ព្រៃវែង៖ យោងតាមរបាយការណ៍របស់លោកប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តព្រៃវែង នៅថ្ងៃទី១៧ ខែមិថុនា ឆ្នាំ២០២០ បានឲ្យដឹងថា ប្រជាកសិករជាច្រើនភូមិ នៅឃុំជាខ្លាង ស្រុកស្វាយអន្ទរ ខេត្តព្រៃវែង បានជ្រើសរើសយកការដាំដុះដំណាំអំពៅ ជាដំណាំយុទ្ធសាស្ត្រ ដើម្បីបង្កើនប្រាក់ចំណូលក្នុងគ្រួសារ កាត់បន្ថយការធ្វើចំណាកស្រុក ។
បើតាមឯកឧត្តមរដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ វេង សាខុន បានថ្លែងថា ដោយសារទីផ្សារអំពៅល្អប្រសើរ ក្នុងអំឡុងពេលប៉ុន្មានឆ្នាំចុងក្រោយនេះ ប្រជាកសិករនៅឃុំជាខ្លាងរបស់លោក បានបង្កើនការដាំដុះ កើនឡើង ជាងមុនជិតទេ្វដង ដែលកាលពីឆ្នាំមុន ពួកគាត់ដាំដុះបានត្រឹមតែជាង៣០០ហិកតាតែប៉ុណ្ណោះ ប៉ុន្តែសម្រាប់ឆ្នាំនេះ ពួកគាត់បានបង្កើនរហូត ដល់ជាង៥០០ហិកតា។
ម្ចាស់ចំការដាំអំពៅ បានបញ្ចាក់ឲ្យដឹងថា នៅឆ្នាំនេះប្រជាកសិករ បានពង្រីកការដាំដុះអំពៅយ៉ាងច្រើន ស្ទើរតែគ្មានស្រែទំនេរទេ ព្រោះកាលពីឆ្នាំមុនៗ ពួកគាត់អាចលក់បានប្រមាណពី៣០ ទៅជាង៣០លានរៀល ក្នុង១ហិកតា ប៉ុន្តែសម្រាប់ឆ្នាំនេះ កសិករថា ប្រហែលជាចុះបន្តិចបន្តួច ប៉ុន្តែយ៉ាងហោចណាស់ ក៏ទទួលបានពី២៥លាន ទៅ៣០លានរៀលដែរក្នុងមួយហិកតា៕ ដោយ៖កូឡាប
