវ ក្រុងស្ទឹងសែន ដើរផ្តិតមេដៃប្រជាពលរដ្ឋដើម្បីទាមទារដីតំបន់បី ត្រូវសមត្ថកិច្ចនគរបាលខេត្តកំពង់ធំ ឃាត់ខ្លួន ដោយចោទពីបទ ករណីជ្រៀតជ្រែកដោយខុសច្បាប់ ទៅក្នុងការបំពេញមុខងារសាធារណៈ និងករណីញុះញង់ឲ្យប្រព្រឹត្តអំពើប្រឆាំង នឹងរាជការសាធារណៈ កាលពីថ្ងៃទី៧ ខែមិថុនា ឆ្នាំ២០២០ ក្នុងភូមិសាស្ត្រសង្កាត់ស្រយ៉ូវ ក្រុងស្ទឹងសែន ខេត្តកំពង់ធំ។
ជនដែលត្រូវសមត្ថកិច្ចឃាត់ខ្លួនមានឈ្មោះ ព្រុំ ម៉ិក អាយុ ៥៤ឆ្នាំ រស់នៅភូមិព្រែកស្បូវ សង្កាត់អូរកន្ធរ ក្រុងស្ទឹងសែន ខេត្តកំពង់ធំ។
ជនសង្ស័យ បានតាំងខ្លួនជាមន្ត្រីតុលាការខេត្តកំពង់ធំ ដើរញុះញង់ឲ្យលោកប្រធានភូមិចំនួនប្រាំភូមិនៅក្នុងសង្កាត់ស្រយ៉ូវ ដើរផ្តិតមេដៃប្រជាពលរដ្ឋដើម្បីទាមទារដីតំបន់បី មាន តំបន់បាក់ដុំ , តំបន់គោកព្រះ, តំបន់វាលស្នងមែន , ដែលធ្វើឡើងប្រឆាំងជាមួយគោលនយោបាយរបស់រាជរដ្ឋាភិបាល និង ជ្រៀតជ្រែកដោយខុសច្បាប់ ទៅក្នុងការបំពេញមុខងារសាធារណៈញុះញង់ឲ្យប្រព្រឹត្តអំពើប្រឆាំងនិងរាជការសាធារណៈ។
នៅវេលាម៉ោង ១៧ និង ២៨នាទីល្ងាច ថ្ងៃទី១៧ ខែមិថុនា ឆ្នាំ២០២០ សមត្ថកិច្ចនគរបាលខេត្ត បានសម្រេចឃាត់ខ្លួនជនសង្ស័យ ឈ្មោះ ព្រុំ ម៉ិក ភេទប្រុស នេះ នៅស្នងការដ្ឋាននគរបាលខេត្តកំពង់ធំ ដើម្បីកសាងសំនុំរឿងតាមនីតិវិធី៕ ដោយ៖បញ្ញាស័ក្តិ
